Byaij haeuj seizdaih moq, saed- ceij vunzlai gvaq ndaej engq lai saek lai yiengh lo. Hoeng, vunz seizneix guh maz dingzlai cungj dwg gaenj- gaenj gipgip, yied vaiq yied ndei, couh lumj daengx aen ndwnj makcauj nei, mbouj rox gij feihdauh de baenzlawz yiengh.

Haetromh ngamq ndiu, gou roxnyinh ngoenzneix mbouj miz maz hong nyaengq, ndigah gag ninz youq gwnz congz laep da dingh youq yaep ndeu.

“Cijceuq…… cijceuq…… cijcij ceuqceuq……” Sing duzroeg ciuz daj rog cueng cienz haeuj rwz gou daeuj, mbangj duz sing hung sing gok, lumj miz maz saehndei yaek gvangjbo nei; mbangj duz haemq sing unq sing menh, lumj daxmeh gig unqswnh cingq gangjgoj hawj lwg dingq. Caemhcaiq miz geij duz roeg mwngz sing gou sing doxlwnz ciuz, lumj cingq gangjgoj nei…… Ha! Gij sing neix geijlai ndeidingq! Dingq gij sing gyoengqde, gou roxnyinh ndawsim gyoengqde itdingh gig angqyangz, gyoengqde itdingh gig doxgyaez dox- ndiep! Mbouj geizheih ne, gyoengqde youq gizneix miz bya miz raemx, gofaex raemhrwgrwg, hoengheiq seuq- setset, mbwn gvangq fwj noix, geijlai gyaeundei ha! Gyoengqde ndaej cwx- caih mbin bae mbin dauq, miz maz mbouj vuenyungz ne!

“Dad dad……dad dad……” Gij sing byaij roen loq gaenj neix cienz haeuj rwz gou daeuj. Mbouj yungh gangj, gou couh rox neix dwg gij sing byaij roen gyoengq hagseng lij doeg gauhcungh. Gyoengqde haet daengz 6 diemj cung hwnqcongz, 6:30 guh caujcauh. Seizneix gyoengqde cingq gipgip muengzmuengz vaiq byaij bae giuzcangz yaek guh caujcauh ne. Gyoengqde mbouj yungzheih bw, haet hwnq caeux haemh ninz gyang, bouxboux cingq vih saedyienh aen loqsiengj bonjfaenh roengzrengz hagsib, geijlai dwgrengz sinhoj hix aeu nyaenx dwk. Gyoengqde wnggai youq iq couh hag doxgaiq, mboujnex doeklaeng baengh maz youq gwnz- biengz ra gwn ra daenj. Doegsaw mbouj ndei hix rox ra ndaej faenh hong guh, lauheiq ndang baeg sim you lai lo.

“Sasa……sasa……” Gij sing sauq ranz cienz haeuj rwz gou daeuj. Mbouj yungh gangj, gou couh rox neix dwg bouxbaetroen hainduj baet roen lo. De dwg mehmbwk ndaej 40 lai bi ndeu, byoemgyaeuj dinjdet daengz laj dujrwz, mbouj byom mbouj biz, yawj hwnjdaeuj gig seuqset. De youq ndaw hagdangz guh bouxbaetroen gaenq miz cib bi doxhwnj lo. Hoeng, gou roxnyinh gij yienghceij de mbouj deng bienq geijlai, lijdwg mbouj byom mbouj biz, lumj mbouj rox bienq laux nei. De bungz vunz cungj dwg riu- nyumnyum dongx vunz, gangj vah hix riuhaha, lumj mbouj miz maz simnyap gvaq. Ngoenznaengz cawz baet seuq gak diuz roen hagdangz, ndaej lingx faenh ngaenzhong neix, de lij gip gij nyapnyaj miz yungh bae gai bangbouj ndawranz, yienghneix daeuj ciengx bouxlaux lwgnyez, an’onj gvaq ndwenngoenz.

Naemj daengz bouxbaetroen neix, gou caiq naemj hwnj lingh boux baetdiengzhaex hagdangz. De hix dwg mehmbwk cungnienz lo, ndang haemq cangq, guh hong mizrengz youh vaiqvit, gangj vah sing haemq hung, bingzciengz mbouj haengj sien haibak gangj vah. Hoeng danghnaeuz mwngz caeuq de gangj vah hwnjdaeuj, de couh lumj mbok faexcuk dauj duhhenj nei sing hung sing riu gangj mbouj dingz. Miz ngoenz ndeu, de baet seuq diengzhaex le, doq swiq fwngz doq ciengq go, dingjlingz gou byaij haeujbae ndaejnyi, sing go de seuqset rwenzred, cingzngeih unqmienz, ndei- dingq raixcaix! Gou nyaenx mbouj ndaej danq naeuz:“Dahcej, mwngz ciengq go ndeidingq bw!” De dingqnyi le riuhaha cam gou:“Mwngz gangj dwg caen lwi? Caen ndeidingq?” Gou han naeuz:“Caen dahraix! Sing go mwngz seuqset youh goksasa, lumj cienmonz hag ciengq go gvaq nei.” De dingq gou yienghneix gangj le, sim’angq dangqmaz, riuhaha naeuz:“Mwngz naeuz ndeidingq, gou couh caiq lai ciengq song gawq hawj mwngz dingq!” De angq dwk riu lumj dujva nei, youh ciengq hwnjdaeuj, gou roxnyinh yiengh de dwggyaez lumj laeq lwgnyez nei……

——Ndwenngoenz dauqdaej dwg maz feihdauh? Gizsaed caezgya cungj roxnyinh youq ndwenngoenz ndawde, soemj van haemz manh, yienghyiengh cungj miz. Hoeng, vunzlai cungj dwg haengj gij feihdauh van ndwi. Gou roxnyinh gij van neix dauqcawq cungj miz! Caiq gangj vuenyungz dwg baenzneix genjdanh!

——Vuenyungz couhdwg lumj duzroeg nei, cwxcaih mbin youq gwnz mbwn gvangqlangh; vuenyungz couh- dwg lumj gyoengq hagseng nei, vih loqsiengj haenqrengz bongh baenaj; vuenyungz couhdwg lumj bouxguhbaet nei, mbouj guenj dangqnaj miz geijlai haemzhoj, lijdwg riunyumnyum gvaq ndwenngoenz caemhcaiq roxnyinh rimhoz……

Ndwenngoenz vaiqvit lumj raemxlae, caemxcangh baenaj mbouj dauqlaeng. Hoeng, mbangjseiz raeuz wngdang caem roengzdaeuj, yunghsim bae saeqsaeq dingq、menhmenh cimz, couh ndaej roxnyinh gij feihdauh ndawde dwg baenzneix diemz- swdswd……