“Bineix makbug baenz lailai, cungj baengh cujyin daiqdaeuz ndei. Ndaem gai senhconz de cungj bang, vut gungz mbouj you caez sim’angq.” Youq dieggoek ndaem makbug ndaw nding Vanzgyangh Mauznanzcuz Swciyen Daanh Yangh caijfangj, bouxraiz dingq ndaej nyi ceiq lai haenx dwg, vunzlai seyenz haenh boux cujyin segih daiqlingx ndaem makbug ndaw nding byaij diuzroen vut gungz bienqfouq haenx. De couhdwg Vangz Hozmeij, boux veijyenz Vanzgyangh Mauznanzcuz Swciyen Gaiq Daihbet Cwnghez、boux cujyin Daanh Yangh Daanh Segih Gihveijvei.

Vangz Hozmeij bineix 48 bi, dwg boux mehmbwk Bouxcuengh youq Mbanjdangzgvanh Daanh Yangh sengmaj ndeu. Bi 2012, de ndaej doisenj bae daengz Daanh Segih dang ganbu cienmonz guh gij hong giva senglwg. Bihaenx, Daanh Yangh deng doekdingh baenz dieg guhyiengh “daengx mbanj doicaenh” Hozciz Si haifat banggungz, hix dwg dieg guhyiengh “daengx mbanj doicaenh” daih’it Guengjsae haifat banggungz. Dieg guhyiengh aeu yangh guh danhyenz dungjyiz gveihva, cingjhab swhyenz, dungjcouz cingjdaej doi- caenh haifat canjnieb、hwnjguh sezsih giekdaej、anceiq ndei gij vunzhojndoq buen bae diegwnq youq haenx, gaijgez aen vwndiz vunzhojndoq daengx yangh vut gungz. Youq ndaw aen ciuzlouzhung “yawj dieg bae guh canjnieb、byaengqhai lohnaemj daj- cauh canjnieb、cauhmoq vunqsik hwnjguh canjnieb、yungh ndei cwng- cwz haeujcoengh canjnieb、daiq- doengh vunzguhnaz caez nyoengx canjnieb”, Daanh Segih youq Mbanj- dangzgvanh hwnjlaeb dieg guhyiengh ndaem makbug ndaw nding 800 moux, cujciz 56 ranz ranzguhnaz gyahaeuj hozcozse (ndawde miz 13 ranz ranz- hojndoq、46 vunz vunzhojndoq), caeuq Guengjsae Ginhgoj Swnghdai Nungz- yez Fazcanj Gunghswh doxgap laeb- baenz “dieg guhyiengh makbug hawj Vanzgyangh gyaeundei Mauznanz Cungguek”, hix couhdwg “dieg guh- yiengh (haedsim) nungzyez daegsaek daihneix makbug ndaw nding Vanz- gyangh”, ciuq gij vunqsik “aen haedsim ndeu song aen mbanj sam aen suen seiq aen gih” douzcienz hwnjguh. Dieggoek daengxheij ndaem 3200 moux, ndawde gij giyez gunghswh daiqdaeuz haenx ndaem 1500 moux, gij hozcozse vunzguhnaz caeuq gyoengq vunzguhnaz henzgyawj de ndaem 1700 moux. Doenggvaq gij giyez daiqdaeuz haenx daeuj daiq- doengh ranzhojndoq hwngfat gij canjnieb mak、baengh guhhong vut gungz. Gij giyez daiqdaeuz haenx moix bi anbaiz daih’iek 300 ranz ranzhojndoq、1000 vunzbaez daeuj dieggoek guhhong. Seizneix, aen dieggoek neix gaenq cobouh guhbaenz gij gwzgiz hwnjguh cujciz gingh- yingzva、cangboiq sezsihva、swnghcanj byauhcunjva、yausuz cizcwngzva、daegsaek canjyezva, cugyamq dajcauh dieg guhyiengh (haedsim) nungzyez daegsaek daihneix comz nungzyez swnghcanj、swnghdai、ndwenngoenz、yawj gingjsaek、youqndwi baenz aen cingjdaej ndeu, yingjyangj daiq- doengh ranzguhnaz dangdieg doi- gvangq wngqyungh gisuz moq.

