Seizdoeng gvaqbae lo, muima ninz baenz aen seizdoeng ndeu, daj ndaw conghfaex bin okdaeuj, iet hwet gikgyak, gag gangj gag danq naeuz:“Bineix gou ndaej guh di maz, caiq mbouj ndaej baenzneix maz cungj mbouj miz lo!”

Dingjlingz yiengzbya、douqhau caeuq duzlingz buet gvaqdaeuj, gyoengqde dingq le gij vah muima, cungj angq dwk naeuz:“Daeggo muima, ndei lai lo! Muengh mwngz mbouj caiq lumj bi’gvaq yiengh- haenx.”

Baez dwen daengz bi’gvaq, muima caen mbouj ndei eiqseiq. Bi- gvaq baez haicin, de couh angqvauvau caeuq gyoengq doengzdoih naeuz:“Bineix gou mbouj ndaej begbeg gvaq.” Hoeng, de cungj gaij mbouj ndaej mauzbingh gaeuq: Mbaet aen haeuxyangz ndeu, gab youq lajeiq, caiq mbaet aen he, couh gveng aen daih’it bae lo, mbaet aen daihsam seiz, youh gveng aen daihngeih bae, doeklaeng ndaw fwngz de cij lw di gijgwn ndeu. Di gijgwn yaep he couh deng de gwn sat lo. Muima gwq yienghneix guh ndigah maz doxgaiq hix rom mbouj ndaej.

Muima bekbek aek, miz bajbingq dwk doiq yiengzbya、douqhau caeuq duzlingz gangj:“Sou cuengqsim, yawj gou bineix baenzlawz guh ba!”

Gyoengq doengzdoih raen muima yienghneix miz bajbingq, cungj angq dwk buet maranz, muengz bae ndaem reih.

Fwn seizcin “dida dida” doek roengz, muima muengh dwk gaiq reih namh ndaemndwtndwt baihnaj ranz, siengj youq gwnz gaiq reih neix, ndaem yiengh doxgaiq ceiq ndei gwn ndeu.

Hoeng, dauqdaej maz doxgaiq ceiq ndei gwn ne? Muima yungh fwngz mui bek aen gyaeuj, yaep he siengj ndaem yiengh doxgaiq neix, yaep he youh siengj ndaem cungj doxgaiq haenx.

Ngoenz ndeu, muima raen yiengzbya vazmuengz daj baihnaj dou ranz buet gvaq, couh heuh de:“Yiengzbya daegnuengx, vaiq lwnh gou nyi, mwngz ndaem maz ha? Yiengzbya han naeuz:“Gou ndaem byaekbohcaiq. Byaekbohcaiq youh nomj youh oiq, ndei gwn lai lo!”

Muima dingq yiengzbya baenz- neix gangj, ndawsim gig angq, gag gangj gag han naeuz:“Byaekbohcaiq youh nomj youh oiq, gou vihmaz mbouj ndaem ne?” Muima couh youq gaiq reih baihnaj dou de ndaem byaekbohcaiq.

Gvaq geij ngoenz le, gij byaek- bohcaiq muima ndaem haenx daj ndaw reih ndonj okdaeuj lo, muima angq raixcaix. Hoeng, cingq youq seizneix de dingqgangj douqhau mbouj ndaem byaekbohcaiq, cij ndaem lauxbaeg. Muima roxnyinh geizheih lai: Byaek- bohcaiq youh nomj youh oiq, douqhau vihmaz bae ndaem lauxbaeg ne?

Muima ra douqhau baez cam, douqhau han naeuz:“Gou gyaez gwn byaekbohcaiq, mboujgvaq, gou engq gyaez gwn lauxbaeg, lauxbaeg byoiq- setset……”

Muima naeuz:“O, laxlawz dwg yienghneix.” De doq byaij coh ranz bae doq siengj:“Lauxbaeg byoiqsetset, gou vihmaz mbouj ndaem lauxbaeg ne?” Muima ma daengz ranz le, couh loek gij byaekbohcaiq de ndaem bae caez lo, gaij ndaem lauxbaeg.

Caj lauxbaeg maj ok nyod, muima gig vuenheij. Hoeng, cingq- ngamj muima youh ndaejnyi duzlingz mbouj ndaem lauxbaeg, cij ndaem gvehoengz. De roxnyinh geizheih lai: Lauxbaeg byoiqsetset, hoeng duzlingz vihmaz bae ndaem gvehoengz ne?

Muima ra daengz duzlingz:“Gou hix gyaez gwn lauxbaeg, mboujgvaq, gou engq gyaez gwn gvehoengz, gwn gvehoengz ndaej gaij hozhawq caemh- caiq diemzsubsub……”

Muima fwd singj dwk gangj:“O, laxlawz dwg yienghneix.” De doq byaij coh ranz doq siengj:“Gwn gvehoengz ndaej gaij hozhawq caemhcaiq diemz- subsub, gou vihmaz mbouj ndaem gvehoengz ne?”

Muima ma daengz ranz le, couh loek nyod lauxbaeg okdaeuj caez, ndaem hwnj gvehoengz.

Ndwenngoenz couh yienghneix gvaqbae lo, seizcou daengz lo. Bineix, yiengzbya、douqhau caeuq duzlingz cungj ndaej demsou. Dajsou sat, gyoengqde itheij daeuj daengz baihnaj dou muima, baez yawj, cungj ngaez lo. Laxlawz, haemhlwenz roengz mwi, gij gvehoengz muima ndaem haenx lij caengz maj hung couh daicaep lo.

Muima cingq naengh youq gwnz haenzreih, aeu fwngz dak lajhangz, cingq ngaezngwd ne:“Gou baez ndonj ok conghfaex couh muengz, daj seizcin muengz daengz seizcou, vihmaz maz cungj sou mbouj ndaej ne?”

Dwg ha, neix dauqdaej dwg vihmaz ne?