Song cou neix daeuj, daeglwg lwnz cungj maij dwen baema ranzdaiq lauh. Ngoenzneix dwg singhgizroek, mbwn ndei cingqngamj gou youh ndaejhoengq, couh daiq daeglwg daj ndaw singz naengh banci cigsoh coh ranzdaiq bae lo.

Gaenq haeuj seizcou ndaej mboengq he lo, banhaet liengzsisi, rog cuengci dwg gij mokhau banhaet nanetnet, lumj gaiq baengzhau daj gwnz mbwn gub roengz lajnamh daeuj, yawj mbouj ok gij funghgingj rog cuengci dwg baenzlawz yiengh.

Ci hai le 50 geij faencung couh dap dou ma daengz gyaeujmbanj lo. Dou roengz ci daeuj seiz, gij mok hausak cingq menhmenh sanq bae, loh ok gij vagut henjgim maj youq henz loh. Daeglwg diuqyetyet couh bae mbaet gij vagut henj ndaej ronghda. Yaep he couh raen daeglwg mbaet ndaej gaem vahenj daekeiq fwngfwng riuhehe daj ndaw cazrum byaij okdaeuj, doiq haiz de gaenq deng raemxraiz dwk ndaej dumzsisi lo. Lau daeglwg aenvih haiz dumz dengliengz, gou sikhaek gaem gen daeglwg rag hwnj de dauqranz vuenh haiz. Gij mbanjranz youq dangnaj lij dwg myoxmyatmyat, yawj mbouj cingcuj, gij mok lij lumj dwg gij hoenz daj ndaw conghheuq oenq okdaeuj nei fan hwnj fan roengz. Yaek byaij daengz ranz seiz, yawjraen daxboh yien duzcwz yaek aeu bae henz dah langh. Raen daengz duzcwz, daeglwg angq ndaej diuqyetyet hwnjdaeuj. Hoeng, fouznaih haiz de dumz lo, ndigah gou aeu daiq de bae vuenh lingh doiq haiz cij ndaej hawj de bae gaen daxda langh duzcwz.

Bae ranz vuenh haiz ndei, dou song mehlwg couh bae henz dah ra daxboh. Naeuz ndaej bae ndemq cwz, daeglwg itloh aeu sim’angq ndaej aeu gij sing oiqepep de “momo……” ngw duzcwz hemq dwk. Caengz byaij daengz henz dah, dou gyae’gyae mumjgyumq yawjraen duzcwz cingq youq henz dah. Byaij daengz loq gyawj di, couh raen duzcwz neix cingq dwg duzcwz ranz gou, de cingq ngiengxgyaeuj iet hoz coh dou muengh daeuj. Yawjraen duzcwz daeglwg hemq ndaej engq deih lo, duzcwz aiq nyinhnaeuz dwg miz cwzdoih roxnaeuz cwzlwg daeuj ra de, de hix ngiengx- gyaeuj hwnjdaeuj “momo……” hemq dwk. Seizneix ndit menhmenh cik okdaeuj, mok lij caengz sanq bae seuq, raen gij ndit daj gwnz dingjbya ngeng cik daengz henz dah, couh lumj cienfanh diuz giemqngaenz baiz- redred baek roengz ndaw namh nei. Dou seiqlengq muengh le muengh, hix mbouj yawjraen daxboh youq gyawz, aiq bae cet reih luba. Dou song mehlwg cijndei youq henz cwz lah dwk caj daxboh.

Cib lai faencung gvaqbae le, lij caengz raen daxboh dauqma, dou song mehlwg youq gizdieg dawz duzcwz ndaej mbwqmbatmbat. Ndwn ngonz duzcwz, gou fatyienh duzcwz caenh maij beng diuz cag lamh iet linx bae gwn gij nywj lai gyae haenx. Caiq sijsaeq baez yawj, gou nyinhnaeuz diuz cag duzcwz cuengq ndaej dinj lai lo, hawj de hoj ndaej gwn daengz gij nywj gizgyae. Caiq yawjyawj, raen bangx dingdaeg lij geuj miz geij gien cag, gou couh gej hot cag geuj youq bangx dingdaeg haenx okdaeuj, hawj diuz cag cug duzcwz haenx bienq ndaej lai raez di. Hoeng, diuz cag cug duzcwz bienq raez lo, gou raen duzcwz youq baihswix gwn le song sam gaemz, youq baihgvaz gwn le song sam gaemz, de youh hainduj iet hoz beng diuz cag haenhaen iet linx yaek bae yap gwn gij byainywj gizgyae lo.

