Raemx doek byai dat lingq

Lingq roengzdaeuj ndaw rij

Raemx sawdik mbouj lih

Lij dem miz yingzyangj

Raemx rij ndongqlinlin

Go nda linz bae dangj

Raemx baenqbeq haeuj gang

Raeuz vang biuz bae vaeg

Nuengx vaeg daeuj swiq naj

Fajnaj hauseksek

Cehda ronghsagsag

Gag baenz miz cingsaenz

Go vaeg daeuj goenj caz

Baek caz hom deq sau

Raq aen cenj bak hau

Dauj daeuj caj nuengx gwn

Caj nuengx bae ranz liuh

Gangjriu lwnh swnghhoz

Mbauq sau gyaez lwnh goj

Ciengq go gangjriu angq

Nuengx dieb haeuj ranz go

Boh go naj riu coh

Meh go gangj daeuj coh

Nuengx mbouj rox roengz din

Song fwngz dawz cenj caz

Caz haeuj bak ndoet loz

Gwn daengz bak van hoz

Lae roengz hoz van sim

Nuengx coux caz lumz mbaiq

Gwn sat mbaiq riengzlaeng

Coenz vah ndawsim daengz

Byai fwen daengz neix diq