Vih fatyiengz caeuq swnjcienz vwnzva Bouxcuengh, mboengqneix, Hozciz Si Yizcouh Gih Saedniemh Siujyoz caeuq Aen Hagdangz Saed- niemh Song Saw Vah Bohlanj Lozdungh Cin Yizcouh Gih doengzcaez haiguh aen hozdung cawjdaez hamj hagdangz hwnjdangz.

Gyoengq lauxsae hagseng Aen Hagdangz Saedniemh Song Saw Vah Bohlanj ndang daenj buhvaq minzcuz gyaeundei moqsag, lauxsae hamj hagdangz hwnjdangz haenx hwnj dangzgoq sonhag caeuq minzcuz vwnzva mizgven ndeu hawj gyoengq hagseng. Gyoengq hagseng angqvauvau caeuq lauxsae guhcaemz, roxyiuj le haeuxnaengj haj saek、aendomq、fouxsaux、aennyenz daengj minzsuz vwnzva. Mwh hwnjdangz, lauxsae son hagseng veh gyaeqnding、veh gij byaek mak daegsaek Guengjsae. Gyoengq hagseng youq aen gyaeq veh doz le, couh doxdub gyaeqnding angqyangz dangqmaz. Ndaw ranzsonsaw Aen Hagdangz Saedniemh Song Saw Vah Bohlanj、gwnz cauhcangz nauhyied raixcaix, sing riu mbouj dingz mbouj duenh, gyoengq lauxsae hagseng doenggvaq eu fwen、veh gyaeqnding、dwkdomq、diuq fouxsaux daengj minzsuz hozdung, youq hag vwnzva cihsiz doengzseiz, roxnyinh gij yinx- daeuz “sam nyied sam Bouxcuengh” ngoenzciet cienzdoengj.

Boux yaucangj Aen Hagdangz Saedniemh Song Saw Vah Bohlanj naeuz, dangguh aen hagdangz saed- niemh Cuengh Gun song saw vah, aen hagdangz neix coglaeng yaek haiguh engq lai hozdung miz minzcuz daegsaek, hawj hagseng roxyiuj gij fungsug Bouxcuengh, fatyiengz caeuq swnjcienz vwnzva Bouxcuengh, haenq- rengz cauhlaeb aen hagdangz miz minzcuz daegsaek.

(Dwng Yinzcauh)