Fuzbinz ganbu Mungz Siujfungh geij ngoenz neix hwnzngoenz ninz mbouj ndaek, de vih fuzbinz duisieng guh haujlai hong, hoeng cawjranz bouxgungz Siz Liengz gwnz naj cungj dwg saepsapsap, lumj lwggwz deng nwi nei, daeglwg de Siz Li baez raen de couh ndoj. Mungz Siujfungh mbouj rox dauqdaej bonjfaenh lij miz maz guh mbouj ndei dem?

Mungz Siujfungh lwnh gij saeh hawj mehyah Vangz Li, Vangz Li guh lauxsae, de ndaejnyi le mbouj gangj maz, cij simdingh naeuz:“Gou caeuq mwngz itheij bae ranz Siz Liengz yawjyawj, lauheiq gou ndaej bang- fwngz.”

Baenzneix, ngoenzsinghgiz ndeu, song gvanbaz daeuj daengz ranz Siz Liengz. Daeuj daengz bakdou ranz SizLiengz seiz, cingqngamj yawjraen Siz Liengz youq bakdou dak ndit, daeglwg de Siz Li youq lajroq sij cozyez. Yawjraen miz vunzseng daeuj daengz, Siz Li sikhaek ndwn hwnjdaeuj yaek buetdeuz. Vangz Li riu naeuz:“Siz Li, mwngz ndei ha, lauxsae yawj ndaej ok, mwngz itdingh dwg boux lwgnyez roxsoq caemhcaiq gaenx hag, rox gag guh cozyez bw!” Gangj dwk Vangz Li iet fwngzmeh hwnj. “Lauxsae?” Siz Li baez ngaez yaep ndeu, najmong lo, mbouj rox baenzlawz guh cij ndei.

“Gou dwg mehyah Aumungz mwngz, youq ndaw singz guh lauxsae. Daeuj, lauxsae yawjyawj mwngz guh cozyez ndaej baenzlawz yiengh.” Gangj dwk, Vangz Li couh yawj gij cozyez Siz Li sij. Siz Li caengz sij sat, Vangz Li couh heuh Siz Li naengh roengzdaeuj, caeuq de itheij guh cozyez. Guh cozyez liux, Vangz Li caeuq Siz Li gangjgoj, camcam de youq hagdangz hag ndaej ndei mbouj ndei, youq ndaw ranz gvaq ndaej baenzlawz yiengh, lij cam Siz Li caeuq doengzdoih bingzseiz bae gyawz guhcaemz, de ceiq gyaez guh maz. Siz Li hainduj sing han saeqsisi, doeklaeng sing yied daeuj yied hung, caeuq Vangz Li gangj le haujlai nanz, gangj daengz giz ndeiriu, de lij riuhaha hwnjdaeuj. Cawjranz Siz Liengz ngoenzneix hix daegbied sim- angq, bingzciengz naj saepset, seizneix cix naj maez lumj dujva hai nei.

Seizneix, Mungz Siujfungh nyengh lo, de mbouj rox daengz aen ranz neix geij lai baez lo, bang dauj ranznamh hwnq ranzlaeuz, buet hwnj buet roengz bang song bohlwg neix banh dihbauj, Siz Liengz song baez haeuj yihyen, de hix ciengzseiz bae damq. Hoeng, Siz Liengz cungj dwg baenzneix naj you naj saep, daeglwg de Siz Li raen de couh buetdeuz, mbouj caeuq de gangj gvaq saek coenz vah. Vihmaz mehyah Vangz Li baez daeuj, songde couh bienq yiengh ne?

