Daegvaz ndaep aen soujgih, ndawsim nyapswdswd.

Banhaet, Daegvaz youq henz dah cetbyaij lienhndang, maij yawj va hai roeg heuh, mizyinx sisi. Sawqmwh, aen soujgih yiengj lo. De baez ciep dingq, ndaejnyi gij sing Auseiq, de doq miz di hozhwnj, bakcumh cam:“Miz maz saeh ha?” Auseiq naeuz:“Gou yaek daeuj ranz mwngz.” Daeg- vaz ngamq siengj naeuz ngoenzneix mbouj ndaej hoengq, heuh de gaej daeuj lo. Mboujliuh Auseiq ciep naeuz:“Seizneix gaenq naengh youq gwnz banci, diemj lai cung dem couh daengz ranz mwngz lo.” Daegvaz mbouj caiq mizsim cetbyaij, de cienq ndang din naekgyumgyum byaij maranz.

Boux Auseiq neix, caeuq Daeg- vaz caemhcoj, suenq dwg banboh Daegvaz. Auseiq dwg boux vunz lauxsaed ndeu, vunzmbanj okrog bae dajgoeng fodfod, de cix maeuq youq ranz lauxlaux saedsaed guh reihnaz, lauxlaux saedsaed aeuyah senglwg. Baez seng couh seng song dah song daeg 4 boux lwg. De vunz mazmwnh, guh reihnaz hix mbouj rox dajsuenq, caenh lumj duzvaiz nei goedgaex okrengz. Song gvanbaz guh dai guh lix, cij cengqgengz ndaej ciengx 6 aen dungx.

Doeklaeng, baihgwnz hai aen cangjcaqdangz ndeu, heuh gyoengq nungzminz ndaem oij, Auseiq hix riengz ndaem oij. Bi daih’it, ndawranz couh ndaej miz haeux gwn imq, bi daihngeih couh miz di cienzrom lo. Ngamq yiet ndaej gaemz heiq ndeu, byawz liuh, ngoenznit doek fwnraq, ranzbyaq deng rumz gienj, mehyah Auseiq sawqmwh baenz binghnaek, gij cienzoij lw haenx dawz bae yw bingh cungj mbouj gaeuq, lij noix song fanh maenz. Auseiq cij ndaej dauqcawq bae ciq cienz. Doenghbi haenx, lajmbanj ranz lawz cungj mbouj fouq, Auseiq naj riuhehe, ndaekgyaeuj saxbaiq, ranzgwnz ciq geijcib, ranzlaj ciq geij bak, cij caeuqyawx ndaej fanh maenz, lij ca fanh maenz dem, bae gyawz ra ya? Auseiq fwt ngeix daengz Daegvaz. Daegvaz doeg daihhag bizyez le, faenboiq ma yienhsingz hwnjban. Auseiq hix rox, Daegvaz camgya gunghcoz ngamq 3 bi, gunghswh hix mbouj lai, caiq gangj de ngamq aeuyah, ndaw fwngz mbouj miz lai yawz, hoeng baenzlawz gangj, ngafaex cungj loet gvaq go’em, Auseiq caenh ndaej ra de lo.

Mwhde, Auseiq daeuj ranz Daegvaz, Daegvaz saeknaj saep lumj mbawbyaekroz. “Auseiq ha, gij gunghswh gou ngamq gaeuq gwn, mbouj lw saek faen dem lu, gou hix siengj ciq hawj mwngz, hoeng……” Daegvaz mbehai song fwngz, ngauz- gyaeuj sigsig. Mehyah Daegvaz ndwn youq henz ndang, riunyumj naeuz:“Yw bingh youqgaenj, ciq hawj Auseiq gonq.” Daegvaz hozgaek naeuz:“Bae gyawz aeu cienz?” Mehyah de naeuz:“Gij cienzrom cawx densigih caeuq binghsiengh, ciq hawj Auseiq gonq.” Vih gienh saeh neix, Daegvaz daengz seizneix lij aeuqheiq.

