Fwenha Bouxcuengh miz youq gih raeuz ranghdieg doxnem youq baihdoeng Majsanh Yen caeuq Sanglinz Yen, daihbouhfaenh cienz- lah youq ranghdieg Bouxcuengh youz Majsanh、Sanglinz、Yinhcwngz daengj sam aen yienh neix doxgyau haenx; ndawde baihdoeng Majsanh Yen Gujcai、Gyahfangh、Lijdangh caeuq Gujlingz daengj yanghcin dwg ranghdieg comz miz lai; vunzlai Bouxcuengh heuhguh“fwenha”（hoiz baenz Vahgun eiqsei dwg“sing doxha”）. Fwenha Bouxcuengh ceiq caeux youq Ciuhdangz Ciuhsung couh miz, daengz Ciuhmingz Ciuhcingh hwnghoengh.

Fwenha Bouxcuengh youq ndaw biengz Bouxcuengh cienz ciengq, ciengq saedceij、guhhong、doxgyau guh’angq、 guhyoux、 couxbawx haqlwg、hai ranzcai caeuq baiqbaed daengj, ndawde guh couxbawx haqlwg、hai ranzcai caeuq baiqbaed daengj yizsi lai hungnaek; gij fwen neix neiyungz yienh’ok doenghgij daegdiemj vwnzva Bouxcuengh gven- daengz saedceij、guhhong、fungsug、sibgvenq daengj, gangj ok le vunz Bouxcuengh baenzlawz roxyiuj caeuq gyaepaeu saedceij gyaeundei, yienh’ok doenghgij daegdiemj cing- saenz Bouxcuengh cojmiz haenx couhdwg gag aeu ak mbouj daengx、simhai sim’angq cungj aeu lai ndei. Fwenha Bouxcuengh dwg vwnzyoz bakgangj Bouxcuengh, de haenh doenghgij caen、ndei、gyaeu ndaw saedceij, vetfad doenghgij gyaj、yak、nyauq ndaw saedceij, dwg gaiq bauj yisuz minzcuz ndawbiengz.

Fwenha Bouxcuengh miz sam aen singbouh, singbouh daih’it、daihngeih daibyauj singdaeuz, youz bouxciengqdaeuz ciengq, singbouh daihsam dwg doihhabciengq youz song boux doxhwnj gyoebbaenz haenx riengz ciengq, singbouh daih’it、daihngeih yaemdiuh gagdog, sing- bouh daihsam boiq sing riengz singq. Fwenha Bouxcuengh sam aen sing- bouh gak aen gagdog youh doxha doxboiq ndaej ngamjndei, neix youq ndaw fwenbiengz lajmbwn cungj noix raen. Fwenha Bouxcuengh ndaej heuhguh“bienq rin lix”fwen Boux- cuengh, fatyienh de le couh ndaej bouj gizhoengq saujsu minzcuz baihdoengfueng mbouj miz fwen lai singbouh.

2008 nienz 6 nyied, fwenha Bouxcuengh ginggvaq Gozvuyen baecinj, ndaej liedhaeuj daihngeih buek guekgya gaep feihvuzciz vwnzva yizcanj gya’gvangq mingzloeg.

Lai bi daeuj, fwenha Boux- cuengh lai baez camgya Nanzningz Gozci Minzgoh Yisuzcez daengj gij yienjok hungmbwk, caemhcaiq bae daengz Yizbwnj、Hanzgoz、Aihgiz、Fwnhlanz daengj cib lai aen guekgya biujyienj, ndaej bouxyawj haenh- ndei.