Ndaejgeiq daxboh dwg baenzneix simsienh, unqswnh. De couh lumj sojmiz bouxguhnaz nei, lauxsaed caeuq sienhsoh. De aeu song cik fwngz gaenx guh bae veh mbaw lamzdoz dou, aeu gij giengiengz bonjfaenh caeuq mbouj goenqcaej bae sij gij saeh vunz gwnzbiengz.

Mwh lij iq, geij beixnuengx dou ngoenznaengz riuangq guhcaemz, gvaq ndaej gig simhai. Hoeng, gij son’gyauq daxboh hawj dou coengz- laiz mbouj gamj cuengqsoeng hagsib gvaq. Cihsiz goj ndaej gaijbienq minghyinh, daxboh dawz gij maq- muengh coq youq gwnz ndang dou, caemhcaiq yungh gij hengzdoengh caeuq swhsiengj lah dou laeglwd. Sinhoj guh hongreihnaz, mbaet gwn mbaet daenj, hawj dou engqgya roxnyinh aeu roengzrengz doegsaw. Daxboh moix aen haggeiz haeujhag cungj bae caeuq lauxsae gangjgoj, moix haemh cungj youq laj daeng buenx dou sij cozyez yawj saw, moix aen haggeiz satbyai cungj rox cazyawj gij gaujsi cingzcik dou. De couh yienghneix, gujli dou it diemj it diemj cinbu, dazyinx dou ngah hag cihsiz, lwnh hawj dou hag ndaej ndei aiq ndaej bae baihrog yawj gij seiqgyaiq caeuq mbanjranz gig mbouj dox- doengz. De haeujsim son, dou ngoenz doek ngoenz majhung lo.

Daxboh cungj heuj in. Cijaeu dienheiq baez bienq, gij heuj de youh in lo. Hoeng, gou coengzlaiz mbouj raen de gwn yw gvaq, heuj in seiz de hix cij dwg ra aen cenj coux rim raemx goenj ndoet haeuj ndaw hoz bae, naeuz neix dwg aeu heiqndat bae gaj nengzbingh. Baenzneix guh geij baez, guh daengz daxboh nyinhnaeuz gaenq mbouj in cij daengx roengzdaeuj. Daxboh lij ciengzseiz dungx in. Dingq daxgoeng daxbuz gangj daxboh seiz iq dungx couh ciengzseiz in, miz baez in ndaej de ca mbouj geijlai couh doek roengz dah bae. Aenvih daxboh mbouj ndaej bae yihyen yawj gvaq, baenzneix hix mbouj rox dwg maz bingh.

Dahcej caeuq gou hwnj swhfan yozyau lo, daxboh gig vuenheij, hoeng ranz dou bonjlaiz couh gungzhoj dangqmaz, mbatneix engq dwg doek nae le youh roengz mwi. Daxboh cij ndaej dauqcawq buet bae buet dauq ra ngaenz, bungq deng haujlai ding, roq le haujlai dou, hix yawj le haujlai saeknaj bouxwnq. Hoeng, gou mbouj rox gij rengz daxboh daj gyawz daeuj, gij naj de baenzlawz miz baenzlai na, nyengh dwg ra ngaenz hawj dou song beixnuengx bae doegsaw. Daxboh hainduj gai gij doxgaiq dij cienz ndaw ranz, doeklaeng duz vaiz geq buenx dou ndaej saek 8 bi hix deng gai bae lo.

Haeujhag le, gou gig roengzrengz hag doxgaiq, aenvih gou rox gou ndaej doegsaw caen mbouj vei, seizneix cij ndaej guh doenghgij neix cij doiq ndaej hwnj doxboh. Haggeiz daih’it, miz goh ndeu gauj ndaej mbouj ndei, gou mbouj ndaej bingz “Hagseng Sam Ndei”, gou siengsim raixcaix. Daxboh rox le, cij dwg bekbek aen mbaq gou, gujli gou. Haggeiz daihngeih, gou engqgya roengzrengz, doeklaeng dauqdaej bingz ndaej “Hagseng Sam Ndei” lo. Gou sim- angq fouzbeij, vih bonjfaenh, hix vih daxboh. Haggeiz daihsam, cienz daeuj gij siusik daxboh baenzbingh laemx youq gwnznamh. Gou daej lo, cingq- ngamj yaek daengz gozgingcez ndaej cuengqgyaj, gou couh dajsuenq maranz bae yawjyawj daxboh.