Mbouj geij nanz, daxboh daj baih haenzdah ngauj dauqma lo. De raen gou cuengq diuz cag cug duzcwz guh raez lo, couh doq suk diuz cag dauq doq hat naeuz gou guh saeh mbouj gvaq uk. Suk ndei diuz cag le, daxboh youh bienq sing unq lwnh naeuz gou:“Mwngz dawz diuz cag neix cuengq baenzneix raez le, duzcwz couh mbouj ansim gwn gij nywj seiqhenz lo. De cungj siengj bae gwn gij nywj lai gyae haenx. Caiq gangj mwngz cuengq diuz cag raez le, duzcwz dawz cag baez rag, mbouj haeujsim geuj deng ndaek rin、go faexdaemq bangxhenz roxnaeuz doenghgij doxgaiq wnq, duzcwz couh aeu deng cag geuj ga roxnaeuz laeg deng hoz, neix couh ra saeh hung gaenlaeng lo.”

Daxboh dawz diuz cag cug dinj le, duzcwz youh beng le beng diuzcag, cak dwk goenjgauj le geij baez raen mbouj miz saekdi yungh, de hix couh ngaemgyaeuj naeksim ndeindei gaet gij rum dangnaj hwnjdaeuj. Caj daengz yaek baema seiz, dou daeuj yien duzcwz, raen aen dungx duzcwz gaenq gwn ndaej nduenlili lo. Caiq yawj gij nywj duzcwz gwn gvaq haenx, gij rum deng de gaet gvaq lumj aeu gihgi gvej gvaq nei, miz di rum lij deng ngenj daengz doenj bae lone.

Caeuq daxboh yien duzcwz dauqma, gou ndawsim cungj mbouj daengx. Daxboh guh le baenz ciuh hongnaz, seizcin seizcou dawz vaiz gaem cae, de rox duzcwz maij mbouj lauxsaed bae gwn gij nywj henz ndang, cij siengj cak hai diuz cag cug geuj haenx bae gizgyae gwn gij nywj gag nyinhnaeuz lai ndeigwn haenx. Langh dawz cwz laengz youq aen gien he, mbouj hawj de bae gyae, de couh lauxlaux saedsaed bae gwn imq, mbouj dwg neix gaet gaemz haenx ngenj gaemz, roxnaeuz cij yap gwn di byainywj couh aeu vuenh aen dieg lingh gaet di, yienghneix couh begbeg saiyaix gij seizgan gwn nywj lo.

Caeuq daeglwg naengh banci dauqma ndaw singz, gou mbouj rox mbouj nyinh ngeix daengz: Diuz cag muzbyauh vunz raeuz wngdang hix aeu yienghneix, mbouj ndaej cuengq daiq raez. Raeuz bae dingh gij muzbyauh ciuhvunz, dingh ndaej daiq raez, mbouj yungzheih ndaej saedyienh, baez nanz couh gag naemj sam naemj seiq, naemj lai couh yungzheih doeknaiq, guh saeh couh doeng guh di sae guh di, doeklaeng yiengh ndeu cungj guh mbouj baenz. Danghnaeuz raeuz lumj daxboh gou doxdoengz, dawz diuz cag muzbyauh cug ndaej dinj di, moix ngoenz cungj ngaem- gyaeuj naihsim guhhong, mboengq he couh ndaej saedyienh aen muzbyauh dinj bonjfaenh lo, baenzneix youh caiq laeb aen muzbyauh dinj moq. Raeuz rox dawz ciuhvunz raezrang faen baenz geij duenh, moix duenh laeb aen muzbyauh dinj he, cin bae cou dauq, baez aen baez aen bae saedyienh, mbouj yousim hix mbouj simgip, mboujguenj youq gyawz, doeklaeng aiq rox bienq ndaej gig maenh’ak.