Daegvaz hai dou haeuj ranz, mehyah cingq sauq ranz nyaengq- foedfoed, raen de saeknaj mbwng- yaeng’yaeng, couh cam:“Guh maz lo, ngoenzneix mbwn’gvengq ronghcingx, gwnz naj mwngz baenzlawz fwjbumz ngaungau ya? Daegvaz hozndat naeuz:“Gaej dwen lo, Auseiq yaek daeuj ranz lu.” Mehyah geizheih cim Daeg- vaz:“Auseiq daeuj ranz mwngz nyap maz?” Daegvaz naeuz:“Mwngz lumz la, de lij yiemqcaiq raeuz 5000 maenz.” Mehyah riu naeuz:“Yawj mwngz, 5000 maenz hawj mwngz baenzlai sim in, ranz raeuz hix mbouj noix 5000 neix.” Daegvaz naeuz:“Byawx rox de baezneix daeuj dwg mbouj dwg youh ciq cienz?” Mehyah nai naeuz:“Gij lwg de seizneix hung lo, mbouj itdingh dwg ciq cienz ne.” Daegvaz naengh gwnz sahfaz, song da ngaezngwdngwd.

“Auseiq yaek daengz luba, gou bae cawx di byaek ma dakdaih de.” Mehyah riuj swxbyaek yaek okdou. Daegvaz hozgaek naeuz:“Cawj vanj faenj couh ndaej lo, guh baenzlai guh maz. Mehyah riuriu naeuz:“Vunz baenzlai nanz cij yamq haeuj ranz raeuz saek baez, mbouj hawj gwn donq ndei he, cienz hawj vunzmbanj rox, mbouj riu mwngz ged ha?”

Mehyah okdou le, Daegvaz lij dungx fanfoedfoed. Auseiq caeuq de ciq cienz seiz naeuz bilaeng couh boiz. Byawz rox, ciq gaeq hawj nyaen, ciq bae mbouj rox dauq, gvaq geijlai baez bilaeng lo, diuz bwn gaeq cungj mbouj raen. Gvaq 5 bi le, cij lumj yiengz ok haexnaed nei, gek song sam bi cij boiz saek cien. Mbouj boiz cixbah lo, gvaqlaeng youh yaek daeuj ranz ciq cienz.

Bihaenx, Auseiq riuj song daeh lwgsawzndip daengz ranz, naj nyaeuq- nyatnyat, riumbw naeuz:“Caen doiq mbouj hwnj lu, 4 boux lwg cungj yaek doegsaw, ciq dwk daemdaenx lo, cungj ciq mbouj ndaej saek faen, cij ndaej ra daengz mwngz lo. Caiq ra mbouj ndaej cienz, gou couh mbouj hawj gyoengq lwg hwnjhag lo. Daegvaz najlaep ngaungau, ngamq yaek oksing, meh- yah de gaenq riuhehe naeuz:“Dwg ha, lwgnyez mbouj doegsaw couh nguh baenz seiqvunz lo. Auseiq mwngz gaenj yungh cienz, couh ciq hawj de ba.” Naeuz sat, doq haeuj rug bae aeu 3000 maenz oet hawj Auseiq. Daegvaz aek in lumj cax heh. Byawz liuh, ndaej gwn deihdeih daeuj, ngoenzneix, Auseiq youh daeuj ranz, mbouj dwg ciq cienz dwg guh maz.

Dingdung！Aen lingzdou sawq- mwh yiengj, Daegvaz doeksaet yat, hoeng de daegdaengq ngaiznyed cij hai dou. “Ninz ndaek la, baenz nanz cij haidou?” Raen mehyah cawx byaek dauqma, Daegvaz soeng gaemz heiq ndeu.

Mehyah riugekgek naeuz:“Cawx duz gaeqdoj ndeu, bizbwdbwd, Auseiq ngah gwn byaseng, lij cawx duz byavanx ndeu, hawj mwngz caeuq Auseiq soengq laeuj.” Daegvaz ndaw hoz ngeix: Gou lij yiemqmbw Auseiq daeuj ranz, de dauq angqvauvau lumj ciepdaih hekgviq nei.

Dingdung! Lingzdou youh yiengj. Daegvaz mingz rox dwg Auseiq, lij gyajswz cam vah:“Byawz ha?” Baihrog vunz han:“Gou, Auseiq la.” Daegvaz naeuz:“Caj yaep he.” Bak naeuz ndang mbouj doengh. Mehyah de gaenq riengjret byaij bae hai dou lo.

Rog dou, Auseiq song fwngz riuj rim doxgaiq, de ndaekgyaeuj gungj- hwet, yaemhywx mbouj gamj yamq din haeuj dou, naeuz:“Gou duet haiz menh haeujbae.” Mehyah Daegvaz najriu lumj rumzcin, sing sepsadsad naeuz:“Mbouj yungh duet haiz, Auseiq. Haeujdaeuj! Haeujdaeuj!”

