Gyaeuj Mbanjfaexminz miz aen geuq daemq ndeu, gizneix faex mwncupcup, raemhrwgrwg, daengx bi rumz liengzyauyau.

Mbanjfaexminz iqetet, ngamq miz seiq、hajcib ranz vunz. Mbanj iq vunz noix, dieg gvangq ndoi lai, gyoengq vunzmbanj gaenh 10 bi daeuj gaenx- gyaek guhhong, doxcanj hwnj ndoi bae hai fwz ndaem mak ndaem faex, ciengx gaeq baenzboengj, bouxboux cungj haemq guh ndaej gwn. Miz fwen haenh naeuz:

Mbanjfaexminz dieg lai,

Fatcaiz ngaenz rim daeh,

Mbangj hwnj ndoi ciengx gaeq,

Mbangj ndaem faex baenz miz.

“Bya bya bya……” Sing bauq- rengh yiengj bili byala, raq hoenzhau ndeu daj aen gvaengxhong ranz laj geuq haenx veihveih hwnjdaeuj, nanz- nanz cungj mbouj rox sanq deuz. Rumz iq ci gvaqdaeuj, raq heiqhaeu ywsiu ndeu nem gij heiqrang laeujnoh gyonj doxcaeuq, hawj vunz mup ndaej ok aen ciengzlaeuj angqyangz fizfwdfwd ndeu.

Dou rug nem cih “songheij” ndeu ndingfwgfwg, gyoengq lwgsug beixnuengx caenx rim ranz, mbangj boux gyaet cehgva, mbangj boux gwn heijdiengz, caezgya hemqsiegsieg, nauhyied raixcaix.

“Daegnaep caijsoq lailai, 30 daih geij lo lij aeu ndaej bouxyah nyaenx ndei, vunz diemj feiz cungj ra mbouj raen ho!”

“Daegnaep, bimoq caiq seng laeq lwg ndeu, saedceij ndei gvaq maz bae!”

“Dahhing lij raen nyaenx oiq, mbouj lumj boux haq vunz gvaq ha. Yawj hwnjbae beij doengh dah caengz haq lij gyaeu ne!”

Boux gvanmoq Daegnaep naj nding daengz goekrwz, gag riumwnh, seiz mbouj seiz yawjyawj Dahhing. Dahhing dingh naengh youq henz, ngaemgyaeuj gag yawj byaidin, naj maeqhau, cix mbouj riuyomj.

Gyoengqvunz angqfwngfwng, gangj vah mbouj geihbak, mboujguenj ndeidingq yakdingq, maz cungj hoed.

“Seizneix ha, ‘mbauq lai sau cix noix, mbouj gaeuq boiq gaeuq faen; geijlai ra mbouj raen, baenzciuh boux dog gvaq’. Daegnaep miz fukheiq, yienznaeuz yah neix dwg haq moq, cix ndang dog mbouj daiq lwg, caijsoq ndei hu, caijsoq ndei hu.”

“Cingqcaen bw, Mbanjlaj daeg- lwg Lauxbuenz aeu yah haenx couh daiq song laeq lwgnyez daeuj, bang vunz ciengx lwg hawj gwn hawj daenj cixbah, daengzcog lij aeu bang giz mbouj raen dem, mbouj rox aeu sai geijlai ngaenz……”

Cungj mbouj miz saek boux haeujsim daengz, Dahhing naj saepsat, gyaeuj engq duiq doxroengz lo.

Ciemhciemh hwnz lo, vunzlai gwn imq cej gaeuq le cungj sanq deuz lo. Dahhing lijdwg dingh naengh youq gizde ngaemgyaeuj yawj byaidin bonj- faenh. Daegnaep byaij haeuj byaij ok geij baez, sousib doenghyiengh, doeklaeng gwn cenj raemx ndeu le, couh byaij gvaqdaeuj coh Dahhing.

Aen ndang byombyet Dahhing sawqmwh deng Daegnaep umj haeuj ndaw rungj raeujrubrub bae, got ndaej ndaetndwtndwt. De ndaejnyi gij sing simdiuq bubbub Daegnaep lumj gizgyae roq gyong nei. De roxnyinh gij lwed ndaw ndang Daegnaep cingq goenjbyoegbyoeg. “O…… Dahhing Dahhing!” Geij sing gyangzhemq, hemq ndaej vunz yaek doekhoenz bae, ciepdwk fajbak deng lingh fajbak ndatfwdfwd nem ndaej deihdwt- dwt……

Rumz haenq ci gvaq geuq,

Mbwn cinghseuq ndaej ndei,

Ndwenngoenz cimh rumz bae,

Rox gizgyae yawz yiengh.

Baez yaep da, Dahhing senj haq haeuj Mbanjfaexminz daeuj youh yaek ndaej ndwen lo. Doengxngoenz riengz gvan de Daegnaep bae ndoifaex gvej rum, Daegnaep saekseiz cim Dahhing couh riumwnh, seizde Dahhing caemh cang riu, riu ndaej mbouj cwxcaih. Mwh gag youq, Dahhing caenh siengj daej oksing daeuj.

Gangj vah ndawsim, Dahhing gyaez aen mbanj iq neix, de gyaez gij ndoengfaex gizneix, de gyaez aen geuq gyaeujmbanj rumz liengzyauyau neix. Ngoenznaengz souhong dauqma, de cungj hwnj gwnz geuq bae yietliengz, yawj rumz ci mbawfaex mbawhaz doenghsasa, youh gag ngeix daengz aen ranz gizgyae de……

Gizhaenx faex caemh heuswd- swd, rumz hix liengzyauyau, doengx- ngoenz souhong dauqranz de caemh bae laj faex bakmbanj yietliengz…… Hoeng seizneix, de gaenq liz ranz deuz okdaeuj, youh miz lingh aen ranz lo. Youq aen ranz baih gaxgonq haenx, daeglwg de Daeglaemz ngamq ndaej 8 bi, de mbouj ndaej mbouj ndek lwg gag deuz.

