Yawj 《Gvangjsih Minzcuz Bau》 bi 2019 ndwen 2 ngoenz 27 hainduj youq banj canghraiz ciemdingh Yiz Ciz sij bien sawcuenh 《Mbaw Faenz Yahmoq》 le, gou gamjdoengh dangq- maz. Hainduj yawj couh deng ciuyinx lo, goq mbouj ndaej haeujsim gizwnq, mbouj rox mbouj nyinh couh yawj daengz byai, byawz rox, lij caengz sat, cij ndaej naihsim deq geiz laeng. Yienznaeuz bien sawcuenh neix miz di raez, laebdaeb daengh song geiz, hoeng yawj roengzdaeuj, caen dwg van hoz van sim mizfeih dangqmaz.

Yahmoq、Daxmeh、Goengliuj gyoengqvunz ndaw sawcuenh mbouj- dan dwg lajmbanj boux simsoh youh gaenxhong, caemhcaiq youh dwg boux dungxaek gvangqlangh ndeu. Gyonj daeuj gangj, bien sawcuenh neix, dwg haenh bang vunz simndei simsienh, sij ndaej gig sengdoengh, cingzcez gojgaeq miz roengz miz sang, hawj vunz doq yawj doq danq, yawj sat lij hoizfeih mbouj caenh.

Yahmoq doiq lwg gig ndei. De hix dwg daxmeh ndeu, miz 9 boux lwg, gyoengq lwg neix mbouj cungj duh de seng, lij miz 3 lwg dwg Goenghgvangh gvanbaz laeng caeuq yahgonq seng. Hoeng, de cungj caensim daeuj gyaez gyoengq lwg, mbouj miz maz ca. De caeuq doenghboux daxmeh dox- doengz, hix gig gyaez gyoengq lwg de. Vunzmbanj faen song lwgmaenz ndip hawj doenghboux bae guhhong guh haeuxringz, Yahmoq “gwn aen lwg- maenz daih’it le, mbouj naemj caiq gwn lo, aen lwgmaenz gyang fwngz lumh bae lumh ma cungj mbouj gamj coq haeuj bak bae, caj daengz gyoengqvunz cungj bae guhhong le, de laeglemx dawz lwgmaenz coq daengz ndaw dangzvaq bae, dajsuenq banhaemh dawz maranz faen hawj gyoengq lwg gwn.”

Yahmoq doiq daxmeh “gou” gig ndei. Ranz Goenghgvangh caeuq ranz “gou” doxdoq faq ciengz he, youq gwnz faq ciengz hai miz aen congh hung lumj aen duix he nei. Aen cangz daxmeh “gou” couh an youq bien bakcongh neix, ranz de caeuq ranz gou danghnaeuz aeu doxciq maz doxgaiq iq, couh daj aen congh neix ndenq. Mwh “gou” ngamq okseng seiz, Yahmoq couh dawz vanj souh haeux- yangz ndat he daj aen congh ciengz neix ndenq gvaqdaeuj, hawj daxmeh “gou” bouj ndangdaej. Seizhaenx gungzhoj lai, bya noh cij miz gvaq cieng cij ndaej gwn, bingciengz ndaej gwn vanj souh ndat he suenq ndei lo. De aeu ciengx 9 boux lwg, seizde mbouj miz baenzlai gijgwn, vih mbouj deng dai iek, ciengz caeuq bouxgvan haeuj ndoeng bae cang gaep dwk duzdoengh, caj vunzmbanj ninz ndaek le cij dauqma lienzhwnz cawj gwn. Moix baez cungj mbouj lumz ranz “gou”, cungj daj aen congh neix ndenq vanj raemxdang noh duzdoengh gvaqdaeuj. Vahsug gangj “caencik giz gyae, mbouj yawz ranznden”, caen dahraix ha! De cungj baenzneix haeujsim saeh ranz “gou”.

Yahmoq doiq “gou” gig ndei. Bae guhhong Yahmoq son gou baenz- lawz baenzlawz guh, gou cuengqhag dauqma bungz daengz Yahmoq, de gyae’gyae couh heuh “Daeg’iq”, heuh “gou” bae ranz de gwnz souh, coengzlaiz mbouj heuh coh “gou” gvaq. “Gou” yaek bae hagdangz, Yahmoq raen le doq daj ndaw ranz dawz geij gaiq nohmou ndenq hawj “gou”, hawj “gou” daiq bae hagdangz. Seizde, lij aeu song sam ngoenz cij ndaej am haeux, dingzlai aeu cawj cuk gwn, ndaej miz nohmou engq mbouj vei lo, Yahmoq mbouj rox bae gyawz aeu ndaej, lij miz faenh nohmou soengq hawj “gou” dem, caen dwg gyaez gou lumj lwg bonjfaenh nei.

