Yaek daengz cietcieng, daeg- nuengx youq ndaw yienhsingz, daiq yah daiq lwg ranz vunz 3 boux, daeuj daengz ranz gou baiqnienz. Fwngz riuj daeh hung daeh iq, soengq haeux- faengx haeuxrok hawj gou. Haeux- faengx dwg gag guh, haeuxrok guh mbouj baenz, de rox gou ngah gwn haeuxrok, couh youq rog gai cawx bau ndeu daiq daeuj.

Gij haeuxrok cawx daeuj haenx, seiqseiq fuenfueng, bingzcupcup, ndeiyawj dangqmaz, gou gaem gaiq ndeu baez cimz, diemzsubsub, byot- byubbyub, hoeng mbouj rox vihmaz, nyaij youq ndaw bak, cix roxnyinh mbouj lumj gij haeuxrok baez iq gwn gvaq haenx feih bak.

Doengh bi haenx, gijgwn gij- yungh cungj gig noix. Mizmbangj gijgwn caenh daengz gvaq ciet cij ndaej guh, lumj faenjcaq, ceizndek, haeuxnaengj; mizmbangj cix daengz ngoenzcieng cij ndaej guh gwn, lumj haeuxfaengx、 haeuxrok song cungj neix. Daegbied dwg haeuxrok, baenz bi caenh daengz cietcieng cij ndaej guh baez ndeu, aenvih bingzseiz mbouj miz haeux guh, caemhcaiq haeuxrok hoj guh lai. Hoeng mbouj- guenj baenzlawz, daengz cietcieng bietdingh aeu guh haeuxrok, aenvih Bouxcuengh gvenq aeu haeuxrok dakhek. Ngoenzcieng miz vunz mbanj vunz rog daeuj ranz guhcaemz, boux- cawj couh dawz haeuxrok okdaeuj dakdaih, bouxcawj bouxhek doq gwn doq cejgoj, gangjgangj riuriu, yiengh- neix, ndawranz cij nauhyied, cij angqyangz, gvaq gij saedceij hoengh- hwdhwd.

Mehmbwk Bouxcuengh gwnhoj naihhaemz, gaenxguh danggya gig okmingz, gij hong guh haeuxfaengx haeuxrok haenx, dingzlai dwg gyoengqde guh. Daxmeh gou couhdwg boux vunz yienghneix. Aenvih daxboh gou youq yienhsingz hwnjban, dou sam boux lwgnyez lij iq, bang mbouj ndaej daxmeh guh maz, hong ranz hong rog cungj dwg de gag guh. Daegbied dwg daengz cietcieng, daxmeh lumj ma saeuj maet nei nyaengqnyinyi. De yaek ra rongndaij guh haeuxfaengx, yaek ra haeuxcid ra dangzoij guh haeuxrok. Song cungj hong neix cungj gig sai goengfou. Gij hong guh haeuxrok nyaengq gvaq gij hong guh haeuxfaengx. Guh haeux- faengx ceiq dwgrengz dwg baez suk faengx, aeu roengzrengz youh nanz lai, hoeng guh haeuxrok bouhbouh cungj mbouj ndaej rubrab. Gou yaep fwngz sijsaeq baez suenq, gaiq haeuxrok iqetet lumj song nyod fwngz neix, daj genj haeux daengz guh baenz oet haeuj bak, yaek guh miz 10 mbaek bouhloh: Genj haeux, cimq haeux, naengj haeux, gyaux mba, daem haeux, cimq youz, ceuj haeux, cienq dangz, gyaux dangz, ronq gaiq. Bouh lawz cungj gig feiq goengfou, bouh lawz cungj guh ndaej din fwngz nanq.

