Ndwen 3 ngoenz 12, aen dieggoek son’gyauq swnjcienz doxgaiq fwngz- guh minzcuz Yougyangh Gih Baksaek Si biengj baiz laebbaenz, neix dwg aen bingzdaiz comz senhconz caeuq doigvangq doxgaiq fwngzguh minzcuz aen nduj Yougyangh Gih.

Aen dieggoek neix youz Yougyangh Gih Minzcunghgiz caeuq Aen Gunghswh Mizhanh Doxgaiq Gunghyi Minzcuz Yajmangz Yougyangh lienz- hab cauhguh, haenqrengz guh vatcimh、swnjcienz caeuq hwngfat gij doxgaiq gunghyi cienzdoengj deihfueng. Dieg- goek yaek doenggvaq bouxswnjcienz dinfwngz gangjgej sonyinx, daengz dieg langhbaij guh doxgaiq fwngzguh daengj hingzsik, yinx engq lai vunz roxyiuj caeuq swnjcienz vwnzva minzcuz, doiq daezsang gij suijbingz dinfwngz minzcuz Yougyangh Gih, coicaenh gij dinfwngz minzcuz hwngfat miz cozyung gaenxmaenx. Doengzseiz, aen dieggoek neix lij yinx ranzgungzhoj、vunz- ndangcanz couhnieb daengj hingzsik, bang vunzlai gaemdawz gij dinfwngz minzcuz daegsaek, hwngfat daegsaek canjnieb, laisou baenz miz. Seizneix, bouxguhhong aen dieggoek neix miz 23 boux ranzgungzhoj、11 boux vunz- ndangcanz. Gyoengqde baengh guh doxgaiq fwngzguh minzcuz, gaijgez le gij vwndiz souhaeuj.

Yougyangh Gih muhmeh、ndang- daenj minzcuz vunznoix daengj gij dinfwngz cienzdoengj lizsij gyaeraez, vwnzva goekdaej laegna, doxgaiq lai yiengh gyaeundei, gig miz daegsaek minzcuz deihfueng, dwg dingz gap- baenz youqgaenj vwnzva cienzdoengj maenhndei Yougyangh Gih. You- gyangh Gih yaek yungh laebbaenz dieggoek son’gyauq swnjcienz guh seizgei, gyalai ligdoh bangfuz gij canjnieb fwngzguh minzcuz, cauh binjbaiz minzcuz, saedyienh doxgaiq minzcuz laebdaeb、cangqheiq、gohyoz hwngfat, caemhcaiq doenggvaq haenqrengz senhconz, yinx engq lai vunz minzcuz vunznoix daegbied dwg bouxcoz bae dieggoek hag dinfwngz, hawj engq lai vunz roxyiuj vwnzva “muhmeh” Bouxcuengh.

(Cinz Yinhlungz)