Yauzcuz faen miz haujlai nga, nga caeuq nga ndangdaenj mbouj doxdoengz liuxcaez； ndigah gaxgonq baenzlawz an mingzcoh hawj gak nga Yauzcuz, couhdwg baengh doengh saek ndangdaenj、yiengh vaq、dox- gaiq canggyaeuj mbouj doengz bae heuh.

Doenghgij vwnzva ndangdaenj Yauzcuz Guengjsae dingz lai cienz youq Duh’anh Yauzcuz Swciyen、Bahmaj Yauzcuz Swciyen、Dava Yauzcuz Swciyen、Ginhsiu Yauzcuz Swciyen、Fuconh Yauzcuz Swciyen、Gunghcwngz Yauzcuz Swciyen, gijwnq couh sanq cienz youq Hocouh Si、Lingzyinz Yen、Denzlinz Yen、Nanzdanh Yen、Cenzcouh Yen、Lungzswng Gak Cuz Swciyen、Yungzsuij Myauzcuz Swciyen daengj.

Mehmbwk Yauzcuz ak dwkromj dajnyumx dajsiuq, seizneix lij miz baenzdauq dinfwngz dajnyumx daj- siuq caez bae. Vunz Yauzcuz baengh gij dinfwngz dwkromj daj- nyumx, cauh’ok doenghgij “baengz- raiz Yauzcuz”ndawguek rogguek cungj mizmingz.

Ndangdaenj Yauzcuz miz aen daegdiemj youqgaenj dwg seujva guh doz, doenghgij daegdiemj ndeu doz seujva caeuq ndangdaenj mizmbangj yienh’ok cunghgyau. Guengjsae Sihlinz Yen Yauzcuz baujmiz dauq ndangdaenj“saedauh”(cunghgyau) gaenq miz geij bak bi ndeu, gwn ndangdaenj siuq miz saenzmbwn、saenzbya、saenzbyaj、saenzdaengngoenz daengj, neix yienh’ok le gij daegdiemj ndawsim vunz Yauzcuz baiq lai cungj saenz.

Doenghgij doxgaiq canggyaeuj Yauzcuz haemq miz daegsaek, miz yiengh“buenzlungz”、yiengh cihsaw“A”、yiengh“ndwenmbanq”、yiengh“roegenq mbin”daengj, mizdi daep naq faexcuk, mizdi daengj benh- daeux, mizdi daenj mauhsom, mizdi daenj ronggya. Lumj Guengjsae Hocouh doenghboux mehmbwk Yauzcuz daenj aen mauhdap cib lai caengz, yienhda dangqmaz.

Doenghgij vwnzva ndangdaenj Yauzcuz ciuq lohnaemj“mbwn vunz caezcaemh”, hawj gij daegsaek vwnzva minzcuz caeuq vanzging swyenz doxhuz. Ndawde dajcamx、dajsiuq、dajsieng、dajnyumx, gij doenghyiengh neix gaenq baenz doenghgij hauhmai vwnzva Yauzcuz, yienh’ok gij gyaezmaij saedceij nem naemjfap vwnzva daegdingh vunz Yauzcuz, youq ndaw vwnzva ndang- daenj minzcuz guek raeuz, miz diegvih caeuq gyaciz youqgaenj.

2006 nienz 5 nyied 20 hauh, ndangdaenj Yauzcuz ndaej Gozvuyen baecinj, ndaej lied haeuj daih’it buek guekgya gaep feihvuzciz vwnzva yizcanj mingzloeg.