Vahsug naeuz: Roen gyae rox rengz max, gvaq nanz rox sim vunz. Coenz vah neix baenzlawz ndaej daeuj ne? Gou lwnh aen goj he hawj caezgya dingq.

Roen’gyae caeuq Rengzmax dwg lauxdoengz, daj iq couh caez guh- caemz, caez doegsaw, yienghsiengq maj ndaej gig doxlumj, lumj lwg- songseng nei. Songde cungj gyaez gangjriu, hix gyaez doxloengh.

Ndwenngoenz bae lumj raemx, baez yaep da, songde couh baenz mbauq lo, daengz seiz camyah cauxranz lo. Roen’gyae dwg lwg bouxmiz, boh de miz cienz miz gienz, mbouj you ra mbouj ndaej yah. Rengzmax dwg lwg bouxhoj, ranz de gwn mbouj imq daenj mbouj raeuj, aeu maz mbouj miz maz. Ndigah, mbouj miz mehmoiz daeuj ranz de gvaq, de gag cam: “Ciuhvunz gou lij aeu ndaej yah lwi?” Vihneix de nyapnyuk dangqmaz.

Sawqmwh miz ngoenz ndeu, miz mehmoiz daeuj ranz Rengzmax gaisau boux dahsau lengj ndeu hawj de, de angqyangz fouzbeij. Hoeng, ranz vunz dahsau euq aeu cienzlaex lailai, de dawz mbouj ok, gip ndaej lumj duzmoed ndaw rek ndat nei…… mbouj miz fap lo, de cijndei bae ra Roen’gyae.

Roen’gyae naeuz:“Mwngz caen miz fukheiq, gingqyienz miz dahsau lengj nyienh haq hawj mwngz, mbouj rox mwngz ciuh lawz rom ndaej goengdaek lo. Gou ndaej ciq cienz hawj mwngz, hoeng, gou miz aen diuzgen ndeu, couhdwg sou doxaeu haeuj rugmoq 3 haemh nduj gou lawh mwngz, baenz lw?”

Rengzmax liuh mbouj daengz aen diuzgen Roen’gyae baenzneix haek- sat, de huj lo, naeuz:“Gyoengqvunz ciengz naeuz, yah baengzyoux mbouj ndaej hangz, mwngz baenzlawz ndaej yienghneix ha?” Rengzmax gangj coenz vah neix seiz, mbouj rox mbouj nyinh gaemxgienz gaem ndaej ndaet- ndet, caen naemj moeb Roen’gyae baez ndeu. Hoeng, de youh ngeix: Danghnaeuz gou mbouj ei de, lauheiq swhgeij couh ndok ndeu gaemz dog gvaq ciuhvunz lo. Bohmeh gou gwq maqmuengh gou caeux di doxaeu miz lan hawj gyoengqde daiq, ca mbouj geijlai ngoenzngoenz youq henz rwz gou dwen gij saeh neix.

Rengzmax danq gaemz heiq raezrangrang ndeu, cijndei doengzeiq lo.

Ngoenzndei daengz lo, haemh- haenx, Rengzmax ndoj youq henz dou aen rug wnq, yawjmyoegmyoeg dwk lah Roen’gyae haeuj rugmoq bae, seizhaenx simdaeuz de indot lumj deng mid gvej nei. De gig haemz Roen’gyae, youq ndawsim ndaq Roen’gyae naeuz:“Ndaek vunz sim- rwix simmaeuz neix, mbouj dwg vunz seng, dwg duzgyuk seng. Ai! Bouxmiz maz saeh cungj guh ndaej baenz, bouxhoj gwn mi ndwi lo.”

Sam ngoenz seizgan raez lumj sam bi nei, Rengzmax hoenz mbouj youq ndang, maz saeh cungj guh mbouj baenz, de coegcamz gvaq le 3 ngoenz raezrangrang neix.

Ngoenz daihseiq daengz Rengz- max haeuj rugmoq lo, hoeng, de mbouj miz angq saekdi, ndawsim nyapsaeb- saeb. Mbwn baez laep, de ngaem- gyaeuj haeuj rugmoq bae, cigsoh byaij daengz henz mbonq, duet haiz hwnj mbonq couh nengh moeg goemj gyaeuj ninz.

Bawxmoq raen le geizheih dwk cam:“Goenggvan, sam haemh gonq mwngz yawj saw yawj daengz hwnz mbouj ninz, haemh neix vihmaz haeuj rug couh goemj gyaeuj goemj din ninz ne?” “A! Mwngz gangj maz……” Rengzmax dingq le saetdiuq hwnj- daeuj, de gikdoengh dwk cim yah, yaep he, riuhehe gag gangj gag naeuz:“Gou youh deng ndaek baengzyoux neix loenghriu lo.” Seizneix ndawsim de maz feih cungj miz, yienznaeuz angqyangz, hoeng de lij hozndat Roen’gyae baenzneix loengh de, deng vunz loenghriu dauqdaej mbouj ndei souh.

Daj seizhaenx hwnj, Rengzmax roengzrengz doegsaw. Mehmbwn gyoh boux gaenx, de caen gauj ndaej goengmingz dahraix, caemhcaiq ndaej bae gingsingz guh hak hung.

Ngafaex baen song nye, diuzdah miz dahga. Camhseiz mbouj gangj Rengzmax gonq, daeuj dwendwen Roen’gyae.

