Ranz Loz miz cienz miz seiq, cingq hab aen sim Lauxcangh. Ndaw ranz geij daih gungzhoj, bonjfaenh youh dwg singq wnq youq aen mbanj lai singq Loz neix, mbouj miz beixnuengx daeuj baengh, mizseiz lij deng doenghgij vunz simndaem simbwn haenx hangz caeuq yawjsiuj. Baezneix caen ndei lo, ndaej cienz mbouj feiq saekdi rengz, gap aen caen’gya fouqmiz neix, mbouj rox ciuh lawz caux ndaej gij fukheiq neix, de angqvauvau sikhaek caeuq Dahlenz dwen gij saeh neix, aiq Dahlenz baez rox cungj caeuq de doxdoengz sim- angq sim maez.

Mwh Dahlenz ndaej rox gij laizyouz saeh neix le, de doiq Lauxcangh naeuz:“Gou gag miz naemjfap, itdingh mbouj lumj Dah- meiz. Caemhcaiq swhgeij gaenq miz daegyoux lo, daxboh mwngz gaej vih gou yousim.” Lauxcangh muengz cam:“Daegyoux mwngz dwg byawz?” Dah- lenz naeuz:“Dwg Loz Yungj.”

Ndaejnyi dwg Loz Yungj, Laux- cangh hozndat ndaej doq diuq hwnjdaeuj, sing hung fok Dahlenz:“Gou laihnaeuz dwg byawz dem, dwg lwgfangz neix ha, boh de gwq baenzbingh, seizneix meh de hix baenzbingh lo, ndawranz gungzndoq ndaej lumj biek gyanx nei, seizneix lij caengz guh ndaej ranzmoq, daengx ranz 5 boux vunz lij caenx youq aen ranzvax naeuh haenx. Sam daeglwg neix lij siengj aeu bawx? Mwngz siengj haq hawj Loz Yungj, gaej siengj lo, deq gou dai sou menh doxyaeng ba!”

Dahlenz doiq Lauxcangh naeuz:“Gou caeuq Loz Yungj caensim doxgyaez, dwg de ciq cienz hawj gou ranz raeuz cij guh ndaej ranzmoq, mboujnex dan baengh gou caeuq Dahmeiz, mbouj rox daengz seizlawz cij rom ndaej cienz guh ne. Ranz de lij youq ranzvax naeuh, hoeng, de nyienh ciq cienz hawj raeuz guh ranzmoq gonq ne. Gij sim’eiq de mwngz naeuz caen mbouj caen?”

“Aen nienzdaih neix simndei dij geijlai cienz? Gig mbouj yungzheih miz ranz baenzneix ndei yawj hwnj raeuz, mwngz dauq euqmanz, caen dwg fuk noix. Bouxgungz caeuq bouxgungz ciuhvunz nanz fanndang, bouxfouq daeuj mbouj gap, gvai hix dangq dwg huk. Fanjcingq gou ciuhneix deng gungz lau lo, mwngz caiq mbouj dingqgangj, cij ndaej raen seihaiz gou lo!” Dingq daxboh hujdengdeng sing hung fok, Dahlenz naengh youq gwnz daengqraez ndaw ding ngaez lo, song da maezfwdfwd muengh bae gizgyae.

“Lenz ha, couh ei daxboh sou luba, haujlai bi daeuj gou baenzbingh mbouj ndaej guhhong, dwg daxboh sou sinhoj ciengx sou majhung, lijaeu ciuqgoq gou dem, de gvaq ndaej gig mbouj yungzheih.” Ndaw rug cienz daeuj gij sing daxmeh youh iq youh nyieg. Dahlenz caiq hix nyaenx mbouj ndaej lo, de doq buet haeuj ndaw rug bae, gotdawz daxmeh sing hung daej hwnjdaeuj. Daxmeh iet song fwngz byomroz de lumhlumh aen gyaeuj Dahlenz, danq heiq mbouj dingz. Hoeng, de hix mbouj rox caiq gangj maz dem lo.

Dahlenz vunz gvai simsoh youh gaenx hong, mboujdanh Loz Yungj caeuq Loz Sauswh gyaez de, caemh miz haujlai daegmbauq gyaez de, cij mbouj gvaq ndawsim Dahlenz dan miz Loz Yungj boux vunz ndeu ndwi, caiq hix yawj mbouj hwnj bouxwnq lo.

Loz Sauswh naj na, ngoenzngoenz daengz ranz Dahlenz baenq bae baenq dauq, riuj noh riuj laeuj bae caeuq Lauxcangh ndoet laeuj gangjgoj, gangj vah van vah diemz daeuj lox Dahlenz haisim, lij bang guh hong neix hong haenx dem. Raen neix Lauxcangh sim’angq ndaej bak haep mbouj hwnj bae, Dahlenz mbouj leixlangh, gwq nyaeuq bwnda yienh ndaej nanzsouh raixcaix.

Loz Yungj rox gij saeh neix le, doiq Dahlenz naeuz:“Lenz, caez youq ndaw mbanj mwngz hix rox, Loz Sauswh gaenx gwn gik guh, ngoenz- ngoenz caeuq bang baengzyoux he dauqcawq youz gyok bae guhdoj, ndoet laeuj fiz le lij rox moeb vunz. Vahsug naeuz beixnuengx raemx- mboq, bohmeh raemxrongz, ciuq yienghneix roengzbae, bohmeh de caux ndaej gij cienzcaiz baenzboengj aiq mbouj geij nanz mbouj deng de saengq seuq cij gvaiq.”

