Seizneix gij seiqgyaiq,

Vunz gig maij ciengq go;

Vih daengq gyoengq bouxcoz,

Gou doq ciengq geij coenz.

Daxmeh ciengx raeuz hung,

Cungj umj cungj baj haex;

Ngoenzgonq raeuz lij saeq,

Bae gyawz cungj aeu umj.

Gaj duzbit duzgaeq,

Baezbaez geiq louz ga;

Ngeix daengz aeu danggya,

Mbouj sij va ngaenzceij.

Moix baez daengz cietheiq,

Mbouj dauq geiq cam ndei;

Daxmeh niemh ndaej deih,

Fouz feih gwn nohbyaek.

Dajgoeng okrog bae,

Seizseiz aeu roxleix;

Raeuz bae gyae hix ndaej,

Sim aeu geiq ndawranz.

Daxmeh banhaemh ninz,

Foekfan ninz mbouj ndaek;

Lau lwg guhhong baeg,

Caekcaek geiq ndawhoz.

Mboujguenj raeuz baenzlawz,

Daxmeh mbouj rox yiemz;

Ngoenzhaemh cungj nyaenx niemh,

Lwg dauq diemz youq sim.

Raen lwg ndaej dauqma,

Daxmeh ra huq daiq;

Vah cam lai baenz gyaiz,

Siengjniemh lwg raixcaix.

Raeuz ciengzseiz dauqma,

Ngonz ndaw gya bouxlaux;

Cawj byaek ndei gwnz cauq,

Daengz ranz ndaej nauhyied.

Mbouj muengh ngaenz canh lai,

Gaeuq sai couh habbak;

Youq rog geijlai ak,

Sim miz cag gwq yien.