Mbanjfunghvuengz dingzlai vunz singq Loz, hoeng ranz Lauxcangh cix singq wnq, goengcoj de mbouj rox daj gyawz buen daeuj gizneix youq roengzdaeuj.

Vahsug naeuz “vunz mbouj lau gungzhoj, ceiq lau bingh doz ndang”, vunz baez baenzbingh, gwn maz cungj mbouj miz feih, ndawranz cungj boeksanq caez. Mehyah Lauxcangh baenzbingh ninz youq gwnz congz, mbouj ndaej guhhong lij aeu ciengzseiz sai ngaenz bae yw bingh caemhcaiq aeu vunz bae ganq, ndawranz gungzhoj dangqmaz. Dahlwg hung Dahlenz doeg sat cuhcungh couh maranz, doq bang daxboh guhhong, doq ciuqgoq daxmeh.

Doeg cuhcungh seiz, Loz Yungj caeuq Dahlenz caemhban, daxboh Loz Yungj hix baenzbingh, bi daengz haemh ninz congz mbouj ndaej hwnq. Cingzgvang ndawranz dox- doengz, ndigah songde daj iq couh gig depgaenh.

Boh Dahlenz ciengx miz song duz max, cienmonz bang bouxwnq cae reihnaz roxnaeuz daeh doxgaiq aeu cienz, Dahlenz haemhhaemh cuengq- hag le couh hwnj bya bae gvej nywj dauqdaeuj gueng duzmax.

Ranz Loz Yungj ciengx miz duz cwzdaeg hung he, songde ciengzciengz doxiu hwnj bya bae gvej nywj. Lwgmbwk baenzlawz hix mbouj beij lwgsai miz rengz, Loz Yungj gvej ndaej nywj cang rim aen loz bonjfaenh le, couh bang Dahlenz gvej nywj. Ngoenzsinggeiz songde youh itheij bae ndaw ndoi raemj fwnz, Loz Yungj riengjret lumj duzlingz nei bin hwnj gwnz faex bae raemj fwnz, Dahlenz couh youq laj gofaex comz fwnz cug fwnz. Songde doxbang guh ndaej gig vaiq.

Miz ngoenz ndeu, Loz Yungj iu Dahlenz okdaeuj daengz laj gorungz gyaeujmbanj, naeuz:“Dahlenz ha, youq ranz guh nazreih ndit dak fwn rwed dwgrengz mbouj suenq, hix mbouj rom ndaej saek faen cienz, bi daengz haemh ngamq gaeuq gwn mbouj lw maz. Mboujnex raeuz caez okbae dajgoeng suenq lo, yienznaeuz aiq hix mbouj canh ndaej geijlai, hoeng, cungj beij youq ranz gwq deq mbwn muengh fwn ndei.”

Dahlenz naeuz:“Seizneix song dahnuengx gou lij doegsaw, daxboh gou boux ndeu hong nyaengq, mbouj miz seizgan ciuqgoq daxmeh gou, gou seizneix caengz ndaej bae, caj bi song bi dem.”

Loz Yungj cijndei gag boux ndeu bae Guengjdoeng lo.

Gvaq song bi le, Dahmeiz caeuq Dahfangh song dahnuengx cuhcungh bizyez lo, yienznaeuz mbouj aeu hawj yozfei, hoeng ndawranz mbouj miz ngaenz caiq soengq songde bae doegsaw. Ndigah, songde couh youq ranz caeuq daxboh guhhong, hawj dahcej Dahlenz bae Guengjdoeng riengz Loz Yungj dajgoeng.

Youq baihrog dajgoeng yienz- naeuz sinhoj, cungj beij youq ranz ndei lai lo, baez daengz ndwen couh miz ngaenz haeuj fwngz. Youq ranz guh nazreih, sinhoj ndaem roengzbae youh aeu nyinhcaen ganqleix, mbouj- nex doeklaeng couh begbeg sai goengrengz ndwi lo.

Baez haenx Lauxcangh bae cunz naz, raen bouxwnq cingq nyaengq- nyaennyaen dwk yw gaj nyaenh. De raen gaiq naz de mbouj miz geijlai duznyaenh, couh gik bae sai ngaenz cawx yw daeuj dwk. Byawz rox duznyaenh yied sanj yied lai, daengz seizcou, gaiq naz de mbouj miz saek naed haeux fag, roz dai lumj deng feizcoemh nei, Lauxcangh baez ndatheiq diemj boeg feiz he coemh bae seuqsat. De doq coemh doq vet:“Ced meh mwngz, gaej gangj baenzneix dwgrengz caeuq cienz cawx vafeiz lo, lienz ngaenz cawx haeuxceh cungj mbouj dij ndaej doxdauq!”

Ndwen daengz lingx ngaenz, Dahlenz cawz le ce di cienz gaeuq bonjfaenh sawjyungh, gizyawz cungj geiq maranz hawj daxboh. Lauxcangh lai miz faenh souhaeuj neix le, ndawranz yungh cienz couh soeng ndaej lai lo. De siengj bae naemj dauq, gietdingh heuh Dahmeiz riengz Dahlenz bae dajgoeng, cij ce dah’iq Dahfangh caeuq de youq ranz guhhong caeuq ganqhoh mehyah couh gaeuq lo.