Makbug ndaw nding dwg makbug ndawde cungj binjcungj gig ndei ndeu, nohmak oiq raemx lai, soemj van gig ndeigwn, caemhcaiq gig miz yingz- yangj dem, miz haujlai gij yenzsu lienghnoix ndang vunz aeumiz haenx. Vihliux daiqlingx vunzlai dangdieg baenghgauq gisuz ndaem makbug ndaw nding, byaij diuzroen baengh canjnieb vut gungz, Vangz Hozmeij caeuq gvan de doxyaeng, bonjfaenh daiqdaeuz guhyiengh ndaem 20 moux makbug ndaw nding. Ginggvaq bae guh, de gig vaiq sugrox gaemdawz gij fuengfap gisuz ndaem makbug ndaw nding. Doenggvaq gohyoz dwk bwnh、gaj non、buenz namh、ciemz rum yunghsim bae leix, gij gomak de maj ndaej gig ndei. Vangz Hozmeij doq leix suenmak ranz bonjfaenh, doq naihsim sijsaeq bae son bang seyenz gizyawz guh ndei gij hong ganq leix gomak. Mbouj geijlai nanz, Vangz Hozmeij haengj guh gaenx guh、haengj bang vunz haenx ndaej senj guh boux cujyin Daanh Segih Gihveijvei, lij miznaj gyahaeuj Cungguek Gungcanj- dangj dem. Bi 2016 ndwen 8, de youh ndaej senj dang boux veijyenz Vanzgyangh Mauznanzcuz Swciyen Gaiq Daihbet Cwnghez. Daj neix hwnj, gij hong de engqgya nyaengq lo, baenzngoenz vih gij hongsaeh segih、guenjguh hozcozse swnghcanj、cwng- hez veijyenz hengzguh cizvu nyaengq ndaej baenqlulu, hoeng de itloh cungj mbouj miz saek coenz vah’ienq, sim- angq bae guh mbouj rox naetnaiq, youq diuzsienq daih’it gunggeng vut gungz cungj yawj ndaej raen aen ngaeuzndang nyaengqfoed de, de fatok le gij cozyung senhfungh mozfan boux gungcanjdangjyenz caengzdaej ndeu.

Goengfou mbouj vi boux mizsim. Bi 2016, dieg guhyiengh ndaem makbug ndaw nding Vangz Hozmeij mak baenz lailai, gai ndaej 380 lai fanh maenz ngaenz. 300 lai ranz ranzhojndoq henzgyawj hix aenvih makbug baenz lai demsou vut gungz. Bi 2018 ndwen 8, makbug ndaw nding Vanzgyangh aeundaej mbawcingq daenghgeiq doxgaiq reihnaz deihleix geiqhauh Guekgya Nungzyezbu; dieg- goek ndaem makbug ndaw nding Dangzgvanh Daanh aeundaej “mbaw- cingq nyinhcingq huq youjgih”. Bi 2017, swciyen yinzminz cwngfuj youh okdaiz cwngcwz gikleih, youq ndaw gvaengh daengx yienh bangrex ranzhojndoq hwngfat gij canjnieb vut gungz, baenz benq baenz benq raemj faexnganqciq ndaem mak, rengzrwd hwngfat gij canjnieb makbug ndaw nding. Seizneix, daengx yienh gungh ndaem miz 6 fanh moux makbug ndaw nding, moix bi baenz mak yawhsuenq miz daengz fanh dun doxhwnj, gyaqcienz daihgaiq ndaej mauhgvaq ik maenz ngaenz.

Bi 2015, Vanzgyangh banh ciet makbug ndaw nding gaiq daih’it, hawj gyoengq bouxsiufeiq baez daih’it cimz daengz gij feihdauh daegbied soemj van ndeigwn cungj mak neix; bi 2016, aen yienh neix baengh gij hozdung ciet makbug ndaw nding gaiq daihngeih, doenggvaq gij sibinz cigboq Guengjsae Veisi lienz sienq, youq daengx gih doiok gij vunqsik “TV+densangh banggungz”, cungfaenh leihyungh Guengjsae Veisi、Guengjsae Vangjloz Gvangjbo Densidaiz、soujgih veihsin doenghgij bingzdaiz neix, haenqrengz doigvangq gaisau caeuq gai makbug ndaw nding. Bi 2018 ndwen 9 ngoenz 19 daengz ndwen 10 ngoenz 7, Vanzgyangh youh banh ciet fungsou vunzguhnaz gaiq daih’it caeuq ciet makbug ndaw nding gaiq daihseiq, yunghsim caepcawq le baenzroix hozdung lai saek lai yiengh, lij doenggvaq Suhningz Yizgou、Ginghdungh、Dauzbauj doenghgij bingzdaiz densangh neix gai mak, doengzseiz youq Ginghdungh haiguh “Gvanj Vanzgyangh”, gai gij mak- bug ndaw nding ranzhojndoq gonq, yungh neix daeuj bangdoi vut gungz gunggeng.

Gij siusik ndei angqhoh ngoenz- ciet cienz daeuj, boux ndaem mak baedauq doxlwnh. Gyoengq vunzlai Daanh Segih engq dwg naj riu naj hai. Dauqngeix bonjfaenh byaijhwnj diuzroen baengh canjnieb vut gungz, gyoengqde nyaenx mbouj ndaej eu hwnj hot fwen gij haidaeuz bien faenzcieng neix gangj daengz haenx.

(Veiz Suicanj raiz Dahdingz hoiz)