Ndwen 4 ngoenz 20, dwg liggaeuq cietheiq goekhawx, Lungzswng Gak Cuz Swciyen Lungzciz Cin Cunghluz Cunh banh ciet vwnzva gocaz geq, beixnuengx Yauzcuz dangdieg youq ndaw suen caz eu fwencaz、diuq fouxcaz, caemhcaiq doenggvaq guhhong langhbaij gij ginggvaq dajndaem caeuq mbaet gocaz geq Lungzciz, yinx ndaej haujlai bouxgyaez vwnzva caeuq bouxhek daeuj daejniemh.

Geij bi neix daeuj, Lungzswng Gak Cuz Swciyen mboujduenh gyalai gij ligdoh baujhoh caeuq haifat gocaz geq, cungfaen vatcimh gohyoz、lizsij、vwnzva caeuq canjnieb gyaciz de, haenqrengz dajcauh gij binjbaiz gocaz geq, caemhcaiq doenggvaq “gocaz lijyouz yungzhab” doicaenh gij canjnieb mbawcaz hwngfat cangqheiq, hawj engq lai vunz doenggvaq hwngfat gij canjnieb gocaz geq saedyienh laisou baenz miz.

(Banh Cisiengz/潘志祥)