Seiq

Dahgyaemq seng daeglwg ndeu, hix buen bae ranz moq youq lo, vunz lajmbanj bienqbaenz vunz ndaw singz, de sim gig angq. De mbouj caiq bae guh hong lo, ngoenzngoenz angq- vauvau youq ranz saeg buh bwnq cij ciengx daeglwg, cawj byaek cawj ngaiz caj Daegluenz, saedceij couh baenz- neix gvaq roengzbae lo.

Daegluenz miz gienz miz cienz, Dahgyaemq gig yousim de youq baihrog miz lwgsau moq, mehmbwk baez miz aen sim neix, cungj dwg youq mbouj onj, ninz mbouj ndaek. Danghnaeuz Daegluenz mbouj ciep dienhvah, Dahgyaemq couh daengz gunghswh daeuj ra vunz; Daegluenz banhaemh hwnz di mbouj ma daengz ranz, Dahgyaemq couh baengzyoux beixnuengx dauqcawq cam、dauqcawq caz. Haidaeuz, Daegluenz raen ndeiriu, roxnyinh Dahgyaemh dwg gyaez de, bet baez cib baez yienghneix le, Daegluenz miz di fanz lo. Mizseiz daengz seiz maranz lo, de lij boux dog youq bien dah youzbyaij, mizseiz daengz seiz haeuj ninz lo, de lij boux ndeu haeuj bouq bae gwn caz.

Haemh ndeu, mbwn laepnyam- nyam, Daegluenz raen dahsau he boux dog ndwn youq bien dah, yawj hwnjdaeuj lumjnaeuz siengj mbouj hai nei, Daegluenz byaij daengz gyawj, sing saeq cam:“Dahnuengx, mwngz boux ndeu gou boux dog raeuz guh- doih youzbyaij ndaej mbouj ndaej?”

Dahsau mbouj hoiz vah, de baenq ndang gvaqdaeuj. “Byaij!” Gangj coenz vah ndeu couh caeuq Daegluenz bingzbaiz youq bien dah youzbyaij, songde nanz mbouj nanz song aen mbaq doxbungz baez ndeu, nanz mbouj nanz song faj fwngz doxdaemj baez ndeu, nanz mbouj nanz gaem fwngz baez ndeu, yienghneix gaem- gaem cuengqcuengq guhdoih byaij le haemh ndeu. Haemhneix, song boux cungj roxnyinh gvaq ndaej soeng- swdswd, diemzsisi.

Dahsau neix heuhguh Dahyingh, de youq ndaw singz hai aen diemq nyumx ribdin ribfwngz ndeu, seng’eiq mbouj loek, de ndang hung noh hau, haq gvaq song bae, aenvih de mbouj ndaej seng lwgnyez, cungj deng doxliz. De boux ndeu gvaq saedceij, miz vah naeuz “gag gwn ndaej, gag daeuj mbouj mwn”, seizneix guh ndaej gwn ndaej, mbouj miz maz youheiq, daengz ngoenz ndaej gwn mbouj ndaej bae haenx baenzlawz guh. Dahyingh ciengzciengz naemj daengz gijneix.

Dahyingh mbouj naemj caiq haq vunz, ciuq gij vah de naeuz, lajmbwn mbouj miz bouxsai lawz doiq de dwg caensim. De youh naemj miz bouxsai ndeu, mwh de baeg lai seiz, bouxsai neix ndaej daeuj inin de; mwh de miz maz saeh dawz mbouj ok cawjeiq seiz, bouxsai neix ndaej daeuj caeuq de gangjgangj vah. Baenzneix, de rox- nyinh Daegluenz couh lumj dwg bouxsai de naemj aeu haenx.

Dahyingh itcig naemj bae aeu boux lwgnyez he daeuj ciengx, miz ngoenz ndeu, de caeuq Daegluenz dwen daengz gij siengjfap neix, Daegluenz naeuz ndei. Ciepdaeuj, song boux couh guhdoih dauqcawq ra gyawz miz lwgnyez yaek soengq vunz, it bae ngeih dauq, Daegluenz Dahyingh couh doxliz mbouj ndaej lo.

Seizcin daengz lo, vadauz cingq hai hoengh, Daegluenz daiq Dahyingh daengz ndawranz daeuj, doiq Dah- gyaemq naeuz songde gaenq baenz- lawz baenzlawz. Daegluenz naeuz:“Dahgyaemq, danghnaeuz mwngz naemj caeuq gou doxliz, gou couh soengq aen ranz ndaw singz neix hawj mwngz, lwgniq gou caeuq mwngz guhdoih ciengx. Danghnaeuz mwngz mbouj caeuq gou doxliz, raeuz 3 boux couh guh ranz ndeu. Dahyingh youq ndawsingz miz ranz, de mbouj daeuj ranz raeuz youq, mboujgvaq ni, de miz maz gungzhoj raeuz aeu doxbang doxbang, ngoenzlaeng sou couh dang dwg beixnuengx ba.”

Dahyingh doiq Dahgyaemq naeuz:“Dahnuengx ha, mwngz youq neix hix mbouj miz beix miz nuengx, mbouj miz boux ing boux baengh, gou saedcaih cuengq mbouj ndaej Daeg- luenz lo, mwngz couh naemjnaemj ba, gou caj mwngz aeu vah.”

Dahgyaemq mbouj doeksaet, hix mbouj daej mbouj nauh, de gietdingh mbouj doxliz, caih Daegluenz baenz- lawz gvaq couh baenzde gvaq, saedceij couh yienghneix laebdaeb gvaq roengzbae.

