De seng youq ndaw lueg, maj youq ndaw lueg. mbanj de youq laj bya, seiqlengq deng bya sang humx dwk. Daj gwnz dingjbya yawj roengz ranzmbanj, ranzmbanj lumj aen gumz hung ndeu nei, daj ranzmbanj yawj coh dingjbya, dieg ranzmbanj lumj aen cingj ndeu, “daej cingj” gaeb raeuh, cij miz cibgeij ranz vunz.

Dieg neix conq namh bengz gvaq conq gim, cij miz reih mbouj miz naz. Bi daengz byai cij ndaem ndaej haeuxyangz、lwgmaenz、lwgbiek doenghgij gwn neix, gijneix lij dwg ndaem youq geh rin. Gizneix caek- raemx beij caekyouz dij cienz, bat raemx ndeu yungh sam giz: Swiq byaek, swiq din, gueng doenghduz.

Ranz ndaw mbanj cienzbouh dwg ranzfaex, moix aen ranz cungj miz sam caengz. Caengz laj gyaeng doenghduz, caengz ngeih vunz youq, caengz sam coq haeuxgwn. Caengz laj aeu rin humx guh ciengz, caengz ngeih、caengz sam aeu benj humx. Rugninz hix dwg aeu benj daeuj humx, moix aen rugninz gwnzdieg hai aen congh ndeu, aen congh neix miz ga haiz vunzhung baenzneix hung, hawj boux- vunz ok haex ok nyouh roengz caengz laj bae. Ndigah daengx mbanj mbouj miz ranz lawz daengj diengzhaex. Gij haex doenghduz caeuq haex bouxvunz doxgyaux, heiqhaeu daj geh benj gwnzdieg bongh hwnjdaeuj, loemz dwk bouxvunz gyaeuj ngunh caez.

Cungj ranz neix seizhah duz- nyungz duz nengznyaen gig lai. Seizhah de deng duznyungz haeb, cienz ndang dauqcawq dwg nwnj, gig humznyap. Seizdoeng cungj ranz neix dangj mbouj ndaej rumznit. De haemz youq cungj ranz neix, daj de roxsoq le, ciengz youq dangqnaj daxboh ienq naeuz cungj ranz neix mbouj baenz youq. Moix baez daxboh de couh naeuz:“Roengzrengz doegsaw couh miz ranzlaeuz youq lo.”

Coenz vah daxboh, de mbouj rox dwg caen dwg gyaj, hoeng, vih ndaej youq ranzlaeuz, de gig haenqrengz doegsaw.

Siujyoz bizyez bihaenx, de gauj ndaej gig ndei, ndaej bae hagdangz cungdenj ndaw yienh doegsaw. Daxboh de ndawsim maedmaed angq, hoeng de mbouj oksing, cij naeuz “roengzrengz doegsaw couh miz ranzlaeuz youq”.

De geiq coenz vah daxboh youq ndawsim, engqgya roengzrengz doeg- saw, doeklaeng gauj ndaej hwnj gauhcungh cungdenj ndaw singz. Boh de angq raixcaix, hoeng, de mbouj oksing, lij dwg coenzvah haenx——“roengzrengz doegsaw couh miz ranzlaeuz youq”.

Suzse gauhcungh miz diengz- haex, ok haex ok nyouh hai raemx baez cung, mbouj louz saekdi heiqhaeu, youh fuengbienh youh seuqcingh, ndawsim de gag haenh.

De coengmingz youh gaenx hag, mehmbwn bang boux gaenx. Doek- laeng de gauj hwnj dayoz ceiq mizmingz ndaw sengj. Sou ndaej luzcij dunghcihsuh ngoenzde, ceiq vuenheij dwg daxboh de, daengxngoenz naj riunyumnyum, yaephe ciengq go, youzbyaij ndaw mbanj geij hop, vunzmbanj raen de bak riu ndaeng riu, couh cam miz maz saehndei? Daxboh de angqvauvau naeuz:“Lwg gou gauj ndaej hwnj dayoz lo.”

Yamq haeuj dou hung dayoz ngoenzde, de engqgya cingcuj de yaek aeu maz, gij maqmuengh de seiz mbouj seiz youq dangqnaj de, lumjbaenz ietfwngz couh gaem ndaej nei. Seizheiq de ndei lai raeuh, de dayoz bizyez bihaenx, guekgya lij bau hawj gunghcoz, neix dwg bi doeksat. De ndaej youq ndaw sing gunghcoz lo.

