Cingsih aen hawyw duenngux Bouxcuengh dwg aen hawyw cojcienz ndeu, moix bi seizhah youz vunz dangdieg gag doxcomz baenz haw, hix dwg ngoenzciet hungmbwk vunzlai camgya cienz vwnzva yw Bouxcuengh、fuengz bingh hawj ndang ndei, dwg doenghgij sibgvenq gag baenz miz geij bak bi nanz lo.

Hawyw duenngux dwg doengh- gij sibgvenq yw minzcuz daegsaek Cingsih gag miz, aen hozdung neix youq Ciuhdangz Ciuhsung hainduj, youq Ciuhmingz Ciuhcingh hwng- hoengh.

Aen hawyw neix moix bi liggaeuq ngux nyied cosam baedauq baenz haw, ngux nyied co’ngux ceiq hoengh, caemhcaiq baenz haw daengz cocaet、cobet. Youq duenh duenngux, doenghboux ndaem yw gai yw、 doenghboux canghyw Boux- cuengh daj gak mbanj gyawj Cingsih daeuj, doenghboux canghyw ndaw- biengz caeuq vunzlai daj Dwzbauj、Nazboh、Denzdungh、Denzyangz、Yougyangh Gih、Denhdwngj、Dasinh vanzlij Yinznanz Swngj、rogguek Yeznanz daengj daeuj haenx baenz bang baenz gyoengq, aeu ci rag mbaq gwed, dawz gak cungj ywdoj daeuj daengz yienhsingz Cingsih gai. Mizseiz doenghgij dan gai yw miz daengz 4000 lai aen, gak cungj yw miz daengz 1000 lai cungj, vunz ganj haw miz daengz 2 fanh lai vunz. Baenzneix aen hawyw neix baenz le ciengz hozdung baijok nem gaicawx ywdoj ceiq hungmbwk haenx, hix baenz gizdieg hung hawj vunz ndawbiengz doxgyau gingniemh gvendaengz dajndaem yw、gaicawx yw、ywbingh daengj.

Ciuq cam rox, mwh duenngux ywdoj go hung mbaw laux, yw rengz haenq, yw bingh lai ndei; vunz cienz naeuz ngoenzneix byaij gvaq ndaw haw suphaeuj heiq lai cungj ywdoj le couh ndaej fuengz bingh. Hawyw youq banringz ceiq hwnghoengh, vunz miz baenz geij fanh bae. Youq gwnz hawciengz, mboujdan miz gaicawx, vanzlij miz vunz doxgyau gingniemh yw Bouxcuengh, cienz cihsiz yw Bouxcuengh, doxvuenh ceh ywdoj, doxgangj baenzlawz ndaem goyw ganq goyw. Cawz le miz hawyw cojcienz, youq mboengq ciet hawyw, dangdieg lij banh hozdung yienj haujlai cezmuz miz daegsaek Boux- cuengh noengzna, nauhyied dangq- maz.

Cingsih aen hawyw duenngux Bouxcuengh dwg cungj siengqingj iq ndeu ndaej yawjraen doenghgij sibgvenq cojcienz gvendaengz vunz Bouxcuengh dangdieg dajndaem guh seng’eiq, hix dwg cungj vwnzva yw Bouxcuengh cojcienz seizneix lij miz haenx.

Bi 2007, Cingsih aen hawyw duenngux Bouxcuengh ginggvaq Gvangjsih Bouxcuengh Swcigih Yinzminz Cwngfuj doengzeiq, ndaej senj haeuj daih’it buek swcigih gaep feihvuzciz vwnzva yizcanj mingz- loeg.