Lwg rox ra ngaenz lo, Lauxcangh gig muenxeiq, de bungz vunz couh daekeiq fwngfwng naeuz:“Byawz naeuz ciengx lwgmbwk mbouj dij, yawjyawj gij lwgsau ranz gou, hauqswnh youh rox ra cienz, sou yawjyawj ranz gou seizneix bienq ndaej baenzlawz yiengh lo!” Laux- cangh angq dwk gangj ndaej myaiz sinzfoenfoen, gyoengqvunz dingq le cungj yaengx hwnj mehfwngz.

Caen dahraix, daj Dahlenz caeuq Dahmeiz bae Guengjdoeng dajgoeng le, Lauxcangh ndaej lid sam gongh ranzvax vaihvadvad haenx bae lo, hwnj ndaej sam gongh song caengz ranzlaeuz moq.

Haeuj ranzmoq ngoenzhaenx, Lauxcangh beij byawz cungj angq, youq ranzvax hojyouq lai, daegbied dwg yaek doek fwn seiz, daengx ranz vunz cungj yousim riri. Mizdi gwed gvak bae laj yiemhranz gvak namhsoiq caeuq rin iq hwnjdaeuj, lau raemx- mieng dumh giekciengz namh yungz ranz lak; mizdi muengz ra doengj caeuq bat daeuj baij ndei coux raemxfwn, mboujnex ndawranz couh bienqbaenz raemx rim fubfab, lumj gamj raemx nei. Bingzseiz duzmeuz youq gwnz ranz coemj nou, gij vax dingjranz hix deng biengjhai lo, baenzlawz coih cungj coih mbouj bienh.

Ceiq hawj vunz roxnyinh fouz- naih couhdwg ndaw mbanj dingzlai ranz cungj guh hwnj ranzlaeuz moq lo, baez daengz cieng gyoengqvunz cuengq bauqrengh, sing bauqrengh rwenz gvaq byaimbwn, hwnj hoenz geujneuneu hoemq gvaqdaeuj. Gyoengq nou deng hwk ndaej lumj deuzmingh nei cienzbouh ndonj haeuj ranzvax Lauxcangh daeuj, doeng ndoj sae con, gyaep hix gyaep mbouj deuz, gyaep duz neix okbae le, duz haenx youh ndonj haeujdaeuj……

Ranzvax vaihvadvad yienznaeuz mbouj ndei youq, hoeng mizseiz doek fwnraq roxnaeuz bongj rumz hung seiz, Goeng daeuzmbanj cungj daeuj daengz ranzvax ndomqyawj, heuh de bae giz dieg onjdingh he youq, lumj gij gyausiz hagdangz daengjdaengj. Goeng daeuzmbanj lij doiq Lauxcangh naeuz:“Ranz mwngz dwg ranzgaeuq, danghnaeuz miz cienz guh ranz moq hwnjdaeuj goj ndaej miz bouj- diep……” Youq aen ranzvax naeuh baenz yienghneix, Lauxcangh rox- nyinh miz di mbouj ndei eiqseiq, gag guhhong ciengx sam dahlwg, mehyah gwq baenzbingh lij sai ngaenz bae yw, guh bouxgvan guh daxboh, couh mbouj wnggai yienghneix hawj yahlwg riengz gwn hoj, hoeng de mbouj miz geijlai bonjsaeh, youh miz maz banhfap ne?

Seizneix ndei lo, ciengx dahlwg hung le rox ra gwn ra cienz, ndaej fanndang lo, lumz hoj naemj diemz, Lauxcangh ndawsim beij gwn dangzrwi lij diemzsisi.

Saedceij cix mbouj dwg yiengh- neix ciengxlwenx onjdingh roengzbae, bae Guengjdoeng bi daihngeih le, Dahmeiz mbouj dingq Dahlenz gangj, de muenz Dahlenz laeglemx caeuq daegmbauq sengjrog he damzyoux. Caemhcaiq laeglemx riengz daeg- mbauq haenx dauq ranz de bae gvaq, gizhaenx seiqlengq cungj dwg bya, cijmiz ranz daegmbauq hoh ndeu, fwzrwgrwg, caemh mbouj doeng goengloh, lohgemh ngutngeuj gumz- gamx gig nanz byaij. Dauq baez ranz he aeu byaij haujlai nanz cij daengz.

Caj Dahlenz caeuq Loz Yungj ndaej rox gij saeh neix seiz gaenq nguh lo, Dahmeiz naeuz de seizneix gaenq mizndang lo, itdingh aeu riengz daegmbauq haenx.

Lauxcangh rox le gig ndatheiq, de naeuz Dahmeiz haq ndaej baenzneix gyae, lauheiq ciuhneix bonjfaenh nanz daengz gizhaenx, ciengx dahlwg neix caen mbouj dij. Dahmeiz haq bae sengjrog, Lauxcangh gig yousim, de caen lau Dahlenz hix caeuq Dahmeiz doxdoengz, haq bae sengjrog. Baenzneix yawj daeuj caen mbouj wnggai hawj song dahlwg neix okrog bae dajgoeng ha!

Lauxloz ndaw mbanj dwg ranz hai meizgvang, daengx mbanj suenq ranz de ceiq miz ngaenz lo, daeglwg dog de Loz Sauswh gaenq bek aek doiq Lauxcangh naeuz de gyaez Dahlenz, danghnaeuz Lauxcangh nyienh hawj Dahlenz haq hawj de, itdingh hawj Dahlenz ciuhvunz neix gvaq ndaej vuenyungz.

（caengz sat）