Danvih miz suzse hawj de youq, hoeng, de yiemz aen suzse ngamq miz 10 lai bingzmij, gaeb lai, ndigah mbaet gwn mbaet yungh 4 bi, rom ndaej ngaenz youq ndaw singz cawx dauq ranz miz song rug song ding ndeu. Yienznaeuz dwg daigvanj cawx, hoeng suenq de ak lo, de baengh bonjfaenh gag cawx ranz, gyoengqdoih de mbouj miz byawz baenzneix ak. Seizde cawx ranz le mbouj miz maz ngaenz lw, de genjdanh cang ranz le couh haeujbae youq lo.

Yienznaeuz aen ranz neix caeuq aen ranz ndawsim de maqmuengh haenx ca ndaej lai, hoeng de rox maz heuhguh “dag ndang caiz buh”. Ceiq youqgaenj dwg, seizneix miz dahsau unqswnh he caeuq de damzyoux, de couh baenzranz lo. Baenzranz le, de naeksim bae guhhong. Bouxvunz de bak gvai gaenx guh, maz hong cungj guh ndaej ndei. Mbouj geij bi, de couh ndaej dang bouxdaeuz lo. Dingjlingz, seizneix daeglwg de okseng, song heij doxdaengz, angqyangz fouzbeij.

Bouxlaux daeuj bang dawz nyez, aen ranz neix couh miz di caenx lo, aen maqmuengh ndawsim de youh daeuj gauxca de lo, hoeng de rox seizneix lij dwg fwngz raez genbuh dinj, cijndei mbaet heiq mbouj oksing.

Cingq youq seizneix, cangh- guhranz daeuj ra de saemjbae diegnamh ndeu, diegnamh neix yaek dawz daeuj daengj ranzbezsu. De dwg gvan doeksat, canghguhranz ndenq caizliu hawj de seiz, youq goekrwz de gangjsebseb. De najlaep naeuz:“Caizliu ce youq neix gonq, gaenlaeng gou menh cim, mwngz baema gonq.” Canghguhranz ngaekgyaeuj gungj hwet okdou bae lo.

Gij caizliu neix, de cim baez dem baez, dawz mbouj dingh cawjeiq, laebdaeb geij ngoenz de naj laep naj nyaeuq. Seizde simcingz de couh lumj lwgnyez siengj gwn bya nei, gyaez gwn youh lau gangjbya gaz hoz. Ngoenzde, de fwngz ndeu gaem bit, fwngz ndeu gaem caizliu, lawq yaep ndeu le, de gag naeuz:“Dai dangq viz!” De hawj canghguhranz hai “daengloeg” lo.

Song bi gvaqbae le, ranzbezsu daengj baenz lo. Canghguhranz gangj daengz guh daengz, caen dawz yaekseiz aen ranzbezsu daeuj hawj de. De fwngz gaem gaiq yaekseiz, roxnyinh beij dozcaengh lij naek. De caiq lawq yaephe, saedcaih nyaenx mbouj ndaej couh bae yawj ranz moq lo.

Ranzbezsu, moix ranz miz aen suen, aen rangh aen, moix aen ranzbezsu cungj miz 3 caengz, rog ciengz cungj cang doxdoengz, ciengz henj vax nding, gig gyaeundei.

Baez hai dougyok, song da de ronghragrag: Ndaw suen bu namhbeiz, ndaem miz doenghgo, ngamq ndaem ndwi, gomiuz iq lai, yawj mbouj ok dwg gofaex roxnaeuz gova. Ndaw suen lij miz liengzdingz、 byagyaj、roen iq. Ga roen iq hopheux dwg aeu rinraiq daeuj caep baenz. Aen suen neix hawj vunz simsangj sim’angq, seizneix de cij riunyumj.

Baez hai douranz, sim de fwt diuqbubbub, ndaejnyi sing diuq caez. Ndaw ding cang ndaej gyaeundei raixcaix, gij daeng aen hung aen iq ronghsagsag. De youq ndaw ding baenqcienq song hop, gizneix yawj- yawj, gizhaenx lumhlumh, seiz mbouj seiz aeu fwngz at bakaek, dawz aen sim yaek diuq ok conghhoz at dauqbae. De gag ngeix: Aen ranz ndawsim gou maqmuengh dauqdaej miz lo. Aen ranz gyaeundei neix mbouj ca yiengh lawz, cij aeu buen huq yungh daeuj couh goj youq lo.

