Fouxcuklongz Bouxcuengh, youh heuhguh“fouxfaexgyaengh”, dwg cungj foux ndawbiengz youq Dungh- lanz Yen Cangzgyangh Yangh Banj- lungz Cunh cienzlah, miz daegdiemj ndawbiengz noengzna dangqmaz.

Cungj foux neix aeu faexgyaengh raez song gyaeuj doxroq, ndaej fatok singyiengj lej haenq numq(menh) rouz(vaiq) mbouj doxdoengz; boux- yienj ne mbwk sai cungj ndaej, geq coz cungj baenz; faen miz 4 boux、8 boux roxnaeuz 10 lai boux daengj guh hu(cuj), aeu baenz doiq caez. Moix boux fwngz gaem gaiq faexgyaengh gengj(ndongj) raez 6 cik roxnaeuz 8 cik, humx aen longzfaex(ruqfaex) ndeu, roq benh liux caiq roq faex, yiengj sing okdaeuj; faen miz song boux doxroq、lawh roq、gyoengq vunz ndeu doxlawh roq daengj lai cungj. Baez fouxcuklongz caezcienz ndeu gingciengz miz 8 mbaek, baenzlawz roq (roq rouz(vaiq) roq numq(menh)) caeuq seizlawz dingz, cungj youz bouxvix bak hemq aeu, mizseiz lij boiq miz gyongnaeng、gyongluengz roxnaeuz aenlaz buenx roq, foux diuq ndaej youh haenq youh rengz, vunz diuq sim angq, miz daegsaek minzcuz noengzna lai.

Fouxcuklongz Bouxcuengh seiz- lawz hainduj, seizlawz cauh’ok, seiz- lawz baenz ndei, neix cungj mbouj miz saw geiq ndaej cingcuj caezcienz. Ciuq vunz cienzgangj, youq mboengq hainduj ne mbangj dwg vunzlai aeu cienz siusik hoenxciengq le couh cauh’ok. Seizdaih bienq le, cungj foux neix bienqbaenz vunzlai ndaw- biengz gag guh gag angq、caez hoh dajndaem ndaej lai le hozvan simdiemz. Ndigah, baez daengz gvaq cieng gvaq ciet, hwnj ranzmoq、haeuj ranzmoq、couxbawx haqlwg、dingh- caen daengj, gyoengq vunz dangdieg cungj gyaez diuq fouxcuklongz, caemhseiz lij miz vunz eu fwen, roq gyong roq laz daengj guhbuenx, ciengzmienh haenq yuk (nauhyied).

20 sigij 90 nienzdaih doxdaeuj, fouxcuklongz ndaej ok mbanj ok lueg ok rungh bae. Bi 1992, fouxcuklongz camgya Dunghlanz Yen daih’it baez“gyongluengz fwenbiengz yienjok”, caemhcaiq youq neix doxdaeuj lai baez camgya gak cungj vwnzva yisuz hozdung youz ndaw si、ndaw yienh gawjbanh haenx, neix ndaej vunzlai haenhndei.

Bi 2007, fouxcuklongz Boux- cuengh ginggvaq Gvangjsih Boux- cuengh Swcigih Yinzminz Cwngfuj baecinj, ndaej senj haeuj daih’it buek swcigih gaep feihvuzciz vwnz- va yizcanj mingzloeg.

Bi 2016, Swcigih Vwnzva Dingh goenghai daihhaj buek swcigih gaep feihvuzciz vwnzva yizcanj hanghmoeg bouxswnjcienz daibyaujsing gungh 160 boux, Dunghlanz Yen Yaz Cauz- gvangj dwg bouxswnjcienz foux- cuklongz Bouxcuengh ndaej lied haeuj ndawde bae. Neix dauqlaeng ne Yaz Cauzgvangj dwg bouxak bouxrengz henhoh caeuq swnjcienz fouxcuklongz Bouxcuengh. Daengz dangqnaj, de gungh son’gyauq ndei 80 lai boux lwgsae, neix hawj fouxcuklongz ndaej swnjcienz caeuq hwngfat lai ndei dahraix.

Ciuq cam rox, moix boux- swnjcienz feihyiz swcigih gaep haenx moix bi ndaej cienzngaenz swnjcienz 4000 lai maenz.