3 nyied 3 hauh、 3 nyied 5 hauh, Daengx Guek Cwnghez Gaiq Cibsam Baez Hoih Daihngeih、 Gaiq Cibsam Daengx Guek Yinzda Baez Hoih Daihngeih youq Baekging hai. Vihliux guh ndei gij hong fanhoiz vwnzgen “song hoih” bineix, aen siujcuj Sawcuengh Cunghgoz Minzcuz Yijvwnz Fanhyiz Giz gyoengq capyouq Nanzningz, caeuq doengh boux lauxhangz Sawcuengh daj Guengjsae gak dieg ciq daeuj, ciuq gij dunghcih Minzcuz Yijvwnz Fanhyiz Cuj, 2 nyied 20 hauh caez naengh feihgih daengz Baekging.

Baez daengz dieg， daengx aen cuj cix sikhaek guhhong. Minzcuz Yijvwnz Fanhyiz Cuj daengxbuenz baijbouh， aen siujcuj Sawcuengh yawj seiz faenhong、 aenqnaek faenhong， miz banj miz loh, ndaw cuj bouxboux cungj caezsim okrengz、 baedrengz caez guh， gak hangh hong fanhoiz “song hoih” bineix ndaej swnhleih guh liux.

“Song hoih” bineix, aen siujcuj Sawcuengh hoiz le gij vwnzgen Gaiq Cibsam Daengx Guek Yinzda Baez Hoih Daihngeih miz《Cwngfuj Gunghcoz Baugau》《Aen Fap Vaisangh Douzswh Cunghvaz Yinzminz Gunghozgoz （Caujan）》 《Aen Gunghcoz Baugau Cuigauh Yinzminz Fazyen》《Aen Gunghcoz Baugau Cuigauh Yinzminz Genj- cazyen》daengj caeuq fanhoiz gij vwnzgen Daengx Guek Cwnghez Gaiq Cibsam Baez Hoih Daihngeih 《Bien Baugau Gangj Gij Hong Daengx Guek Veijyenzvei Cangzvu Veijyenzvei Cunghgoz Yinzminz Cwngci Hezsangh Veiyi（Caujan）》 daengj, aen siujcuj Sawcuengh gungh fanhoiz le 30 lai faenh vwnzgen、 30 lai fanh cih saw， lij miz 10 ciengz doengzsing fanhoiz dem.

Ciuq cam rox， hoih hai sat le, aen siujcuj Sawcuengh yaek ciuq gij baijbouh Cunghgoz Minzcuz Yijvwnz Fanhyiz Giz, caenhliengh vaiq ok ceksaw 《Cwngfuj Gunghcoz Baugau》（banj Sawcuengh）《Aen Fap Vaisangh Douzswh Cunghvaz Yinzminz Gunghozgoz （Caujan）》 （banj Sawcuengh）2019 nienz， caemhcaiq bwh gaiq hong saemj gij vwnzgen “song hoih” hawj Sinhvaz Vangj.

（Funghranz Sawcuengh Cunghgoz Minzcuz Yijvwnz Fanhyiz Giz hawjgauj）