Yamq haeuj bakdou, aen ndang daxboh byomreuq ingj haeuj ndaw da gou daeuj, ndwenngoenz youq gwnz naj heumong de gaek miz gij riz engq laeg lo, gij yienghceij de gig haenq dwk gik gou. Gou nyengh dwk, youzcaih raemxda rihbyoegbyoeg. Bonjlaiz couh gvaq ndaej hoj, vihmaz aen saeu hung dingj ranz couh baenzneix laemx roengzdaeuj lo? Youq ranz ndaej geij ngoenz, daxboh lau gou yousim de daiqlai, cungj gangj ndang de lij cangq, mbouj miz maz saeh, hawj gou ciuqseiz dauq hagdangz bae doegsaw. Dingj mbouj ndaej daxboh baenzneix ngoenz gangj hwnz gyaep, gou couh dauqbae hagdangz lo.

Mwh hanzgyaj dauqdaej daeuj- daengz lo, gou doq maranz, ma daengz ndaw ranz loq siliengz cix lij raeujrub. Lauheiq dwg gij yw daxboh gwn haenx cingq doiq bingh, daxboh dauqdaej ndei lo, youh fukdauq le gij yienghceij gaxgonq. Saeh ndei couh daeuj ndaej baenzneix sawqmwh, gij bingh daxboh ndaej ndei couh lumj ngoenznit bouxvunz deng cengx dangqnaj doq miz dong feiz ndeu, geij beixnuengx dou cungj gikdoengh caeuq angqyangz. Saedceij couh youq ndaw sing dou gangjriu lae gvaq, daxboh youh bienqbaenz boux baengzyoux roxsim、lauxsae saeqsim. Mbouj rox geijlai baez, daxboh vih dou san loqsiengj aen dem aen, gij loqsiengj dou doxcaemh.

Haemhhaenx, gou deng sing bongx dou daxmeh gyaep ndiu, daeuj daengz mbonq daxboh seiz, de gaenq mauhngunz lo. Gyoengqdou da daengx da yawj de cakdai caklix, cungj sim’in dangqmaz. Youq mwh daxboh ceiq in seiz, dou cix maz hix bang mbouj ndaej de. Daxboh mboujduenh dingjhoenx, hoeng doek- laeng lij dwg lizbae lo. De mbouj diemheiq lo, ninz youq ndaw rungj gou caeuq dahcej. Daiq gij louzlienh, daiq gij haemzhoj, daiq aen loq- siengj ngoenzcog, ciengxlwenx lizhai gyoengqdou lo. Dou daep sik bwt dek daejnga’nga, daxboh caiq hix mbouj rox ndiu gvaqdaeuj lo.

Gunghcoz ndaej geij bi le, gij ngaeuz daxboh ciengzseiz yienh youq ndaw fangzhwnzloq gou. Moix baez dauqngeix daxboh, gou cungj dwg ndawsim fubfed, cungj miz lwed ndat nyoenx doh daengx ndang. Gij gyaez daxboh dwg baenzneix hungmbwk youh caemlaeg. Daxboh vih dou guh baenzlai, hoeng, de lij caengz ndaej dou ganq geijlai nanz couh lizbae lo. Gienh saeh neix hawj geij beixnuengx dou moix baez dwen daengz, cungj raemxda liklik, gangj mbouj baenz coenz.

O, daxboh! Mwngz youq lingh aen seiqgyaiq gvaq ndaej lij ndei lwi?