“Siuqva、ding najhaiz、hwnj najhaiz……” Ndwencieng coloeg, youq Mbanjgyauhlungz Nazcauz Cunh Fung’vangz Yangh Bahmaj Yauzcuz Swciyen ndaw aen diengzhong’iq guh haizva yungh fwngz siuq gvangq 60 lai bingzfanghmij haenx, bouxraiz haeuj ndaw ranz bae yawjraen, boux guh hongfwngz Danz Siufung caeuq haj roek boux mehmbwk ndaw mbanj cingq doxcaez nyaengq guh 200 lai gouh haizva yungh fwngz siuq, neix dwg faenh dinghdan aen hozdung lwgmbwk dauqma ranzdaiq Mbanj- bahnganz Yizhih Yangh Dava Yauzcuz Swciyen yaek banh haenx dingh roengzdaeuj.

“Seizneix, gij diengzhong yungh fwngz siuq haizva Mbanjnazcauz dan miz ranz dou aen dog, caemhcaiq dinfwngz gig ndei youq gizneix miz mingzdaeuz lo, engqlij cienz bae daengz baihrog haujlai dieg dem, dinghdan daengx bi cungj mbouj dingz gvaq. Bwzgingj、Yizhih、Fung’vangz doengh aen yangh neix, gyae daengz Sanghaij caeuq Sinhgyahboh cungj miz bouxhek dou lo.” Bouxgvan Danz Siufung Veiz Soujswngh yienghneix lwnh bouxraiz.

Danz Siufung bineix ndaej 45 bi, dwg boux mehmbwk gig coengmingz youh yawj ndaej gyae ndeu, daj iq couh riengz daxmeh caeuq gyoengq cejnuengx doxcaez nyib buhvaq、hag guh siuq. Baenzranz le bi 2008 couh bae Gvangjdungh dajgoeng, Danz Siufung aenvih bonjfaenh gyaezmaij nyib buhvaq guh siuq, ndigah de couh haeuj aen cangj san nyib buhvaq bae guhhong, baez haeujbae guh couhdwg 9 bi, de youq ndaw cangj hix laeglemx hag aeu mbangj cungj dinfwngz daegbied. Bi 2017 satbyai, song gvanbaz naemj daengz song laeq lwgnyez cungj hwnj gauhcungh lo, vihliux hawj lwgnyez hwnjhag hag ndaej engq ndei, couh dauqma ranz vuenh guh haizva, yienghneix ndaej yawj lwgnyez hagsib, goj ndaej canh saekdi ngaenz ciengx ranz. “Ngamq hainduj youq ranz guh di ndeu, bungz ngoenzhaw Bwzgingj、Yizhih couh gag aeu bae haw gai, gij haizva guh baenz haenx bingzciengz dwg gouh 75-80 maenz ngaenz, ndwen gai ndaej 4000 lai maenz ngaenz.” Danz Siufung naeuz.

Gij siuq yungh fwngz guh mbouj bingzciengz, siuq guh ndaej cingsaeq、yiengh ndeiyawj、saek lai cungj lai yiengh, daenj haeujbae mboujdan cwxcaih youh daenj ndaej nanz dem, gij haizva miz gij daegsaek conzdungj caeuq daihneix, gijndei seiznit daenj raeuj、seizndat sup hanh、doeng rumz cwxcaih、 unq mbaeu、 mbouj lau gyod de, ndaej mehmbwk gak gyaiq gyaezmaij. Siuqva、ding najhaiz、hwnj najhaiz、dienz giujhaizndaw……Danz Siufung lwnh bouxraiz, siengj guh gouh haizva ndeu, ceiq noix aeu miz roek caet yamq aeu guh. Caemhcaiq seizneix dinghdan yied daeuj yied lai, ndigah couh hixnaengz heuh gyoengq mehmbwk ranzhojndoq ndaw mbanj daeuj doxcaez siuq haizva lo, guh ndei le de bau soucawx.

