It

Dieg gou dwg dieg rungh, cibgeij goengleix baedauq cungj dwg bya sang, gaxgonq mbouj doeng roen mbouj doeng dienh hix mbouj doeng dienhvah. Gyoengq vunzmbanj cungj bouxboux lauxsaed gaenxhong, baez ranzrongh couh bae guh hongreihnaz, mbwn laep couh haeuj ninz. Miz di goj, miz di vah, miz di saeh, cungj dwg bouxgeq naeuz yienghlawz couhdwg yienghhaenx, hawj mwngz dingq hix aeu dingq, mbouj dingq hix aeu dingq, hawj mwngz guh hix aeu guh, mbouj guh hix aeu guh.

Youq dieg gou, bouxgeq cungj naeuz, miz cungj vunz ndeu ndaw mingh de daiq miz vadauz, heuhguh minghvadauz. Bouxsai miz mingh- vadauz, miz dahsau lai, seiqvunz aeu boux neix lij naemj aeu boux de; mehmbwk miz minghvadauz, miz daegmbauq lai, seiqvunz haq boux neix lij naemj haq boux de. Mbouj rox dwg caen roxnaeuz dwg gyaj, ciuhgeq couh miz fwen baenzneix eu:

Vadauz hai ndwenngeih,

Ndingfeifei gwnz go,

Song sam ngoenz couh roz,

Ce go daengj soengsangq.

Gij fwen neix couhdwg naeuz, vadauz ndeiyawj dwg ndeiyawj, va hai mbouj ndaej geij nanz. Vunz cungj naeuz, Daegluenz ndaw mbanj couh- dwg miz mingh vadauz.

Ngeih

Daegluenz vunz mbouj hung hix mbouj sang, de mbouj suenq baenz- mbauq, mbouj rox vihmaz, dahsau couhdwg maij de gyaez de.

Bihaenx mbanj gou miz 17 boux lwgsai cuhcungh bizyez, cij miz gou caeuq daeg he ndaej bae doeg gauh- cungh, Daegluenz caeuq gyoengq doengzdoih couh maranz guhhong.

Seizhaenx ranzlawz yaek aeu bawx, dingzlai dwg bohmeh ra hawj, bohmeh raen mbanj gyae mbanj gyawj miz saek dahsau hab’eiq guh bawx, couh cawx di dangz caeuq bingj heuh mehmoiz bae cam dahsau. Bohmeh dahsau raen hab rim hab’eiq, couh heuh dahsau lingx aeu gij dangz gij bingj mehmoiz dawz daeuj, dahsau lingx aeu dangz bingj, gienh saeh neix couh suenq baenz lo. Ciep roengz- daeuj bouxgeq couh ra ngoenzndei daeuj cingj laeuj, angqangq yangz- yangz coux bawx haq lwg.

Ndaw mbanj gyoengq doengzdoih lij caengz miz saek boux ra ndaej yah, Daegluenz ndaej 20 bi seiz couh coux Dahcinj daengz ranz guh yah, seiz- haenx mbouj yungh bae dwnghgi aeu gezvwnhcwng, song boux doengz aen congz he baenz ninz, couhsuenq baenz gvanbaz lo.

Daegluenz caeuq Dahcinj guh gvanbaz bi daihngeih, Dahcinj seng dahlwg ndeu, bouxcoz baenz boh mbouj rox baenzlawz ciengx lwg, seng lwg ok ndang le, cungj dwg bouxgeq ganq lai. Miz boh miz meh youq ndawranz, Daegluenz engq mbouj yungh sinhoj, vunzmbanj doxcaeuq okbae dajgoeng, Daegluenz hix aemq daeh okbae lo.

Gyoengq doengzdoih mizmbangj bae Gvangjdungh, mizmbangj bae Sanghaij. Daegluenz miz bawxmoq caeuq lwgnumh youq ranz, de mbouj naemj bae dieggyae, de daeuj daengz Baksaek caeuq vunz guh ranzlaeuz. Baksaek dwg aen Si gaeuqgeq ndeu, seizneix cingq hwng guh ranz moq caeuq roen moq, hong gig lai. Daegluenz boux vunz neix dinfwngz ndei, de rox caep cien, rox bae naez, lij rox guh hong ganghginh dem, ngaenz hong cungj lingx ndaej beij vunzdoih lai, lij ndaej bouxdaeuz yawj naek.

Dahcinj seng dahlwg daihngeih seiz, Daegluenz maranz gvaqcieng, godaih Dahcinj daeuj daengz ranz Daegluenz, naeuz:“Nuengxgwiz ha,Dahlwg gou Dahgyaemq hix ndaej 20 bi lo, youq ranz hix mbouj rox bae gyawz ra faen ngaenz lawz, mwngz baezneix okbae, couh daiq de itheij okbae ra hong guh ba.”

Dahgyaemq heuh Dahcinj guh mehgux, Daegluenz mbouj youq ranz, mwh hong nyaengq mbouj bienh seiz, Dahgyaemq hix ciengzciengz daeuj bang Dahcinj daiqdaiq lwg, guhguh hongreih hongnaz, seizneix godaih baenzneix daeuj gouz, mbouj daiq okbae caen mbouj miz naj doiq de lo.

Gwn cieng gvaq, Dahgyaemq couh gaen Daegluenz bae Baksaek, Dahgyaemq doiq Dahcinj naeuz:“Gux, caj lwg loq hung le, mwngz hix bae Baksaek ba, youq ranz sinhoj lai.”

Dahcinj naeuz:“Ndei, mwngz sien gaen boh’au mwngz bae gonq, gvaq bi song bi dem, lwgnyaeq rox byaij le, gou couh bae gaen sou.”

