Gveihlingzgauh dwg gijgwn baenzyw cojcienz haujlai nanz lo, dwg cungj gijgwn bauj ndang ndei gag baenz saekndaem haenx, caemhcaiq baengh doenghgij boiqfueng caeuq dinfwngz cauhguh cojcienz haenx ndaej cienz daengz seizneix.

Gveihlingzgauh baenzlawz guh baenz ne? Doenghgij mbaek gonqlaeng gvendaengz cauhguh gveihlingzgauh couhdwg: Aeu doenghgo ywdoj daeuj, genj ndei、swiqseuq, gya raemx cawj song mbat, sauz song mbat aeu raemxyw seuq, coq dangzoij、dangzrwi、raemx doenghgo yw daengj itheij, doxgyaux yinz bae, gya hawj de lai ndat, hawj de gyoet roengzdaeuj.

Gveihlingzgauh aeu duz gvibakromh caeuq dojfuklingz guh doenghyiengh goek, gya geijcib cungj ywdoj doengzcaez oemq baenz. Duz gvibakromh dwg cungj ywdoj dijbauj youh bengz ndeu, ndaej siu ndat gaij doeg; dojfuk- lingz ndaej cawz mbaeq. Cawzle song cungj yw daeuz neix, caiq boiq coq swnghdi(goyw)、golinz- gaeq、vangaenz daengj lai cungj ywdoj, hawj yw lai rengz lai haenq. Aeu doenghgij doenghyiengh neix daeuj guh baenz gveihlingzgauh, miz haujlai yungh, couhdwg siu ndat gej doeg、cawz doeg hwnj noh、ciengx raemxndang bouj makvunz、bauj ndang lai ndei hawj naj naengnoh lai oq lai ndeiyawj daengj.

Gveihlingzgauh Vuzcouh ndawde miz haujlai cungj gvangvuzviz dwg ndangvunz aeu miz haenx, feihdauh mizdi haemz youh van, gwn haeuj bak bae raeuzraed youh soengsup, miz ndat daemq、 lauz noix、 danjgucunz siuj daengj daegdiemj, ndaej hawj hezcih caeuq hezdangz gag ndaej ngamjndei.

Doenghgij feihdauh gveih- lingzgauh miz cib lai cungj, vunz gwn cungj feihdauh bonjmiz caeuq feihdauh naijcaz haenx ceiq lai. Gij gveihlingzgauh feihdauh bonjmiz haenx mizdi haemz, gya di dangzrwi、raemxyehswj、cijlienh (cijcwz roxnaeuz cijyiengz ging- gvaq gyagoeng baenz cungj cij ndaej ce lai nanz haenx), roxnaeuz gya di lwgmak ndeu coq, couh lai baenzgwn.

Mbagveihlingz baenzlawz guh baenz gijgwn? Aeu raemxraeuj coq mba gyaux baenz gwd, liuxle gya raemxgoenj coq, ce daengz gyoet liux gya dangzrwi、dangz roxnaeuz cijlienh couh gwn ndaej lo. Seizndat ne lai guh di, coq ndaw binghsiengh bae gyoet, couh lai baenzgwn.

Ciuhmingz doxdaeuj, gveih- lingzgauh Vuzcouh gonqlaeng ndaej dangguh ywdoj、gijgwn baenzyw ndawbiengz、gijgwn iq daegsaek dangdieg daengj, hwngfat ginggvaq lai duenh lo, gyoengq- vunz Guengjdoeng、Guengjsae、rangh baihdoeng Cungguek vanzlij Dunghnanzya haenx gyaez gwn; ndaej gai doh lajmbwn bae, gyawj gyae cungj okmingz.

Aenvih cungj canjbinj daeg- bied neix dijbauj lai, 2007 nienz 5 nyied Gozgyah Cizgenj Cungjgiz ginggvaq lai baez cazyawj, doengzeiq dawz Vuzcouh gveih- lingzgauh dangguh cungj canjbinj hauhbiu diegdeih ndeu henhoh hwnjdaeuj. Bi 2007, Vuzcouh gveihlingzgauh ginggvaq Gvangjsih Bouxcuengh Swcigih Yinzminz Cwngfuj doengzeiq, ndaej lied- haeuj daih’it buek swcigih gaep feihvuzciz vwnzva yizcanj mingz- loeg.