Haemh gaenq laep lo, mbouj rox dwg mbouj dwg duznon ciuz yied daeuj yied yiengj, Lauxlij youq gwnz mbonq foekfan lij caengz ninz ndaej ndaek. De naemj: Ngoenzcog yaek baenzlawz banh ha?

Ngoenz daihngeih, ndit gyang- haet ciuq haeuj binghfuengz, husw daeuj bang Lauxlij vuenh yw, ngamq gungj roengz hwet Lauxlij couh nyiegnyieg cam naeuz:“Husw a, lwg gou bae gyawz lo? Baenzlawz mbouj raen gyoengqde ne.” Husw doq vuenh yw doq riunyumnyum naeuz:“Gaej lau, gyoengqde couhdwg miz di baeg caeuq iek lo. Haemhlwenz gyoengq lwg mwngz ciuqgoq mwngz youh haeujsim youh sinhoj. Doiq mwngz baenzneix ganqhoh, dou cungj gag naemj beij mbouj hwnj lwg mwngz ne, youh haenh mwngz miz gyoengq lwg ndei yienghneix hauqswnh. Mwngz caen dwg miz fukheiq ha!”

“Fukheiq? Fukheiq! Dwg ha, gou miz gyoengq lwghauq neix hix dwg fukheiq gou, geij ngoenz neix lumj deng ndit ciuq nei, sim hix raeuj- rubrub, hoeng couh lau gou yiengjsouh ndaej mbouj geij nanz lu. Yah gou gaenq liz gou bae lo, seizneix lwgda gou couh lau yawj mbouj raen gyoengqde, rwz gou lau dingq mbouj nyi vah gyoengqde, uk gou lau geiq mbouj hwnj gyoengqde……” Lauxlij doq danqheiq doq geqhaemz. Husw nai naeuz:“Gaej lau, mwngz mbouj rox miz maz saeh. Gou bang mwngz rag hai yiemhcueng, hawj mwngz ciuqciuq ndit, simcingz mwngz hix rox ndei di.”

Dwg a, neix aiq dwg de youq yihyen baez doeklaeng yiengjsouh gij raeuj ndit dak luba.

Mbouj geij nanz, aen siusik cienz daeuj, Lauxlij ndaej yw ndei lo, banringzgvaq couh ndaej ok yihyen, lwg Lauxlij hix youh yaek lizhai gizneix dauqbae nyaengq gij hong gyoengqde lo.

Seizneix, Lauxlij gag boux youq ndaw ranz, youh siengj caiq coux bat raemxgyoet swiq ndang, baenzbingh baez ndeu. De cij miz aen banhfap neix cij ndaej lai raen gyoengq lwg de.