Dahhing ciengzseiz naengh youq gwnz geuq ngawzngwd muengh giz- gyae, saekseiz daengz byonghhwnz cungj lumz dauqbae ninz. De gvaqsim Daeglaemz, cix mbouj ndaej mbouj ndek de gag deuz okdaeuj. Aenvih ndawranz haenx yiemqcaiq, de boiz mbouj hwnj ha. Gvangonq de bi- gvaq baenz bingh naek, yw bae geij ndwen sawj gungz sawj caenh, louz roengz ndang caiq ndeu dai lo. Vih boizcaiq, de buekmingh guhhong, hoeng de ciengx gaeq gaeq raq, ciengx mou mou dai, cungj mbouj saek yiengh caeuhfwngz. Bae gyawz ra cienz daeuj boiz vunz?

Yiemqcaiq fouz ngaenz boiz,

Vunz coi sam coi seiq,

Lau bae naz bae reih,

Cij ngeix lingh haq vunz.

Ndaejgeiq ngoenz ndeu ban- ringzgvaq, Dahhing boux dog gwed fagcanj bae ndaw doengh daengj raemxnaz, caj de doeng ndaej mieng raemx haeuj naz bae, mbwn hix fuemx lo. Mwh byaij dauqma, sawqmwh miz ndaek vunz ndeu daj ndaw nya henz roen con okdaeuj, Dahhing doeksaet yat, dingh da baez yawj, laxlawz dwg Daegfaenz ndaek hujgeiq gvan- gonq de, guhmuengz dongx naeuz:“Gofaenz, siuj mwngz 2000 maenz ngaenz haenx caengz miz boiz mwngz bw.” Daegfaenz baet fwngz nwtnwt naeuz:“Mbouj yungh gip, mbouj yungh gip, seizlawz hawj cungj ndaej, mbouj youqgaenj!”

Songde guhdoih byaij dauqma. Yaep ndeu, Daegfaenz fwt gaemdawz cik fwngz Dahhing, naeuz:“Daxsimj de ha, gou rox mwngz hoj, danghnaeuz mwh mwngz simfwz daeuj nem gou ninz, 2000 maenz ngaenz haenx gou couh mbouj heuh mwngz boiz lo……” Gangj le song fwngz couh umj gvaq- bae, hwk dwk Dahhing gvenggvak fagcanj buet ndaej deuz dai deuz lix.

Daj mbathaenx le, Dahhing couh naemj lingh haq vunz lo, de yaek daiq Daeglaemz bae cimh, hoeng goengbuz nyengh hah Daeglaemz ndaej gaenj, naeuz yaek louz lwglan daeuj swnjciep aen lozyieng ranz de, dai cungj mbouj hawj daiq deuz.

Ngoenzcog hagdangz haihag, Daeglaemz hwnj ngeih nienzgaep lo, mbouj rox miz mbouj miz ngaenz cawx gij doxgaiq yungh, Dahhing vih neix simcieg lailai. De caen siengj coh Daegnaep aeu di ngaenz dawz dauq- bae hawj daeglwg, de nyinhnaeuz Daegnaep haengjdingh nyienh hawj de, cix hoj haibak gangj ha.

Raen Dahhing ngoenzngoenz sim naekdumdum, mbouj angq saekdi, Daegnaep couh rox Dahhing lij miz gij saeh muenz de, cam de geijlai baez de cungj ii ww mbouj nyienh gangj. Doeklaeng cij ndaej eufwen daeuj daeuq:

“Rumz ci liengzyauyau,

Saumbauq da doxcim,

Beix dangq gip ndaej gim,

Nuengx cix sim mbouj angq.

Doengxngoenz bae guhhong,

Song raeuz cungj guhdoih,

Nuengxlwnz souh maz coih,

Laeglemx hoij ramxda.

Miz sim gap gyaeujyah,

Yien fwngz gvaq haenznaz,

Mizsim guh gvanbaz,

Miz maz yaek doxlwnh.

……”

Dahhing baez dingq daengz gij fwen neix, naj nding lo, de gag roxnyinh bonjfaenh doiq mbouj gvaq Daegnaep, mbouj wnggai miz saeh muenz de. Dingq lai le, de hix sing daemq eu naeuz:

“Fwjhau mbin gwnz gyaeuj,

Roeglaej douh roqranz,

Nuengx ndaej beix guh gvan,

Van ndaw dungx ndaw saej.

Lwgsaeq caengz baenz vunz,

Yaek lumz lumz mbouj ndaej,

Mbouj gamj naeuzlwnh beix,

Cij gag daej ndawhoz.

Saedvah lwnh beixgim,

Nuengx gvaqsim lwgsaeq,

Haihag sai ngaenzceij,

Youheiq Daeglaemz gou.

……”

Seizneix, Daegnaep mbouj guh- sing lo. Haemhhaenx, Dahhing fonj roeb gvaq roeb cungj ninz mbouj ndaek. Daegnaep gag naengh gwnz eij cit ien hwnz ndeu, hoenz ien gyuem- luemz daengx ranz.

Haetlaeng hwnqdaeuj, Daegnaep coh Dahhing naeuz:“Raeuz bae yawjyawj Daeglaemz ba!” Songde benz hwnj geuq, byaij ok mbanj bae, rumz ci liengzyauyau.