Doeklaeng Siz Liengz gangj vah, Mungz Siujfungh cij rox. Cij raen Siz Liengz bekbek aen mbaq Mungz Siujfungh naeuz:“Ngoenzneix Vangz lauxsae daeuj son daeglwg gou guh cozyez, caeuq de gangjgoj, raen de baenzneix vuenheij, gou hix simhai!” O! Siz Liengz guh le song baez soujsuz, ndaw ranz mbouj lw maz cienz lo, mehyah de mbouj nyienh gwn hoj couh buetdeuz lo. Fuzbinz ganbu daeuj bangfwngz haujlai, bienq ranz- namh baenz ranzlaeuz, song baez guh soujsuz ndaej bauqsiu, miz dihbauj gij ndwenngoenz song bohlwg lij gvaq ndaej bae. Saedceij ngoenz doek ngoenz bienq ndei, hoeng daj daxmeh buetdeuz le, Siz Li couh bienq yiengh lo, mbouj gyaez gangj vah, ndaw ranz mbouj miz densi, moix ngoenz cuengqhag de couh buet daengz ranz bohlungz yawj densi, caih byawz heuh cungj mbouj leix, seizneix Siz Liengz ceiq yousim daeglwg Siz Li lo.

Mungz Siujfungh rox lo, fuzbinz mboujdan bang bouxgungz gaijgez gij gunnanz gvaq ndwenngoenz, lij aeu gaijgez gij saehsim, hawj bouxgungz miz maqmuengh. Baenzneix gij saeh Siz Li yaek baenzlawz gaijgez ne? Vangz Li rox nai de naeuz:“Bangcoh Siz Li, gij saeh neix gou daeuj bang mwngz!” Ma daengz hagdangz, Vangz Li lwnh gij saeh Siz Li hawj gyoengq hagseng, cam gyoengq hagseng baenzlawz bae bang. Gyoengq hagseng cungj nyinhnaeuz: Fwngz hung yien fwngz iq, soengq raeujrub caeuq gij gyaez hawj Siz Li.

Yienghneix, caezgya couh ning hwnjdaeuj lo. Roenbya gumzgamx, rumznit bongj raeuh, cix dangj mbouj ndaej gij simndei caeuq gij yiedsim caezgya. Geij aen ci hai haeuj aen mbanj ndaw lueg, gwnz ci naengh miz Mungz Siujfungh Vangz Li song gvanbaz, miz gyoengq hagseng caeuq bohmeh hagseng. Ndaw ci, daeh miz aen densi caeuq cezsouhgi densi, baenzneix Siz Li couh mbouj aeu ngoenzngoenz buet bae ranz bohlungz ngonz densi lo. Gwnz ci, lij cang miz haujlai huq soengq hawj Siz Li. Gyoengq hagseng hawj Siz Li doeg saenq gujli de, ciengq go diuq foux, sing go sing riu, yinx daeuj gyoengq vunzmbanj cungj daeuj yawj. Siz Li caeuq gyoengq hagseng Vangz Li itheij guhcaemz gangjriu, gaem fwngz doxgot.

Daj daxmeh de mbouj aeu de, gag buetdeuz le, Siz Li caengz ndaej lumj ngoenzneix baenzneix simhai gvaq. De naeuz, Vangz lauxsae couh lumj daxmeh, de majhung le itdingh aeu byaij okbae, bae yawj Aumungz caeuq Vangz lauxsae, bae yawjyawj gyoengq doengzhag, bae yawj gij seiqgyaiq engq gvangqlangh, doeklaeng goj hix aeu lumj Vangz lauxsae caeuq gyoengq doengzhag nei rox bae bang engq lai vunz.

Siz Liengz gikdoengh ndaej gangj mbouj ok saek coenz vah, doq daejsaekwk doq haibak ciengq:

Ciengq souj go rwenz hawj dangj dingq,

Ciengq ndaej bouxboux sim

caenh vuen.

Ndaw ranz gunnanz ci rumzbaek,

Ci ndaej gwnz gyaeuj in youh get.

Gungcanjdangj caen lumj daeng- ngoenz,

Dak daengz gizlawz gizlawz rongh.

Cwngfuj fuzbinz loh ronghsag,

Bouxboux angqyangz miz maq- muengh!

Gyoengqvunz dingq le cungj bekfwngz rubrub, Mungz Siujfungh yawj coh mehyah Vangz Li, riu lo.