Mwngz raen roxnaeuz mbouj raen gou, gou couh ndwn youq gizhaenx, mwngz cix ngaemgyaeuj doeng loengh sae loengh, gou baez doek baez cimyawj mwngz, mbat dem mbat byaij gaenh daezsingj mwngz, mwngz cix mbouj doengh mbouj danh. Mwngz baenzlawz ndaej cangguh yawj mbouj raen, baenzlawz ndaej yienghneix simgeng mbouj dam gou ne?

Mwngz niemh roxnaeuz mbouj niemh gou, liengh gou ciengzseiz youq gizneix, mbouj deuz mbouj bienq, mboujguenj mwngz rox mbouj rox saw, gij cingz gou doiq mwngz mbouj bienq, gij gyaez gou mbouj bienq, gou cij maqmuengh mwngz yied daeuj yied cinbu, simhai vaiqvued.

Mwngz gyaez roxnaeuz mbouj gyaez gou, gou ciengxlwenx gyaez mwngz mbouj bienq, mbouj lai mbouj noix, gaxgonq yienghlawz, seizneix lij yienghlawz, gyaez mwngz mbouj bienq. Naeuz gou mbouj gyaez mwngz, mwngz hwnj dangz ninzcaem, gou vihmaz heuh mwngz; naeuz gou mbouj ndiep mwngz, mwngz fwngz sieng gyaeuj in, gou vihmaz daiq mwngz bae yawj canghyw. Mwngz guh saehloek, gou naihsim son mwngz, mwngz rox loek gaijgvaq, gou daengx ban haenh. Gou itcig yawjnaek mwngz, mwngz cix vihmaz yienghneix vutsoeng bonjfaenh?

Mwngz riengz roxnaeuz mbouj riengz gou, fajfwngz gou cix ciengzseiz mbehai, mbouj gyae mbouj gyawj. Mwngz riengz gou, gou son mwngz. Danghnaeuz mwngz mbouj vut gonq, gou hix mbouj gveng mwngz. Mboujguenj seizgan baenzlawz lae bae, gou lijdwg ndwn youq dieggonq caj mwngz, caj mwngz ngeix doeng. Mwngz mbouj rox doeg, gou couh son mwngz doeg, baez it baez ngeih, cijaeu mwngz gyaezhag; mwngz mbouj rox sij, gou gaem fwngz mwngz sij, song baez sam baez, mbouj dwk maz rengz. Gou cungj mbouj rox, mwngz mbouj suenq huk, cix vihmaz ngoenz gvaq ngoenz mbouj haengj hag?

Mwngz gyaez mbouj gyaez gou, niemh mbouj niemh gou, gou dwg lauxsae mwngz mbouj bienq, mwngz dwg hagseng gou mbouj gaij, gou ciengzseiz mbehai song fwngz caj mwngz, caj mwngz ngeix doeng le gaenx hag, son mwngz rox saw gyauq mwngz roxsoq, caj mwngz miz ngoenz he doiq gou gangj: Lauxsae, gou yaek rox saw, cingj mwngz son gou doegsaw son gou guh cozyez, son gou…… Gou itcig deq mwngz moengh singj, gou itcig gyaez mwngz caengz bienq gvaq.