Lwnh gak boux beixnuengx,

Haibak cuengq sing coenz,

Guhhong caen deng boenq,

Hoeng aeu hauq bohmeh.

Raeuz cungj haeujsim geiq,

Bohmeh ndei daih’it,

Gij doenghgo ndaej did,

Aeu baengh miz ndit dak.

Vihmaz gingq bohmeh,

Bouxgeq lwnh hawj raeuz,

Daj doekfag okdaeuj,

Songde nyaengq gaeuz lwg.

Doegsaw ndaej roxleix,

Daengq raeuz aeu ndaejgeiq,

Raeuz lij caengz okseiq,

Meh geix le gouj ndwen.

Mwh mizndang ndawde,

Meh gizgiz siujsim,

Deng rueg dungx mbouj imq,

Cix vuenheij rim hoz.

Caibak geijlai ndwen,

Dangbouj ywenj nyaenxheiq,

Daengz seng raeuz doekdeih,

Lij feiq rengz cij lwg.

Ngamq seng raeuz okdaeuj,

Meh haeux mbouj nyienh gwn,

Ndang naiq mbouj ndaej hwnq,

Fwngz umj lwg lox ninz.

Seng le youq ndawndwen,

Lwg gwq swenjoen’oen,

Haeujsim ganq baenzngoenz,

Lwg noengq meh cix byom.

Seng raeuz caengz rim ndwen,

Gwen denz roengz din naiq,

Ndangnyieg yaep couh baiq,

Yamqdin byaij mbouj baenz.

Seng raeuz ndaej geij ngoenz,

Ndang yungz baenz daeuhfouh,

Mboujlwnh deng maz souh,

Meh cungj mbouj lwnh bak.

Gyangngoenz mbouj ndaej naengh,

Daengz haemh mbouj ndaej ninz,

Lwg daej sim youh in,

Laeng ing umj lox lwg.

Meh caenhsim bae ndiep,

Baez iek meh couh cij,

Ndaw rungj lwg lij iq,

Bizlolo ndeigyaez.

Siq nyouh youh siq haex,

Beij cae naz dwgrengz,

Gyanghwnz daengz sam geng,

Vanzlij deng cij lwg.

Bwnq cij youh bwnq haeux,

Siq haex nyouh uet myaiz,

Laihnaeuz lwg gag gvai,

Meh geijlai sinhoj.

Uet mug youh uet myaiz,

Uet geijlai gvaqdaeuj,

Bwnq cij youh bwnq haeux,

Haeujsim ganq raeuz hung.

Ok nyouh youh ok haex,

Ngoenz fugsaeh geij baez,

Sinhoj raemxda lae,

Cungj mbouj ndaej yietnaiq.

Siq nyouh youh siq haex,

Mbouj rox gyaez geijlai,

Uet mug youh uet myaiz,

Feiq geijlai saenzheiq.

Doeklaeng menh majhung,

Bwnq gijmaz cungj haengj,

Rox ruenz youh rox naengh,

Umj aemq caenh dwgrengz.

Daengz rox ruenz rox naengh,

Meh haengj youq henz fuz,

Uet mug mbouj yiemz uq,

Buh hinj meh dajsaeg.

Lwg miz saekdi bingh,

Simvueng doq dingh roengz,

Coh yihyen bae soengq,

Lwg ndei cij soengheiq.

Bohmeh hwnz caeuq ngoenz,

Caenh fanzsim feiqheiq,

Faex laux aeu dem ngeiq,

Muengh lwg geiq bohmeh.