Ngoenzde, de daiq mehyah daeuj yawj ranz moq, mehyah de baez raen doeksaet yat, naeuz:“Aen ranz neix caen duh raeuz? Mwngz seizlawz cawx ranz moq gou cungj mbouj rox ne? Hix mbouj raen mwngz dwen gvaq saek coenz.” De han naeuz:“Gou daeg- daengq hawj mwngz doeksaet.” Mehyah de youh naeuz:“Bak mwngz maenh bw! Danghnaeuz mwngz youq rog miz yahnoix gou caemh mbouj rox nw.” “Gangj maz vah ne?” De gangj sat daengx mehyah de, mehyah de cix hehe riu dwk.

Daengx ranz vunz angqangq yangzyangz buen haeuj ranz moq bae. De ciep bohmeh daeuj caemh youq, daxboh de raen aen ranz baenzneix gyaeundei, gig sim’angq, daekeiq dwk naeuz:“Daxboh gangj mbouj loeng ba? Roengzrengz doegsaw couh miz ranz gyaeundei youq!” De dap naeuz:“Deng! Deng!”

Hoeng, daj de buen haeuj ranzbezsu youq le, cungj ninz mbouj ndaek. Mwhgonq de gyaeuj baez bungq swiz couh ninz gyaenfofo, seizneix baenzhwnz fan bae fonj dauq ninz mbouj ndaek, de gig simnyap.

Mehyah de ra ndaej gak cungj “yw maedfueng” hawj de gwn, cungj mbouj raen ndei, ywdoj hix gwn haujlai gvaq caemh mbouj miz yungh, gij bingh ninz mbouj ndaek de gig lanhgyaeuj. Baez nanz, de mbouj miz saekdi cingsaenz, daengxngoenz naiqnoknok, byoem dingjgyaeuj hix loenq yaek liux lo. Gij yiengh de, vunzranz yawj le, gip youq ndaw da in youq ndawsim, hoeng, youh mbouj rox baenzlawz guh.

Miz ngoenz ndeu, daxboh doiq de naeuz:“Gou caeuq meh mwngz yaek dauqbae ndaw lueg lo, ranzcoj mbouj miz vunz ganq, lau doemq roxnaeuz hwnj nywj.” De naeuz:“Mbouj hawj sou dauqbae, youq neix caeuq dou caemh gwn caemh youq, sou yaek gyaeu ndaej geijlai bi dem?” De caensim caen’eiq hah bohmeh youq.

Hoeng, song laux mbouj nyienh youq, itdingh aeu dauqbae. Daxboh yaek dauqbae seiz, vah naek cingz laeg doiq de naeuz:“Lwg ha, lauxsaed guh vunz cij miz saedceij ndei gvaq!” De maedmaed ngaekgyaeuj mbouj oksing. Song bi neix daeuj, gig lau miz ngoenz deng caz, coenz vah daxboh hawj de singj lo.

Doeklaeng de hawj dauq aen ranzbezsu hawj canghguhranz, dawz cawjranz mingzcoh ranzbezsu gaij guh mingzcoh canghguhranz. De sam bohmehlwg buen dauq ranz iq song rug song ding youq.

Gangj daeuj caen geizheih, baez buen dauq ranz gaeuq, de couh ninz ndaej ndaek lo, gyaeuj baez bungq swiz couh ninz caem, gij bingh de mbouj yw gag ndei. Mehyah de naeuz:“Mwngz caen goetcienh.” De dap naeuz:“W! Caen dwg goetcienh!”

Bouxvunz guh loeng saeh, dauqdaej deng fad. Bi daihngeih de deng roengzmbaek dahraix, youh bienqdauq baenz bouxhong bingz- ciengz ndeu.

Canghguhranz raen de deng roengzmbaek, ndaejgeiq de bang gvaq bonjfaenh, couh dawz yaekseiz ranzbezsu hawj de moq, naeuz:“Aen coh cawjranz dwg gou, aen ranz hawj mwngz youq.”

De ngauzgyaeuj naeuz:“Mbouj lo.”