Dingjgajvah Mauznanzcuz dwg cungj doenghyiengh gyaeundei aeu fwngz san baenz, hix dwg cungj doxgaiq bingzciengz doenghboux mehmbwk Vanzgyangh Mauznanzcuz Swciyen aeu daeuj dangj fwn. Vunz Mauznanzcuz heuhguh“dingjgajvah”, eiqsei dwg“youq laj gyaep san va”.

Dingjgajvah dwg aeu duk go- ndoekgim caeuq gocukndaem san baenz. Miz haujlai daegdiemj, bau- gvat san ndaej saeqnaeh, raizva ndeiyawj, yiengh gyaep hung ndei, duk maenh yungh nanz.

Gangjdaengz dingjgajvah, dang- dieg miz aen gojgaeq cienzgangj ndeu. Haujlai nanz gaxgonq miz daegmbauq ndeu, dwg bouxak dajsan. De bae daengz gizlawz couh aeu faexcuk dangdieg san doxgaiq gai, de baengh neix ra gwn. Miz ngoenz ndeu, de daeuj daengz bya mbanj Mauz- nanzcuz, ndawde dauqcawq miz go- ndoekgim caeuq gocukndaem, de raen miz baenzneix lai faexcuk, angq lailai, couh raemj geij go faexcuk, hwnz lienz ngoenz san baenz aen dingjgajvah ndeu. Ngoenz daihngeih, de angqvauvau dwk daenj dingj- gajvah hwnj bya bae raemj faexcuk. Seizhaenx gwnz bya lij miz dahsau Mauznanzcuz ndeu cingq raemj faexcuk, dah neix hix dwg bouxak dajsan. Mbouj gvaq yaep ndeu, sawqmwh fwn doek lo. Daegmbauq raen dahsau mbouj miz maz dangj fwn, soh ndenq dingjgajvah hawj dahsau daenj le dangj fwn. Dahsau rox gag daenj mbouj ndei, couh caeuq daegmbauq doengzcaez daenj. Fwn daengz le, dahsau sawqmwh raen laj gyaep miz raizva gig ndeiyawj, doeksaetyat angq naeuz:“Dingjgajvah gyaeundei dangqmaz!”Daengzlaeng, songde baenz gvanbaz lo. Miz bouxgvan coengh le, boux mehmbwk Mauznanzcuz haenx san dingjgajvah ndaej lai ndei raeuh bae. Daj neix hwnj, dingjgajvah couh cienzlah doh doengh mbanj Mauznanzcuz lo. Doenghboux mehmbwk Mauznanzcuz dawz dingjgajvah dangguh doengh- yiengh vuenyungz gyaeundei.

Gij dinfwngz dajsan dingjgajvah Mauznanzcuz labcab lai, dingzlai baengh canghsan geq bak son fwngz gyauq cienz roengzdaeuj. Seizneix youq Vanzgyangh doenghboux rox san dingjgajvah yied daeuj yied noix lo. Hoeng, lij miz bouxak haenqrengz swnjcienz cungj dinfwngz neix roengzbae. Dangqnaj, aen yienh neix miz boux ndeu heuhguh Danz Sugenh dingjguh cungj dajsan neix gaenq ndaej 20 lai bi lo, de baenz le guekgya gaep feihvuzciz vwnzva yizcanj daibyaujsing mingzloeg（din- fwngz dajsan dingjgajvah Mauz- nanzcuz） bouxswnjcienz daibyaujsing ndeu. Seizneix, de bak son fwngz gyauq, cienz cungj dinfwngz neix hawj dahlwg heuhguh Cinz Minj de, maqmuengh de swnjcienz doenghgij dinfwngz dajsan dingjgajvah Mauz- nanzcuz roengzbae.

2011 nienz 5 nyied 23 hauh, dinfwngz dajsan Dingjgajvah Mauz- nanzcuz ginggvaq Gozvuyen baecinj, ndaej liedhaeuj daisam buek guekgya gaep feihvuzciz vwnzva yizcanj gya- gvangq mingzloeg.