It

Gou dwg dahlwg Mbanjcuengh, youq Mbanjcuengh doekseng, caemh youq Mbanjcuengh majhung, doiq gij vah ranzmbanj, gou miz faenh cingz vit mbouj ndaej, gvej mbouj goenq ndeu. Hoeng, raemx coh giz daemq lae, vunz ra giz sang byaij. Youq bi 2014 ndwen 8, gij siujyoz ndaw singz ciuaeu lauxsae, gou doenggvaq gaujsi, miznaj baenz boux lauxsae Hinghbinh Gih Minzcuz Siujyoz, bienqbaenz boux lauxsae ndaw singz gyoengq vunz lajmbanj gig hozhaenz.

Seiz youq lajmbanj, hai dou haep dou, doxgangj doxdongx, vunzmbanj cungj gvenq gangj gij vah ranzmbanj. Hoeng, haeuj ndaw singz hwnjban, gij gvenq gou couh ciemhciemh bienq lo: Ok dou cawx byaek、hwnj haw guhcaemz roxnaeuz bae cawx doxgaiq, gig noix raen vunz gangj gij Vahcuengh rwz sug youh ndeidingq, gyoengqvunz cungj gangj Vahgun lai; ndaw hagdangz hwnjdangz gvidingh aeu gangj Vahgun.

Miz duenh seizgan raezrangrang ndeu, mbouj ndaej gangj vah ranzmbanj, gou bouxvunz couh lumj dai bae buenq ndang nei, ngoenz gwn mbouj feih haemh ninz mbouj ndaek, doenghboux doengzsaeh cungj naeuz gou dwg aenvih mbouj gvenq youq ndaw singz cij nauh baenz. Yiengh- neix ngoenz bae ngoenz dauq, gou cij ciemhciemh gvaq ndaej roengz youq ndwenngoenz noix gangj vah ranzmbanj.

Hoeng, moix daengz couhmoz, gou cungj aeu dwk dienhvah hawj daxmeh, gingging gij saeh fatseng youq ndaw hagdangz. Hix cij dwg youq seizneix, gou cij ndaej aeu Vahcuengh gou maij gangj haenx caih gangj caih ging cungj mbouj rox gaeuq, ndawsim roxnyinh rimhoz caemhcaiq angqyangz.

Ngeih

Ngeix hwnj ndwen daih’it ngamq daeuj ndaw singz hwnjban, bae cawx byaek loek aeu Vahcuengh cam boux- gaibyaek seiz, loengh ndaej boux- gaibyaek gyaengjngwdngwd, mbouj rox gou gangj maz. Caj gou ngeix gvaqdaeuj le youh aeu Vahgun dauq cam baez he, yinx ndaej de cungj riuhaha.

Mizseiz ra mbouj ndaej byawz daeuj gangj Vahcuengh, gou seiz mbouj seiz couh dwk dienhvah caeuq daxmeh gangjgoj, baez daj couhdwg yaek aeu aen cungdaeuz baedauq. Daxmeh dwg boux gvaq gvenq gij ndwenngoenz gungzhoj, bingzseiz mbaet gwn mbaet yungh, guh maz cungj aeu geq cienz gvaq ndwen- ngoenz. Ndigah, ngamq dwk dienhvah hawj daxmeh ndaej song sam aen singhgiz, moix baez dwk dienhvah ngamq gangj ndaej geij faencung, daxmeh couh gaijnaeuz ndawranz hong nyaengq lai, mbouj ndaejhoengq caeuq gou gangj nyaenx lai, heuh gou mbouj miz maz saeh hung couh noix dwk di dienhvah hawj de.

Gou rox aen sim daxmeh, de mbouj dwg mbouj ndaejhoengq, dwg lauheiq sai ngaenz dwk dienhvah daiq lai, sim’in gij cienz dahlwg. Doek- laeng mboujguenj ciet iq ciet hung, gou cungj caenhliengh ra seizgan dauq ranzmbanj cunzcunz bohmeh, byaij- byaij diuz loh ndaw mbanj gou sug youh louzlienh haenx, cetcet aen suenbyaek ce miz gij rizdin angqyangz gou gvaq.