Yahmoq doiq vunzmbanj gig ndei. Lwgnyez ndaw mbanj doek mboq, baez ndaejnyi de couh boux daih’it diuq roengzbae gouq vunz, gyoengqvunz mbouj gyo’mbaiq de dauqfanj ienq de, de cix coenz vah hix mbouj gangj couh byaij deuz lo, mboujguenj bouxwnq baenzlawz hat de. Ndaw mbanj yaek hwnj hagdangz moq, Yahmoq rox le couh gien 5 fanh maenz ngaenz okdaeuj.

Yawj daengz gijneix, gou fanfub mbouj dingz, Yahmoq ndaw dungx gvangqlangh lumj haij hung nei, mbouj geiq gij saeh rwix vah doeg vunz mbanj doiq de guh gvaq ndaq gvaq. De gwq guh saehndei, coengzlaiz mbouj naemj ndaej maz gizndei doxdauq gvaq.

Daxmeh “gou” hix dwg vunz ndei. Vunzmbanj cungj naeuz Yahmoq dwg “canghlongh” mbouj gamj dep- gaenh, daxmeh “gou” cix daengq “gou” naeuz, gyoengq vunzmbanj cungj gangj vahbyangz ndwi, ranz “dou” caeuq ranz Yahmoq doxgaenh, mbouj ndaej raen de longh fap gvaq. Vunzmbanj menhmenh mbouj caeuq Yahmoq doxdep byaij gyawj, hoeng daxmeh “gou” lij ndaejgeiq gij cingz Yahmoq, song ranz laebdaeb hwnj- roengz baedauq, hawj “gou” caeuq Yahmoq doengz bae guhhong. Daxmeh “gou” yienznaeuz cij dwg bouxguhnaz, cix simndei, de aeu gij hengzdoengh bonjfaenh daeuj son “gou” baenzlawz guh vunz guh saeh. Ndigah, doeklaeng gou gag ndwn hwnjdaeuj bang Yahmoq sij mbaw faenz, Goengdauh doeg mbaw faenz “gou” sij le, gyoengqvunz cij loengh mingzbeg dauqdaej Yahmoq dwg vunz yiengh- lawz.

Goengliuj hix dwg vunz ndei. Youq ndaw sawcuenh, Goengliuj gyonj daeuj okyienh 3 baez, de ronzbyoengh daengx bien sawcuenh, gaenjgaenj dawz gojgaeq doxlienz hwnjdaeuj. Yahmoq aenvih yo aen lwgmaenz yaek dawz dauqranz hawj lwg gwn, mboujliuh cix deng vunz laih naeuz de caeg lwgmaenz, baenzneix couh deng daeuq, caezgya cungj daeuj dub de, Yahmoq miz bak aen bak hix gangj mbouj ndaej cingh lo! Doeklaeng Goengliuj lau de deng dub dai, ndaw ranz gyoengq lwg aiq deng dai iek, couh naeuz Yahmoq dwg cangh- longh rox guh fap, hangz de daiq lai goj deng nanh. Gyoengq vunzmbanj ndaejnyi gij vah neix cij daengx fwngz, Yahmoq cij ndaej lix roengzdaeuj. Goengliuj daeuj nyinhloek, Yahmoq song gvanbaz mbouj miz byawz ienq de, cungj haenh de guh ndaej deng. Baenzneix Yahmoq dwg “canghlongh” gij saeh neix couh itcig deng loek roengzdaeuj lo, de vihliux ndaej lix coengzlaiz mbouj bae fanjbuek, doeklaeng hix gik bae ceng bak.

Yahmoq Aenvih dwg “cangh- longh”, deng vunzmbanj dacaengz bak baeh. Mboujguenj doeklaeng Yahmoq guh geijlai saehndei, cungj dwg yienghneix deng yawjsiuj, daengz de bae le, gingqyienz mbouj miz geijlai boux daeuj bangfwngz. Goengliuj okdaeuj naeuz vunzmbanj, mbouj aeu geiq baenzlai, vunzvunz miz ngoenz dai, baenzneix wnggai cuengq roengz gij saeh gaxgonq bae bangfwngz.

Sawcuenh satbyai sij naeuz “Soengq Yahmoq bae ndoi ngoenz- haenx, fwn dingz lo, mbwn rongh- sagsag, ndit raeujrubrub”, duenh vah neix caeuq haidaeuz duenh vah haenx doxbeij fanjca lai raeuh lo, bouxsij aeu gij dienheiq daeuj yienh’ok gij simcingz vunzmbanj, caen ak. Bien sawcuenh neix hawj vunz yawj gvaq saedcaih nanzlumz.