Gizsaed Roen’gyae dwg boux- vunz ndaw dungx gvangqlangh, simndei youh lauxsaed. Hoeng, de maij loenghriu. De raen Rengzmax vih mbouj miz cienz cam yah simnyap, couh laeglemx bang Rengzmax, ok cienz dak mehmoiz hawj Rengzmax gaisau dahsau lengj ndeu. Haeuj rugmoq sam haemh nduj, Roen’gyae mbouj famh yahmoq saekdi.

Saeh gwnzbiengz nanz liuh, fwd couh rox bienq. Bihaenx ranz Roen’gyae deng nanh, saedceij gvaq mbouj roengzbae lo, de couh siengj daengz Rengzmax. De caeuq mehyah de doxyaeng, yaek bae gingsingz ra Rengzmax, gouz Rengzmax bang- fwngz. Mehyah de naeuz:“Danghnaeuz de nyienh bang couh ndei lai lo, mbouj haengj bang cixbah.”

Roen’gyae caen bae gingsingz ra Rengzmax lo.

Song lauxdoengz cibgeij bi mbouj raennaj, baez doxraen, songde angq- yangz raixcaix. Rengzmax yiedcingz dakdaih Roen’gyae, songde gwn laeuj seiz, Roen’gyae gangj de baezneix daeuj gingsingz yaek gouz Rengzmax bangfwngz. Hoeng, Rengzmax cungj gangj gvaq wnq bae, gwq ndoj gij vahdaez Roen’gyae, cungj dwg maedmaed naeuz:“Ndot laeuj, ndot laeuj……”

Geij ngoenz gvaqbae lo, mbouj- dan mbouj raen Rengzmax dwen daengz yaek bang bonjfaenh saek coenz, lij gyaep de maranz dem, naeuz:“Beix, mwngz vaiqdi dauqbae ba, mienxndaej mehsauj youq ranz gvaqniemh mwngz.”

Roen’gyae liuh mbouj daengz Rengzmax baenzneix ciedcingz, de gig hozndat. Hoeng, de mbouj miz caiq oksing, cijndaej maranz. Youq gwnz loh maranz, de hujdengdeng, gag mboen naeuz: “Miz cungj baengzyoux gvaq giuz vut dwngx nei, simcit ha!” De simliengz sisi ganj roen, doeklaeng naiqniekniek haeuj ranz.

Baez yamq haeuj ranz, de doeksaetyat: Cijraen gwnz congzcaet baij baizvih, bakdangq miz aen faex ndeu, mehyah caeuq daeglwg ndaej 10 bi cingq souj aen faex daej, daej dwk songda foegbongz caez, gyaeuj mehyah de bi lumj gyaeuj duz gaeqraq nei, yawj hwnjdaeuj lumj yaek ngunh gvaqbae nei, haengjdingh dwg sieng- sim gvaqbouh lo. Roen’gyae geizheih cam:“Ok maz saeh ha?” Baez raen Roen’gyae, mehlwg de sawqmwh swenj hwnjdaeuj, laihnaeuz raen fangz, lau ndaej hoenz cungj mbin bae caez. Roen’gyae raen yienghneix, engqgya geizheih, bak ajloengloeng yawj dwk. Mehlwg songde daj gyaeuj daengz din cim de geij baez le, nyinhdingh mbouj dwg raen fangz, couh gvaqbae got de, mehlwg naj riunyumj hoeng raemxda lij lae dwk.

Mehyah de daej ndaej hozhep caez, gij sing lumj sing bitboh nei, de lwnh hawj Roen’gyae:“Aen faex neix dwg Rengzmax baij vunz soengq daeuj, boux soengq faex daeuj haenx naeuz mwngz daengz gingsingz le, sawqmwh bingh naek, yw mbouj ndei, dai bae lo.”

Roen’gyae baez dingq, huj lo, maenj naeuz:“Rengzmax ha, mwngz dungxbwn simdoeg, mbouj bang gou couh suenq lo, lij mieng gou……” Roen’gyae doq gangj doq din dikdaeb aen faex, aen faex haenx deng dik laemx, sam boux vunz cungj anj lo. Ndaw faex cang rim gimngaenz, lij miz mbawceij ndeu. Roen’gyae dawz mbawceij daeuj yawj, gwnz de raiz naeuz: Mwngz hawj yah gou souj rughoengq, gou hawj yah mwngz daej goenq saej.

Roen’gyae nyaenx mbouj ndaej riuhaha, buet ok rogdou bae, yiengq baih gingsingz song fwngz guh sax, naeuz:“Beix ha! Gyo’mbaiq lo……”

Ciuhvunz dinjdinj geijcib bi, baengzyoux hix miz lai, hoeng, baengzyoux rox naj youh rox sim haenx miz geijlai boux? Danghnaeuz mwngz caijsoq miz cungj baengzyoux caensim caencingz neix, mwngz couh aeu rox insik. Gaej vih saek coenz vahloek couh caeuq de doxliz roxnaeuz yawj mbaeu de. Gij baengzyoux simndei neix dwg cienz- caiz ciuhvunz raeuz, ndaej hawj diuzroen ciuhvunz raeuz gvaq ndaej soengset youh angqyangz.

Coenz vah “roen gyae rox rengz max, gvaq nanz rox sim vunz” neix couhdwg daj aen goj neix daeuj. Gou gig gyaez aen goj neix, danghnaeuz mwngz hix gyaez, couh doq lwnh hawj vunzlai nyi.