Ngoenzneix, Dahlinh boux ndeu youq ranz, youq douranz youh sou ndaej aen huq ndeu, hoeng mbouj caeuq bingzciengz doxdoengz, dawz gvaq caengz youq gwnz mbawfei rog hab ciem coh, couh gven dou byaij haeuj ndaw ranz bae lo. Boux- soengqhuq haenx lizbae mbouj geij nanz, youh buet doxdauq daeuj. De lumz heuh bouxcawxhuq youq mbawfei ciem coh caiq sik roengz hawj de, mbouj miz mbaw fei haenx baenzlawz cingqmingz bouxcawxhuq gaenq sou ndaej huq ne. De bongx bakdou, sing gig hung. Dahlinh yaek hai ok aen hab yawj gij huq daj gwnz vangj cawx, deng vunz dajduenh, hozndat dwk byaij gvaqdaeuj hai dou, yaek ndaq coenz song coenz, cix dangqnaj baez rongh, yawjraen baihnaj dwg boux dahsau he, cam:“Mwngz miz maz saeh?”

“Doiq mbouj hwnj lo, gou dwg bouxsoenghuq haxbaenh, gou youq mwngz gizneix lumz dawz mbaw fei lo, seizneix mazfanz mwngz ciem coh le dawz mbawfei hawj gou ndaej lwi?”

Sou huq sou ndaej vaiq lai, Dahlinh nunu da, cij yawj cing dwg boux dahsau he. Naj doiq naj, dahsoengqhuq cij nyouq ok heiqlaeuj gwnz ndang Dahlinh. Dahlinh raen gvaq haujlai bouxsoengqhuq, lij dwg baez daih’it raen dahsau guh gij hong neix, youh daj gyaeuj daengz din yawj dahsau neix, de naed hanh hung doek roengz, daenj buhdauq. Dahlinh gig geizheih dwk cam dahsoengqhuq neix:“Mwngz caj yaep ndeu. Mbouj- gvaq, mwngz baenzlawz daeuj guh hong neix ne, gou gaxgonq cungj raen bouxsai guh lai, baeg lwi?”

“Baeg dwg baeg, ndaw rumz daeuj, ndaw fwn bae. Danghnaeuz lij youq lajmbanj, gwndaenj mbouj aeu you, hoeng vunz cungj ngeix yaek gvaq ndaej engq ndei. Couhsuenq youx gou mbouj youq henz ndang lo, gou hix aeu ra hong canh cienz a.” Dah- soengqhuq danqheiq naeuz.

“Mwngz liz youx mwngz bae lo?” “Mbouj! Dwg de vut le gou.” Dahlinh mizyinx lo, gyaep cam:“Baenzlawz lo, dahnuengx? Caeuq dahcej gangjgangj, aiq gou lij ndaej bangbang mwngz.” “Hix mbouj miz maz, gaxgonq, dou doxndei, caez daeuj ndaw singz dajgoeng, doeklaeng miz boux lwgsau lauxbanj yawj hwnj de, de couh mbouj aeu gou lo, bae caeuq dahsau fouqmiz haenx. Seizhaenx hix simnyap gvaq, hoeng vunz mbouj wnggai itcig vih bouxwnq lix, aeu vih bonjfaenh lix, gou couh bae ra faenh hong moq he, yaek gvaq gij saedceij moq.”

“Dwg ha!” Dahlinh ing dwk douranz, ngaekngaek gyaeuj, han coenz he. Sikhaek dauq ndaw rug ciem coh le sik ok mbaw fei haenx hawj Dahsau, doeklaeng, caiq hai aen hab haenx, dawz ok gij ywdoeg de yaek gaggaj, gveng bae, gag nam:“Gou vihmaz aeu vih bouxsai mbouj caiq gyaez gou haenx bae dai ne!”