Cinz Dizswngh boux hojndoq Mbanjnazliu Nazcauz Cunh neix naeuz:“Gij dinghdan Danz Siufung yied daeuj yied lai lo, de hwnjdou cingj haj roek boux mehmbwk ranzhojndoq mbanj dou caeuq de doxcaez hag siuq haiz, mwh ngamq hainduj dou lij caengz rox siuq de menhmenh son dou, lij heuh mehmbwk youq ranz daengx mbanj doxcaez hag gvaq. Seizneix dou goj rox guh, seiz gvaqcieng gij haizva gou gag siuq okdaeuj haenx de bang aeu bae gai cungj gai ndaej 6000 lai maenz ngaenz, seizneix caeuq de hag cungj dinfwngz neix, bi ndeu canh ndaej 3-4 fanh maenz ngaenz mbouj dwg gig hoj, bi 2019 vut gungz le gou ndwenngoenz gvaq ndaej engq ndei lo.”

Aenvih gaenx hag gaenx cam, Danz Siufung daj iq couh lienh baenz song faj fwngzmbaeu siuqva, bae daengz Gvangjdungh dajgoeng lij mbouj lumz hag gak cungj dinfwngz siuq haizva, gij doz youq ndaw cangj yawjraen haenx de cungj laeglemx geiq roengzdaeuj, ndaej hoengq couh yungh bit caeuq sa daeuj veh, gij najhaiz de veh haenx miz 20 lai cungj doz, caiqlij yungh gij maesiuq lai cungj saek daeuj doxdap, moix gouh haiz siuq okdaeuj gij yiengh cungj gig miz rengzhoengh, doenghduz doenghgo siuq okdaeuj lumj caenlili. Baenz gouh baenz gouh haizva gyaqciq, couhdwg Danz Siufung maqmuengh ndwenngoenz gyaeundei daengzcog. De naeuz, siuq haiz dwg cungj dinfwngz ndeu, aeu miz fuengfap daegbied, engq aeu lai lienh caeuq gig miz naihsim cij ndaej.

Seiz gangjvah, Danz Siufung baij gij gonqlaeng guh haizva okdaeuj hawj bouxraiz yawj. Cuizlik、fagnyauj、najhaiz doenghgij hongdawz caeuq caizliuh siuq haizva neix caepcawq ndei le, Danz Siufung hainduj guh gij dinfwngz ceiq youqgaenj siuq haizva——ding najhaiz caeuq hwnj najhaiz. Cij raen de aeu daejhaiz cuengq youq gwnz fagnyauj, cang hwnj najhaiz, yungh dinglik camhseiz dingh maenh, liux le aeu fagcuenq yungh maenizlungz cuenq daejhaiz caeuq najhaiz doxcaez, roengzdaeuj couh- dwg yut dinglik ok, doeklaeng yungh fagbih dub haiz, cengj hai ga haizva ding ndei haenx, ginggvaq song faj fwngzmbaeu Danz Siufung, ga haizva ndeu daihgaiq couh baenz yiengh lo.

“Diuzcag ding najhaiz itdingh aeu rag maenh, yienghneix cij maenhsaed; seiz cengj haiz, aeu yungh fagcuiz baez di baez di roq, rengz hung lai yaek cengj vaih najbaengz, rengz iq lai yiengh haiz yaek bienq mbouj baenz yawj, doenghgij hong sijsaeq neix cungj aeu daj ndaw mboujduenh guh ra raen fuengfap. Gaej yawj ga haizva neix iqetet, mbouj yungh geij bi seizgan bae lienh, gij haiz guh okdaeuj haenx couh guh mbouj hab din.” Danz Siufung naeuz.

Doenghgij haizva lai cungj lai yiengh、hawj vunz danqhaenh neix, mbat cim mbat mae cungj miz gij gyaezmaij siuqva Danz Siufung haenx. Congh cim saeqmaed, maesei myab saekrongh, dwg baengh song faj fwngzmbaeu caeuq baenz bi baenz bi bae siuq caeuq mbouj cuengq fwngz, gij simcingz dajsiuq haizva, cauh ok gij cingsaenz canghdinfwngz Danz Siufung caeuq gij ndwenngoenz gyaeundei de.

(Veiz Mingzsungh Veiz Meij- sangh raiz Dahdingz hoiz)