Gwnz haw Nazheuj miz daegcoz ndeu, vunz hungsang noh saedgwt. De iq haengj dingq bouxlaux gangj goj Suijhuj、goj Samguek, ngoenznaengz manzgyaengj gyaez gangj ngeihheiq. Caengz ndaej 20 bi couh baenz boux bouxdaeuz gyoengq daegmbauq gwnz haw, vunz heuh de guh Gocieng.

Bohmeh guenj mbouj ndaej de, couh ra daxlungz ndaw budui bang soengq de bae dang bing, muengh de ndaej youq budui gaij giz rwix bae.

Hoeng, duzma gaij mbouj ndaej gwn haex, Gocieng bae daengz budui hix mbouj dingq son’gyauq. De ndangdaej ndei gvaq bouxwnq, hix mbouj lau deng fad.

Miz baez he, Gocieng siengj bae ranz yawj dahyoux, lingjdauj mbouj hawj de cingjgyaj, de couh naemj aen geiqmaeuz he okdaeuj.

Dingjlingz gvaq geij ngoenz budui yaek guh yienjlienh, Gocieng couh cang baenzbingh iugouz youq ndaw rug yietnaiq. Gyoengq doengz- doih ngamq ok bakdou, de couh buet bae caeuq dahyoux doxraen lo! Vansisi guhcaemz sam ngoenz le, de cacaemj dauqbae ninz youq gwnz congz caj gyoengq doengzdoih dauqma.

Vahbyangz ndei dwg ndei, saek seiz rox deng laeuh. Ngoenzhaenx de naengh banci dauq, cingqngamj bungz miz vunz dawz mid ciengj ngaenz! Gocieng hozndat raixcaix, ndawsim ndaq naeuz:“Duzfangz raq neix, gingqyienz dangqnaj gou guh yak, ra dai!” Hwnjbae geij gaemxgienz couh gaemh ndaek vunzrwix caemhcaiq cug fwngz hwnjdaeuj, daengq hawj gyoengqvunz soengq vunzrwix bae baicuzsoj le couh gaenjgip buet ma budui.

Gyoengqvunz gwnz ci cungj yawj ndaej da daengx bae, caj caezgya roxsingj gvaqdaeuj, boux yinghyungz gaemh bouxciengjngaenz gaenq buetdeuz lo!

Gocieng dauq daengz ndaw rug ngamq hwnj congz cang ninz, lenz- cangj hix riengzlaeng dauqma daengz lo, caen yungyiemj ha, ca di couh deng byoengq lo!

Geij ngoenz gvaqbae le, bang vunz he daeuj daengz bakdou budui, roq gyong roq laz, boux baihnaj lij gaem miz mbaw geizman he, gangj naeuz yaek soengq hawj boux gaijfangginh dungzci gaemh boux- ciengjngaenz……

Lenzcangj moengj lo, coh gyoengqde naeuz:“Geij ngoenz neix dou cungj okbae yienjlienh, mbouj miz byawz ndaej haeuj ndaw singz bae, sou gauj loek luba?”

Gyoengqvunz nyengh naeuz:“Dou rox sou gaijfangginh guh saehndei mbouj haengj lwnh coh, hoeng, dou cingq caz cingcuj le cij gamj daeuj ne!”

Lenzcangj naemj yaep he, lumj rox dwg byawz lo, heuh geij boux bing nyengh ram Gocieng okdaeuj.

Gocieng baez yawj aen ciengz- mienh neix, rox mbouj ndei lo, sikhaek naiqniek lumj cingq baenz- bingh nei.

“Dwg lo, dwg lo, couhdwg de lo!”

“Gyoengq beixnuengx ha, sou caen nyinh loeng vunz lo? Dwg gou guh maz ne?” Gocieng lij cang ngawz cam.

Gyoengqvunz dingq le engqgya gamjdoengh, boux gaijfangginh neix caen ndei ha! Vihliux vunzlai mbouj lau yungyiemj gaemh vunzrwix, doeklaeng lij mbouj nyienh aeu mingzdaeuz.

“Couhdwg mwngz.”

“Couhdwg mwngz, dou mbouj rox nyinh loek!”

……

Gyoengqvunz mwngz coenz gou coenz hemqsiegsieg.

Lenzcangj dinghdwd yawj coh Gocieng. Gocieng sim diuqbubbub, gag naemj:“Mbatneix dai dahraix lo!”

Doeklaeng Gocieng ndaej laeb samdaengjgoeng, mbaw ciengjcang ngamq fat daengz fwngz mbouj geij nanz, de couh deng lenzcangj gyaeng sam ngoenz, youq ndaw rug mbouj ndaej gwnndoet doxgaiq. Gocieng caen simfanz lo, dauqdaej guh simndei deng mbouj deng ne?

Gvaq le haujlai bi, ndaw budui lij cienzgangj aen goj neix ne!