Ngoenz gaxgonq, daxmeh couh genj aeu gij haeuxcid naed hung haenx daeuj cimq raemxcaep. Ngoenz daihngeih, ranz buemxsuemj, daxmeh couh hwnqcongz bae aen mboq liz mbanj 5 leix gyaez rap raemx ma naengj haeux. Gvaq diemj lai cung, haeux naengj cug lo, daxmeh caiq dawz haeuxnaengj raix roengz ndoengj, youq gwnz haeuxnaengj vanq caengz mbahaeuxyangz ndeu, gyaux yinz, hawj haeuxnaengj sanq baenz naed, mbouj doxnem, caiq raeng deuz gij mbahaeuxyangz. Yienzhaeuh dawz gij haeuxnaed raeng gvaq haenx, baez geng baez geng cuengq roengz ndaw rum bae daem bej. Daem caez le lij yaek dawz haeuxnaed cimq gvaq youzduh, cij ndaej bae ceuj. Ceuj haeux seiz hix mbouj ndaej gyonj ceuj rek dog, yaek baez di ceuj, haeuxnaed cij yungzheih ceuj yinz, hix mbouj lau deng remj. Daengz bouh neix, gaenq dwg bouh daihcaet, haeuxnaed gaenq guh baenz lo.

Ciep roengzdaeuj couhdwg cienq dangz. Cienq dangz ceiq gangjgiuq gisuz. Sien youq ndaw rek raix vanj raemxsaw ndeu, caiq dawz gij dangzoij dub mienz haenx raix roengz rekraemx bae, ciuq haeuxnaed lainoix aenq cuengq dangzoij. Aeu feiz iq menh- menh cienq, cienq daengz raemxdangz ok bop, bienq gwd le, caiq aeu beuzgeng daek di he hwnjdaeuj, raix roengz ndaw vanj raemxcaep bae, raemxdangz roh baenz diuz sienq, caiqlij aeu fwngz nep gij dangzcienq ndaw vanjraemx, baenj baenz naed mbouj sanq couh suenq cienq hab lo. Danghnaeuz cienq mbouj hab, raemx- dangz couh gyuj mbouj dawz haeux- naed, haeuxrok couh sanqbyobyo, guh mbouj baenz gaiq. Daxmeh guh haeuxrok baenzlai bi lo, gou caengz raen de guh vaih gvaq, cingqcaen dwg goengfou daengz fwngz lo. Raemx- dangz cienq ndei le, couh ndaep feiz, yienzhaeuh dawz haeuxceuj gyonj raix roengz ndaw rek bae, caeuq raemx- dangz doxgyaux, yaekaeu riengjret hoedndau. Gyaux yinz le, caiq vaiqdi raix roengz ndoengj hung bae, aeu gaiq gucanj vaiqvaiq naenx mbang naenx bingz, yienghneix ndoengj haeuxrok henjrwgrwg ndeu, couh lumj benq gim ronghmyanmyan nei baij youq dangqnaj lo, sikhaek, baenz gan ranz cungj gyuemluemz heiqrang fwdfwd. Caiq cuengq liengz geij faen le, couh ndaej aeu caxdau vetvang gat baenz ronx baenz ronx, daengz seizneix, baenz gaiq baenz gaiq haeuxrok seiqseiq fuengfueng couh guh baenz lo. Guh sat gij hong neix, daxmeh gaenq hanh rih hanh roenx, fwngz gaux hwet nanq lo.

Yienghneix, bibi cietcieng, dou cungj ndaej gwn gij haeuxrok daxmeh gag guh. Hoeng miz bi ndeu cengdi mbouj miz haeuxrok gwn.