Sam

“Ai, gou yaek iek dai lo! Banhaet cij gwn aen mbacwng ndeu, seizneix couh yaek daengz banringz lo, gou lij caengz ndaejhoengq gwn ngaiz dem…… Aiyo! Gaej gangj cungj vah’ienq neix, coegrwz lai lo……”

Ngoenzneix dwg couhmoz, mbwn ndei simcingz sangj, gou aeu ci doi daeglwg iq okdaeuj dak ndit, swnh- bienh daeuj haw lauh. Byaij haeuj aen sanghcangz bakdou mbouj nanz, gou couh dingqnyi sing mehmbwk he aeu vah ranzmbanj——Vahcuengh cingq ciep dienhvah, gij vah gangj ndaej miz saek miz yiengh, raeuzrwdrwd youh miz di daeuq vunz, gou dingq le cibfaen hwnjyinx. Dingqnyi gij sing- yaem vah ranzmbanj, ndawsim gou sikhaek roxnyinh raeujrubrub, gig doxndiep. Ndigah, gou couh dengj aen ci iq daeglwg, coh gij sing Vahcuengh cienz daeuj haenx byaij bae.

Byaij daengz aen dan gai gij doxgaiq ndangdaenj mehmbwk, gou raen boux mehmbwk cungnienz cingq ndaep aen soujgih yaek cuengq haeuj ndaw daehmbeq bae. Raen miz bouxhek daeuj, de naj riunyumnyum gig yiedcingz dwk couh heuh gou byaij haeujbae yawjyawj, miz geu habhoz couh swnhbienh dawz bae sawq daenj, mbouj cawx hix mbouj youqgaenj.

Ngoenzneix ndaejhoengq couh swnhbienh daeuj haw lauh baez he, siengj mbouj daengz ndaejnyi gij vah ranzmbanj gou gig nanz mbouj ndaejnyi bouxwnq gangj, ndawsim gou youh angqyangz youh vuenheij. Ndigah, daj ndaw ci umj hwnj daeglwg, gou couh simgip caemhcaiq gikdoengh dwk dongx de: “Dahcej, ngoenzneix seng’eiq ndei lai lo!”

Raen gou baenzneix gangj, de daengx da aj bak dwk yawj coh gou, hoeng youh sikhaek riunyumnyum caeuq gou gangj:“Ndei a, gij seng’eiq gou ngoenzngoenz ndei, daengx ranz gou couh baengh gou hai aen bouq neix gai gij ndangdaenj mehmbwk gvaq saedceij ne.”

“Dingq gij vah mwngz gangj, mwngz hix dwg vunz Vujsenh ba?” Gou ciep dwk youh cam.

“Nanzdauh mwngz hix dwg?”

“Dwg ha, gou caeuq daeglwg iq neix cet byaij gvaq gizneix, couh dingqnyi mwngz aeu vah ranzmbanj cingq caeuq bouxwnq doeng dienhvah, ndigah gou couh byaij gvaqdaeuj yawjyawj.

“O! Ndaej youq gizneix bungz vunz ranzmbanj, caen angqyangz lai lo. Ndawranz gou dwg gou ceiq hung, mwngz beij gou iq lai, gou cungj mbouj roxnaj sou ban oiq neix lu!”

Ging dwk gangj dwk, gangj dwk ging dwk, dou couh roxnaj lo, miz gangj miz riu gangj daengz sanghcangz yaek gven dou bae. Dou cek fwngz seiz, gaenq doxce gij dienhvah hauhmax, lij iu naeuz baezlaeng ndaejhoengq seiz couh okdaeuj gangjgoj roxnaeuz guhcaemz.

Caen dwg gyaeu mbouj gyaeu, aen mbanj raeuz; caen mbouj caen, vunz caemh mbanj ha! Neix couhdwg faenh cingz ranzmbanj naekna gou, neix couhdwg gij cingz Bouxcuengh gou.