Caj Auseiq naengh roengzdaeuj, Daegvaz naeuz:“Auseiq, mwngz daeuj couh daeuj lo, lij daiq doxgaiq guh maz.” Auseiq riu naeuz:“Hix mbouj miz doxgaiq lai, haeuxyangz dwg ndaw reih gag ndaem, gaeqdon dwg ndaw suen gag ciengx.” Doeng cej sae cej yaep he, Daegvaz hix ra mbouj ok vah lawz caeuq Auseiq gangj lo, Auseiq hix dwg boux vunz bakmwt he, song boux couh yaemz roengzdaeuj. Gvaq yaep he, Auseiq cij mbajmbwdmbwd naeuz:“Daegvaz ha, caen doiq mbouj hwnj lo, ciq……ciq cienz mwngz baenzlai nanz, caengz ndaej……ndaej boiz.” Daegvaz guhhek naeuz:“Auseiq, gaej yienghneix naeuz, ranz mwngz lwg lai reihnaz noix, mbouj yungzheih.” Daegvaz conghbak yienghneix naeuz, ndaw dungx cix youfubfub, de ceiq lau Auseiq haibak cam de ciq cienz.

Auseiq youh naeuz:“Gou senqdi siengj boiz sou lo, hoeng ranz gou yiemqcaiq lai lai, ndaej saekdi cienz cungj boiz hawj gij ranz vunzlaux gonq. Gou naemj, sou lij miz gunghswh lingx, couh siengj laeng di boiz sou.

Mehyah Daegvaz daj ndaw ranzdajcawj bungj byaek okdaeuj, ciep vah naeuz:“Auseiq, mbouj youqgaenj law, mwngz seizneix lij hoj, laeng di menh boiz.” Daegvaz lau Auseiq haibak ciq cienz, vaiqdi naeuz:“Auseiq ha, mwngz naengh baenz ngoenz ci lo, dungxiek luba. Vaiq haeuj daiz, song gvanbaz dou hix nyaengq, yaek daengz cieng lo, hong lai, gwn sat, lij bae gyaban ne.” Auseiq ndwn hwnjdaeuj, miz di najmong naeuz:“Yienghneix, gou ndawranz hong caemh nyaengq, gou couh mbouj nguh sou lo.” Naeuz sat, daj ndaw daehbuh mbon yaep he, dawz bau doxgaiq aeu suliu duk ndeu okdaeuj, doq ndenq hawj Daegvaz doq naeuz:“Caen docih gvanbaz sou lu, ciq cienz hawj ranz gou dohgvaq seiznanh.” Daegvaz ngeizvaeg cam:“Auseiq, neix dwg maz ha?” Auseiq naeuz:“Mwngz geqgeq yawj, gaeuq soq lwi, 5000 maenz.” Daegvaz doq najhaiyab, angqvauvau ciep cienz haeuj fwngz, bakmbaeu mbengmbeng naeuz:“Auseiq, haeuj daiz ma, ngoenzneix miz byaseng, gwn song cenj laeuj menh dauqranz.”

Seiz gwn laeuj, Daegvaz mbouj miz vah ra vah cam:“Auseiq, mwngz seizneix fatcaiz la?” Auseiq riuyaeng- yaeng naeuz:“Fatcaiz gangj mbouj daengz, seizneix lwg hung le, ndaej bang guhhong lo, cawz ndaem oij le, lij ndaem geij moux makgam, ndaej di cienz souhaeuj, ndaw fwngz soeng di lo.”Daegvaz riuhehe naeuz:“Yiengh- neix gou hix cuengqsim lo.”

Gvaqlaeng, Daegvaz cij rox, Auseiq vih boiz song fanh maenz cienz caiq neix, 20 bi daeuj, ngoenzngoenz hwnj bya mbaet ywdoj bae gai vuenh cienz, gai ndaej di boiz di, boiz daengz seizneix cij ndaej boiz caez. Raen de 50 lai bi lo, miz di cojgvaq de, naeuz:“Auseiq, mwngz gaej guh baenzlai, dwgrengz lai lo, cienz mbouj boiz couh suenq lo.” Auseiq naeuz:“Mbouj baenz, mbouj boiz gou ninz mbouj ndaek. Vahlaux naeuz, faex miz rag, vunz miz naj, bouxvunz roxsoq mbouj gangjgyaj. Naeuz ciq cienz doeklaeng youh mbouj boiz, neix mbouj dwg luq vunz ha?”