Bihaenx mbwn rengx, haeuxgok sou ndaej noix, haeux mbouj gaeuq gwn. Yaek daengz cietcieng, ndaw gang coux haeux haenx gaenq daejhangz coh mbwn, ranzranz cungj bae rogndoi ra byaeknok ma ciengx dungx. Daxboh gou youq liengzgu ndaw yienh guhhong, cawx ndaej daeh raemzmienz ndeu maranz, lij faen hawj geij ranz gekleiz gwn. Gij feihdauh gwn raemz, daengz seizneix ngeix hwnj, gou lij roxnyinh coeghoz myogmyog. Geiq ndaej daxmeh dawz raemzmienz cien mba hawj dou gwn, seiz cien heiq rangfwdfwd, hawj vunz myaiz rihnongnong, ndaw hoz lumj seizseiz iet fajfwngz okdaeuj, yaek ciengj gwn raemzmba. Hoeng dawz raemzmba cuengq haeuj bak baez nyaij, cix lumj nyaij namhsa nei, ngamq gyan daengz byonghhoz couh deng gaz, saekwk obob, naj hoengz hoz bongz, cengdi gatcaw. Daxmeh deng hwk dwk doq aeu fwngz bongx baihlaeng gou, bongx geij mbat le, raemzmba cij ndaej haiz ok bak daeuj. Caen catsaij lo, mbouj ndaej gwnz saek gaemz roengz dungx cixbah, dauqfanj begbeg sai bae geij gaemz raemxmyaiz. Doeklaeng, daxmeh cij ndaej cawj vanj byaeknok hawj dou geij boux lwg gaij iek. Haemhhaenx, aen dungx gonvauvau gou rongx baenz hwnz.

Yaek daengz cieng lo, haeuxcuk cungj mbouj miz gwn, bae gyawz ra haeuxfaengx gwn, engq mbouj naeuz haeuxrok gij saejdaeuz neix lo. Dou caenh siengj miz di haeuxcuk demh dungx couh gyo’mbaiq mehmbwn lo, doiq haeuxrok gaenq mbouj miz saekdi maqmuengh. Liz cietcieng lij miz song ngoenz, caenh raen daxmeh gaem mbok haeuxcid ndeu maranz, daxmeh hemq naeuz:“Cuengq raemx cimq haeux, ngoenzcog guh haeuxrok lo.” Geij boux lwgnyez dou doq lwgda byaengqhai, saeknaj lumj byaekheu haenx hix mbehai lo. Ngoenz daih- ngeih, dang daxmeh dawz haeuxrok gat baenz seiqseiq fuengfueng seiz, gou caeuq dahnuengx daegnuengx doq doxcanj iet fwngz bae vax aeu boux gaiq, lumj duzlingz gwn makdauz nei, ndaek gaemz ndaek gaemz oet haeuj bak bae, nyaijbyoegbyoeg, ndwnj- ngogngog, raemxmyaiz rihnongnong cungj goq mbouj ndaej uet. Caen baenz gwn lo, diemzsubsub, rang- fwdfwd, youh byot youh niu, gaemz gonq caengz nyaij mienz, gaemz daihngeih youh oet haeuj bak lo. Gou roxnyinh, gij haeuxrok neix, dwg gijgwn ceiq ndei gwnzbiengz lo. Gvaqlaeng gou cij rox daengz, gij haeuxcid guh haeuxrok neix dwg daxmeh bae ranzwnq ciq aeu.

Daxmeh ndwn youq henz ndang dou, aeu genbuh uet gij hanh gwnz naj, yawj dou ndaek gaemz ndaek gaemz somx gwn, de riu lo, riu lumj duj va’byaek nei, raen gyoengq lwg de gwn dwk diemzsubsub, ndawsim de hix diemzsubsub.

Ngeix daengz gijneix, gou sawqmwh singjsak. Gou rox lo, gij haeuxrok baez iq gwn haenx, vihmaz feih gvaq gij haeuxrok cawx gwn. Aenvih gij haeuxrok haenx, dwg daxmeh caen fwngz gag guh, ndawde gietroj miz gij coengmingz caeuq raemxhanh daxmeh, gietroj miz gij sim’eiq gyaez lwg daxmeh.

Haeuxrok byot youh van,

Henj dangq gaiq rongh gim,

Daxmeh caen miz sim,

Gyaez lwg in ndaw dungx.