Dahlenz duixgyaeuj roengzdaeuj mbouj oksing, daxboh de aeu dai daeuj bik, daxmeh de baenzciuh baenzbingh ninz congz baenzneix hojlienz, de seizneix mbouj ndaej naemj baenzlai lo, de gietsim cuengqfwngz doj baez ndeu.

Dahlenz ndawsim gig fukcab, daj iq Loz Yungj couh doiq de gig ndei, saehsaeh bang de, de hix caensim gyaez Loz Yungj, hoeng baez naemj daengz bohmeh, de sim’unq lo, mbouj rox gangj maz cij ndei.

Raen Dahlenz mbouj oksing, Loz Yungj miz di doeknaiq lo, doxbiek seiz naeuz:“Gou rox ndawsim mwngz baenzlawz naemj lo, song fanh maenz ngaenz ciq hawj mwngz guh ranzmoq haenx gou mbouj aeu lo, suenq gou bang mwngz ba. Mwngz aeu geiq ndaej, ngoenzcog mboujguenj baenz- lawz yiengh, aen sim gou ciengxlwenx miz mwngz.” Gangj sat cienq ndang couh buet deuz lo.

Muengh aen ngaeuz baihlaeng Loz Yungj yied bae yied gyae, aen sim Dahlenz fubfab mbouj dingz, van soemj haemz manh caez cungj nyoengx hwnj simdaeuz. De danq gaemz heiq raezrangrang ndeu, song da hix mbouj rox seizlawz gaenq mbaeqsubsub lo.

Haq hawj Loz Sauswh le, hainduj de doiq Dahlenz ndei raixcaix, caen lumj de caeuq bohda gangj yienghde bw! Hoeng, mbouj gvaq geij nanz le, Loz Sauswh couh yienh gij yiengh gaeuq okdaeuj lo, daengxngoenz okbae guhdoj mbouj raen ngaeuz, mizseiz guhdoj saw cienz le couh ndoet laeuj fizfwdfwd cij dauq. Baez ma daengz ranz le, doiq Dahlenz mbouj dwg sing hung vet, couhdwg fwngz moeb din dik, Dahlenz gwnz ndang ciengzciengz mbouj dwg gizneix heu couhdwg gizhaenx aeuj. Seizhaenx Dahlenz ngamq seng dahlwg Lulu, muengh aen naj iqet ndeigyaez neix, Dahlenz caen mbouj rox baenzlawz guh cij ndei.

Gijneix lij mbouj suenq, Loz Sauswh guhdoj baenzyinx, Dahlenz hix guenj mbouj ndaej de, gyagoeng hai meizgvang ndaej gij cienz haenx song sam bi couh deng de guhdoj sai sat lo, lij dauqcawq ciq cienz daeuj guhdoj, hwnzngoenz miz vunz daeuj ranz bik caiq boiz ngaenz.

Dahlenz siengj caeuq Loz Sauswh doxliz, Loz Sauswh laihdai mbouj nyienh, haep naeuz danghnaeuz Dah- lenz gamj doxliz, couh aeu mid gaj ranz vunz de bae caez……

Vahgangj Loz Yungj caeuq Dahlenz doxbiek le, roxnyinh dangh- naeuz ranz de miz di cienz lauheiq daxboh Dahlenz couh nyienh haq dahlwg hawj bonjfaenh lo, ndigah couh laemxsim guhhong, roengzrengz bae buek guh. Doeklaeng de couh youq ndawsingz hai ndaej aen gunghswh ndeu, lij cawx ranz cawx ciiq dem. Loz Yungj yienznaeuz youq rog, hoeng gij saeh Dahlenz de hix rox lo, de gig sim’in Dahlenz, cij mbouj rox baenzlawz bae bang de.

Doeklaeng Dahlenz dauqdaej roengz gietsim caeuq Loz Sauswh doxliz lo. Ndaejnyi aen siusik neix le, Loz Yungj couh yaep he hix mbouj nguh dwk bae ra Dahlenz.

Loz Yungj baez raen Dahlenz couh naeuz:“Miz haujlai dahsau baenq youq henz ndang gou, hoeng, gou cungj roxnyinh mwngz caeuq gyoengqde gig mbouj doxdoengz ne. Mbouj gangj gijneix lo, gou rox mwngz gaxgonq deng bik cij haq hawj de, gou rox mwngz doiq gou dwg caensim. Caemhcaiq, hix cingj mwngz cuengq- sim, cijaeu mwngz ngaekgyaeuj, gou couh maz cungj mbouj geiq, gou itdingh doiq Lulu dang lwg bonjfaenh nei bae gyaez bae ganq. Dahlwg lij iq, cijaeu gou doiq de ndei, de hix mbouj rox yiemz gou ne.”

Dahlenz ngiengxgyaeuj muengh- yawj Loz Yungj, raemxda mbouj rox seizlawz gaenq doekdedded roengz- daeuj lo.（sat）