boux vunz neix gaenx- guh, hauqswnh bohmeh, gyaez yah gyaez lwg, couhdwg mbouj doeg geijlai saw, mwh gangj vah gyaez daiq coenz “aiq bah meh mwngz” riengzlaeng. De mboujlwnh caeuq byawz gangj vah, mboujlwnh youq gyawz gangj vah, cungj gyaez gangj coenz vah “aiq bah meh mwngz” gonq, lumjnaeuz mbouj gangj coenz vah neix, de couh mbouj rox gangj roengzbae lo.

Gizsaed, youq ndaw mbanj, bouxsai mehmbwk mbangjseiz gangj vah hix gyaez daiq coenz vah neix riengzlaeng, coenz vah neix mbangseiz gangj ok bak mbouj itdingh yaek ndaq vunz, cix dwg song vunz gig sug doxdongx. Hoeng, lumj Daegvang yienghneix coenzcoenz vah cungj baenzneix, vunz baenzlawz dingq cungj mbouj swnh rwz.

Bohda Daegvang dwg boux- sonsaw, roengz dangz le gyaez buen aendaengq, naengh youq gyang ding ranz yawj saw, nanz mbouj nanz lij sij saek hot sei、bien faenzcieng fat youq gwnz bauqceij. Ciuqgangj bohda Daegvang cungj vunz neix dwg mbouj nyienh dahlwg haq hawj Daegvang, hoeng euq mbouj gvaq dahlwg, caemhcaiq Daegvang maz cungj ndei, couhdwg bak miz di haeu ndwi, yienghneix de hix couh hai cehda laep cehda, nyaenxnyaenx ndwenngoenz hix couh gvaqbae le geij bi. Caiq gangj yah Daegvang, vih Daegvang bakhaeu gienh saeh neix, mbouj rox ndaq de geijlai mbat gvaq lo, hoeng, Daegvang yienghneix gangj vah gaenq gangj gvenq lo. Yah ndaq mbat ndeu, hainduj de lij geiq ndaej ndei- ndiemndiem, baez nanz de couh rox lumz gij vah yah de daengq lo, youh fukdauq bakhaeu lo.

Youq ndaw mbanj, boux vunz ndaej 60 bi cungj aeu banh ciengz laeuj hung ndeu daeuj angqhoh. Ngoenzneix, dwg bohda Daegvang ndaej 60 bi ngoenzseng, de cingj le haujlai caencik daeuj ranz gwn laeuj. Daegvang hauqswnh, ngoenz- seng bohda itdingh siuj mbouj ndaej de. Daj ranz Daegvang daengz ranz bohda, gwih cimohdoz aeu aen cungdaeuz ndeu. Ngoenzneix, Daeg- vang ranz ngamq angj couh gwih cimohdoz daiq yah bae ranz bohda lo. Seiz yaek ok ranz, yah de daengq bae daengq dauq, couhdwg lau Daegvang bakhaeu, youq ranz bohda luenh gangj vah saetnaj. Youq ndawranz Daegvang dangyienz han ndaej ndeindiemq, lij heuh yah de cuengqsim. Bae daengz ranz bohda, miz vunz dajcawj, miz vunz hohsouh, haeujhaeuj okok, lij miz gyoengq lwgnyez youq gyang ding、lajroq buet bae buet dauq, nauhyied dangqmaz.

Gyoengq vunz hohsouh daeuj gonq cingq buenx bohda Daegvang naengh youq lajroq, baez raen Daegvang daeuj daengz, couh heuh de haeuj daiz. Daegvang hix mbouj guhhek, heuh yah dawz doxgaiq hohsouh haeuj ranz, swhgeij riengjret couh naengh haeuj daiz bae lo. Bohda de riunyumnyum naengh youq gizhaenx, hix mbouj gwn laeuj, cij dwg caeuq vunzlai gangjgoj. Daegvang caekhaek ngamq naengh onj youq gwnz daengq, couh dawz cenj laeuj baihnaj hwnjdaeuj gingq vunzlai, ndaw bak lij naeuz:“Gyoengq beix- nuengx, ngoenzneix docih sou ndaej daeuj hoh bohda gou ndaej 60 bi, gou gwn cenj laeuj neix gonq, caj yaep ndeu gou caiq baez boux baez boux gingq sou.” Gangj sat gaemz ndeu couh ndoet cenj laeuj caez bae. Bohda Daegvang ne, yawj dwk Daegvang youq gizhaenx doq gangjriu doq gwn laeuj, vanzlij mbouj oksing. Daegvang geij cenj laeuj roengz dungx, couh lumz le gij vah yah de daengq, doiq naxgwiz hemq naeuz:“Naxgwiz, aiq bah meh mwngz ha, ngoenzneix gou sim’angq lai lo……”

Baez dingqnyi Daegvang baenz- neix gangj, bohda Daegvang caenh- guenj mbouj gangj maz, hoeng song diuz bwnda duh de gaenq nyaeuq hwnjdaeuj lo. Daegvang ne, cix maz cungj mbouj fatyienh, vanzlij laebdaeb riuhaha caeuq vunzlai gangj vah, vah de gig mizyinx, couhdwg moix coenz cungj miz vahhaeu riengzlaeng. Gangj dwk riu dwk, daengngoenz doek bya lo, daengz seiz dauqranz lo, mwhneix naj Daegvang gaenq hoengzfwdfwd lo, dan raen de ndwn hwnjdaeuj caeuq bohda、vunzlai faenbiek, yah de hix daj ndawranz byaij okdaeuj ndwn youq baihlaeng caj de. Mwhneix, Bohda doiq Daegvang ngaekngaek gyaeuj, gig caemdingh dwk naeuz:“Vang a, laj daiz miz rim loz ‘aiq bah meh’ ndeu, duh mwngz caez, gaej lumz dawz dauqranz o.” Vunzlai fwd dingqnyi bohda Daegvang gangj coenz vah neix, cungj siengj mbouj doeng de gangj maz, singj gvaqdaeuj le cungj riuhaha hwnjdaeuj. Daegvang ne, naj bienq ndaej hoengzyatyat, coenz vah he cungj gangj mbouj ok. Yah de ne, hix riengzlaeng najmong caez, beng Daegvang couh buetdeuz lo.

Mbatneix liux, Daegvang gangj vah caiq hix mbouj gamj baenzneix lo. Vunz ndaw mbanj cungj haenh bohda Daegvang, vunz doegsaw gvaq couhdwg caeuq vunzwnq mbouj doxdoengz!

Daegvang