Fwen Liuxcou daj Byayizfungh ndaw Si Liuxcou mizok, ciuq cienz- gangj boux sienfwen Bouxcuengh Liuz Samcej couhdwg youq gizneix gwih duzbya hwnj mbwn bienqbaenz sien.

Fwen Liuxcou miz haujlai nanz lo, daj Ciuhdangz doxdaeuj, gvaq geijlai bi cungj mbouj dingz mbouj duenh. Daengz seizneix, baez daengz seiz gvaq cieng gvaq ciet gvaq ngoenz cuengqgyaj, laj Byayizfungh、henz Siujlungzdanz、gwnz Yinzminz Gvangjcangz, cungj miz canghfwen gag doxcomz guhdoih eu fwen doiq fwen, bouxyawj bouxdingq lailai bae, ciengzmienh angqvau nauhyied. Youq ndaw singz seizneix cungj miz eu fwen cungj vwnzva geq neix, neix youq ndaw singz daengx guek cungj noix raen.

Fwen Liuxcou miz lai cungj, lumj gag ciengq、lai boux ciengq、doiq ciengq daengj, ndawde doiq ciengq dwg cungj hingzsik yungh ceiq lai caeuq ceiq miz daegsaek. Doiq ciengq ndawbiengz heuhguh doiq fwen, dwg canghfwen roxnaeuz doih- fwen doxdax dungxcaiz, neix youh heuhguh dax fwen、beij fwen, doxdax doxbeij haenq dangqmaz. Baez daengz hawfwen, song baih doiq fwen baih ciengq baih han, dangseiz guh fwen、dangciengz ok fwen、hai bak couh eu. Vah ndaw fwen mizyinx dangqmaz, ok fwen vaiq raixcaix, bouxdingq gingciengz riu baenz bwtringx bae.

Fwen Liuxcou cojcienz haenx dingzlai aeu Vahcuengh caeuq Vah- Liuxcou song cungj vah neix daeuj ciengq, faen baenz“fwen”caeuq“gyah”song loih hung. “Fwen”dwg fwenbiengz cienzlah youq ranghdieg Bouxcuengh comzyouq, vunzlai ging- ciengz heuhguh“Fwencuengh”, aeu Vahcuengh daeuj eu. Dingzlai dwg“fwen seiq coenz”, hot fwen ndeu miz seiq coenz, coenz ndeu miz seiq cih. Cungj wnq dwg Fwen Liuxcou, dwg youq ndaw singz miz Bouxcuengh Bouxgun daengj lai aen minzcuz soqlaiz cabyouq haenx hwnghoengh, heuhguh“gyah”. Ciengq“gyah” seiz, canghfwen ciuq sibgvenq cungj aeu Vahliuxcou ciengq dap, depgyawj vahgangj, vunzlai baez dingq couh rox, yinxvunz dangqmaz. Hot “gyah” ndeu dwg seiq coenz caet cih.

Cawzliux fwen Vahcuengh、Vahgun, Liuxcou lij miz fwen Vahdungcuz、Vahmyauzcuz、Vah- yauzcuz daengj lai cungj.

Fwen Liuxcou ndawde neiyungz lai dangqmaz, baugvat saedceij vunzlai caez. Faen miz fwen lizsij、fwen youx、 fwen duenz、fwen fung- sug guhlaex、fwen cwngcw seizneix daengj.

Fwen Liuxcou baengh“bak gangj sim geiq”cungj fuengsik neix daeuj swnjcienz, youz bouxsaefouh daiq lwgsae daih cienz daih swnj roengzdaeuj. Daengzlaeng ndaw- biengz hainduj miz sawfwen cienzlah, dingzlai dwg vunz ndawbiengz gag cauh bonj sawfwngzcau.

Bi 2007, fwen Liuxcou ginggvaq Gvangjsih Bouxcuengh Swcigih Yinzminz Cwngfuj baecinj, ndaej lied haeuj daih’it buek swcigih gaep feihvuzciz vwnzva yizcanj mingz- loeg.