Sam

Dahgyaemq vunz sang noh oiq, byoem ndaemndatndat, da ronghrikrik, boux raen boux gyaez. De daeuj daengz ndaw singz Baksaek, roxnyinh gizgiz moqsaksak, gizgiz gyaeundei, youq aen si neix, byawz hix mbouj roxnaj, laj mbouj sug dieg, baebae dauqdauq cungj aeu gaen Daegluenz.

Daegluenz co ranz youq, lij ndei, aen ranz co neix hix gaeuq gvangq, song mbaw baengz hoij youq gyang rug, couh ndaej an roengz song aen congz lo. Daegluenh ninz aen congz he, Dahgyaemq ninz aen congz he.

Haemh ndeu, gaenq hwnz lo, Daegluenz gwn laeuj fizfangfang haeuj ranz daeuj, de saemxsaemx saxsax byaij mbouj baenz yamq, bibi buengq- buengq ndwn mbouj onj. Dahgyaemq ngamq duet buh haeuj ninz, raen Daegluenz yienghneix, de riengjret daj gwnz congz saet roengzdaeuj, gvaqbae fuz Daegluenz. Daegluenz vang haeuj congz bae couh yaek ninz, Dahgyaemq raen mbouj ndei, couh bae daek bat raemxraeuj he daeuj bang de swiq din mad naj. Guh ndei gijneix, de cij umj Daegluenz hwnj congz de bae, caih de ninz vang ninz raeh.

Youq gwnz ranz, daxboh hix ciengzseiz yienghneix fiz laeuj, Dah- gyaemq hix ciengzseiz yienghneix dajleix daxboh.

Dahgyaemq youq aen gunghswh Daegluenz guhhong. Daegluenz seiz- neix gaenq dwg gunghswh bouxdaeuz iq ndeu, miz boh’au dang bouxdaeuz, Dahgyaemq mbouj yungh guh hong naek, de couh youq ndaw ranzbanh- goeng geiqgeiq soq, bae neix bae haenx banhbanh saeh couh gvaq ngoenz lo.

Ngoenz ndeu, Daegluenz mbouj raen Dahgyaemq daeuj hwnjban, de maranz yawjyawj, seizneix Dahgyamq lij ninz ndaw congz. Daegluenz gvaq- bae cam de baenzlawz yiengh lo, Dahgyaemq naeuz nohndat gyaeuj- ngunh lai, Daegluenz iet fwngz gvaq- bae lumhlumh gwnz najbyak Dah- gyaemq. Aen naj Dahgyaemq ndat lumj raemxgoenj nei, Daegluenz naeuz:“Yienghneix ninz youq mbouj baenz, aeu bae yihyen cij ndaej.” Daegluenz fuz hwnj Dahgyaemq, naemj fuz de okrog bae, Dahgyaemq byaij mbouj ndaej, Daegluenz cijndaej goengz- yongq roengzdaeuj, aemq hwnj Dah- gyaemq. Miz vah naeuz “Lwgsau 18, mak henj gwnz go, boux raen boux iet hoz”. Seizneix, Daegluenz hix rox- nyinh aen aek Dahgyaemq nem youq baihlaeng de, dwg ndat、dwg raeuj、dwg unq、dwg rang, naemj dwg maz couhdwg maz. Daegluenz naemj dwk naemj dwk, baenzlawz aemq Dah- gyaemq daengz laj laeuz hix mbouj rox, aen sim de miz di fiz lo.

Ciengz byaij henz dah, din vaq baenzlawz mbouj dwk raemx, fwnzsauj caeuq feiz cuengq youq itheij, baenz- lawz haeujsim miz ngoenz he hix rox remj. Dahgyaemq mizndang lo, de cam Daegluenz yaek Baenzlawz dajsuenq, Daegluenz naeuz:“Ciuq saedsaeh lwnh hawj vunz ndawranz dingq ba.”

Haicin seizhaenx, vadauz cingq hai hoengh, Daegluenz dauq daengz ranz, doiq Dahcinj naeuz de gaenq caeuq Dahgyaemq baenzneix baenz- neix, caih Dahcinj naemj baenzlawz yiengh couh baenzlawz yiengh. Daeg- luenz naeuz:“Mwngz naemjnaemj ba, yaek lingh haq vunz roxnaeuz youq ranz ciengx lwg. Danghnaeuz mwngz mbouj haq vunz, aen ranzcoj neix gou ce hawj mwngz, gou lij ok ngaenz ciengx mwngz caeuq ciengx song dahlwg dem. Danghnaeuz mwngz lingh haq vunz, gou hix mbouj hah, mwngz naemj ndei le soengq vah hawj gou.”

Baih he dwg daeggvan, baih he dwg dahlan, baenzlawz guh, Dahcinj mbouj hoiz vah, hix mbouj rox baenzlawz hoiz vah, de gietdingh youq ranz ciengx lwg, youq ranz guh hong, caih Daegluenz caeuq Dahgyaemq youq baihrog baenzlawz gvaq couh baenzlawz gvaq.

Daegluenz caeuq Dahgyaemq bae minzcwnggiz dwnghgi lo, doenghbi daengz ciet gvaq cieng, Daegluenz caeuq Dahgyaemq hix dauq ranzcoj gvaq, Dahcinj caeuq Dahgyaemq caemh daiz gwn haeux, gux lan cungj mbouj miz vah gangj. Daegluenz caeuq Dahcinj caemh ranz youq, song boux hix mbouj rox gangj maz, saedceij couh yienghneix gazngadngad gvaq roengzbae.

（caengz sat）