Haj

Mbouj geij nanz, Dahyingh daj fuzliyen lingx aeu dahniq he daeuj ciengx lo, dahniq neix gyaeulili, naj luenz noh maeq, gig dwggyaez. Dingqgangj dah neix okseng geij ngoenz couh deng vunz soengq daeuj fuzliyen, mbouj rox bohmeh dwg byawz.

Miz dahniq neix, gij saedceij Dahyingh gvaq ndaej miz saek miz feih, de guh seng’eiq, daiq lwgnyaeq, ngoenzngoenz nyaengq mbouj dingz, de nyaengq ndaej vaiqvued, nyaengq ndaej rimhoz, ciemciemh lumz bae de lij miz Daegluenz. Mizseiz geij ngoenz mbouj caeuq Daegluenz gangj vah, mizseiz Daegluenz daeuj daengz ranz, de hix mbouj ndaej damswt Daeg- luenz. Doenghbaez baez doxraen, song boux couh doxgot doxcup mbouj siengj cuengq fwngz, seizneix doxraen, cungj mbouj rox gangj maz vah ne, guhdoih gwn、guhdoih ninz couh engq noix lo.

Daegluenz naemj, yawj hwnj- daeuj de lij beij mbouj hwnj dahniq lingx dauq ciengx bw, vihmaz ni? Vihmaz bouxvunz bienq ndaej baenz- neix vaiq ne?

Dahyingh doiq Daegluenz naeuz:“Gou caeuq mwngz mbouj doxaeu gvaq, mbouj dwg gvanbaz, cij ngamq- ngamq dwg baengzyoux. Baengzyoux baengzyoux, lij maij couh doxra, mbouj maij couh cuengq fwngz, mwngz rox sim gou, lij gyaez gou, raeuz couh yienghneix doxraen roengzbae. Danghnaeuz mwngz raen gou mbouj baenz, raen gou mbouj rim hoz mwngz, raeuz couh mbouj caiq doxraen couh ndaej lo, mbouj miz baenzlai vihmaz.”

Duenh seizgan he gvaqbae, Daegluenz ciemhciemh roxnyinh aen sim Dahyingh caen mbouj cuengq youq gwnzndang de, de bienqbaenz boux vunz naemj yungh couh ra, mbouj naemj yungh couh cuengq youq henz ndeu, naemj bae naemj dauq, de gietdingh mbouj caiq raen Dahyingh.

Daegluenz boux ndeu ninz youq gwnz congz, gag naemjnaemj gij roen swhgeij cibgeij bi neix byaij gvaq haenx. Daj de caeuq Dahyingh doxmaij le, Dahgyaemq couh okbae ra hong guh lo. Banhaemh ndaejhoengq Dah- gyaemq couh bae dwkgeiz, Daegluenz gag cawj gag gwn, song boux gag ninz gag aen rug he, doengz youq aen lajroq ndeu, gag boux gag gvaq saedceij.

Daegluenz byoemgyaeuj hau bae dingzlai lo, de mbouj gamj yawj gingq, de gig lau yawjraen aen yienghceij swhgeij gaenq ciemhciemh bienq geq.

Mbouj rox daj seizlawz hwnj, Daegluenz baenz ae lo, hwnz ae, ngoenz ae, gwq ae mbouj dingz. Canghyw naeuz aen bwt de miz di caeuq bouxwnq mbouj doxdoengz, aiq dwg miz bingh lo, heuh de ndeindei yietnaiq, vaiqvaiq daeuj yw. Daeg- luenz naemj daengz ranzmbanj, naemj daengz ranzgaeuq, ranzmbanj bya sang faex loeg, hoengheiq ndei, de naemj dauqbae ranzgaeuq youq duenh seizgan he.

Hix dwg yaek daengz cieng seizhaenx ba, Daegluenz dauq daengz ranzmbanj, gaenq yaek 10 bi mbouj dauq ranzmbanj lo, ndaw mbanj ranzlaeuz aen beij aen moq, aen beij aen sang, aen ranz de lij dwg ranzvax, cien nding vax loeg, gwnz ciengz gaenq hwnj rim go’nya, yawj hwnj- daeuj gaenq nanz mbouj miz vunz youq lo.

Dou ranz daep dwk, Daegluenz mbouj rox baenzlawz haeuj ranz, de youq bakdou ranz baenq bae baenq dauq. Boux ranznden ndeu gvaqdaeuj, ndenq yaekseiz hawj de naeuz, Dahcinj bae gaen dahdaih de youq lo, mbouj rox dauq mbouj dauqdaeuj gvaqcieng.

Daegluenz haeuj daengz ndaw- ranz, ndawranz youh cumx youh haeu mwt, muengxgyau rangh rim gyang ranz, gij faenx gwnz benj nanwtnwt, aen rek hwnj myaex, aen cauq hwnj nya, naeuz gizneix dwg ranz, dauq mboujyawx naeuz gizneix dwg ndaw ndoeng.

Daegluenz bingh yied ngoenz yied naek, vunzmbanj soengq de daengz yihyen seiz, canghyw naeuz daeuj ceiz lo.

Dahcinj daeuj daengz yihyen yawj Daegluenz ngoenzhaenx, Daeg- luenz gaenq gangj mbouj ok saek coenz vah, de raen Dahcinj daeuj daengz, lae roengz geij coij raemxda le, couh laep da bae faenh de lo.

Daegluenz gvaqseiq bihaenx, de caengz rim 50 bi.

（sat）