Ciet lungzbauq Binhyangz dwg cungj ngoenzciet Guengjsae Binh- yangz Yen gag miz ndeu, dwg ngoenzciet ndawbiengz gyonjcomz lai yiengh hozdung haenx, youz vwnzva Bouxgun、Bouxcuengh doxyungz le doengzcaez hwngfat, miz doenghgij daegsaek minzcuz ronghsien、noengzna. Moix bi cieng cib’it gawjbanh.

Binhyangz diuq lungzbauq cungj hozdung neix youq Ciuhsung hainduj miz, youq Ciuhmingz hwngfat、baenz yiengh, youq Ciuhcingh duenh doeksat baenz ndei, miz cien bi nanz lo.

Ciet lungzbauq Binhyangz ndawde miz gyaqraiz cunz haw、hoihdaeng、diuq lungzbauq、caq lungzbauq、ndonj dungxlungz、doxdawz cawlungz daengj hozdung. Ndawde, diuq lungzbauq ceiq hungnaek ceiq nauhyied, baugvat diemj lwgda hairongh、youz lungz、diuq lungzbauq、soengq lungz daengj hozdung.

Diemj lwgda hairongh. Cieng cib’it banhaemh caet diemj cung, youq ndaw miuh diemj lwgda hawj lungzbauq hairongh: Youz bouxdaeuz (roxnaeuz bouxsae) haeb byoengq rouj gaeqboux, aeu lwed roujgaeq diemj dalungz hairongh liux le, yaengq ndaej cuengq bauqciengh, lungz hix yaengq ndaej diuqyat hwnjroengz.

Youz lungz. Diemj lwgda hai- rongh liux le, doihyouzlungz aeu cawlungz、baizlungz (daenglungz)、laz gyong daengj hai roen, doih- ronghroen (daeng feizgaem) caeuq doihbaujlungz daj gyaeuj daengz rieng riengz lungz bae; ciuq gij roen gaxgonq dajsuenq ndei haenx baenaj, youq Binhyangz yienhsingz couhdwg Luzhih Cin Cunghhingh、Yungjvuj、Dungzyinz、Funghgyangh、Daibingz、Yinzai daengj diuzgai cunzyouz.

Diuq lungzbauq. Diuq lungz- bauq seiz vunzlai cuengq bauqciengh baeuh coq duzlungz haenq diuq; ndawbiengz vunz gangj“bauqciengh mbouj daengx, lungz caengz diuq sat”, neix couh heuhguh lungzbauq. Lungzbauq youz bouxvixyinx daeuz ok minghlingh, bouxdiuqlungz cungj lohgengz, gyaeuj daenj mauh ndaem. Lungzbauq daengz giz lawz, giz haenx gak hoh gak ranz cungj youq song henz roen angqcoux, dawz doenghgij bauqciengh bwh ndei haenx okdaeuj cuengq, baeuh coq lungzbauq. Ndawbiengz nyinhnaeuz bauqciengh cuengq yied lai, duzlungz youq naj ranz youq yied nanz couh yied ndei, caemhcaiq nyinhnaeuz ciet lungz- bauq miz doenghgij eiqsei dwg vunzlai sim gouz rumz swnh fwn yinz、seng’eiq hwnghoengh caeuq angq gya lwgbauj.

Soengq lungz. Lungzbauq diuq gvaq mbanj gvaq haw liuxle, doih- diuqlungz comz daengz dieg gaxgonq dingh ndei haenx, youz bouxdaeuz gawjhengz aen yizsi soengq lungz, liuxle cauxfeiz baeu lungz, soengq lungz hwnj mbwn bae.

Seizneix, ciet bauqlungz Binh- yangz dazyinx le lajmbwn haujlai hekyouz daeuj camgya, ndaej heuhguh“ciet haenqangq doengfueng”.

2008 nienz 6 nyied 7 hauh, ciet lungzbauq Binhyangz ginggvaq Goz- vuyen baecinj ndaej liedhaeuj daih- ngeih buek guekgya gaep feihvuzciz vwnzva yizcanj mingzloeg.