Gyanghaet ngoenzhaw, gwnz gai vunz lai vunz daih goenjhuhu, nauhyied dangqmaz. Giz dieg hongh rog bakdou sanghcangz bakhuq gunghsiuhse, Nanzningz Gyanghnanz Gozminz Cunhcin Yinzhangz daeuj baijdaiz guh yezvu senhconz. Dah cizyenz heuhguh Cangh Cujyiz ndeu cingq gangjbyoegbyoeg coh vunzlai gaisau gij cingzgvang aen ngaenzhangz de. Naeuz maz caeuq aen ngaenzhangz neix daigvanj soujsuz genjdan fuengbienh, ce ngaenz youq aen ngaenzhangz neix ndaej leihsik sang……

Gangj baeg le, bak sauj lo, Cangh Cujyiz gaem bingz raemx ndeu daeuj ndoetgwn, mbon daeh ra soujgih siengj yawj seizgan, cij raen de lumh gwnz lumh laj, simgip raixcaix. “Yi, aen soujgih gou ne? Gyawz bae lo?”

De guhmuengz saeuj gij swhliu gwnz daiz, fanyawj daehbau, hix mbouj raen, najbyak hanh conh- mwdmwd. “Haxbaenh gou mingzmingz couhdwg ce youq gwnz daiz neix lo, baenzlawz yaepyet couh mbouj raen lo ne? Haengjdingh deng gaijdiuq caeg bae lo.”

Cangh Cujyiz simgip raixcaix. Aen soujgih de dwg ngoenzbonz ngamq cawx moq ha, 6000 lai maenz ngaenz, gaem youq gwnz fwngz caengz raeujremh couh deng caeg bae, de saedcaih miz di sim’in. Caiq gangj ndaw soujgih de yo miz moengj saenqsik swhliu youqgaenj. De haemz ha, de haemz ndaek gaijdiuq dwg- caengz haenx, ndaek de haih ndaej vunz camj lai lo. Bauqgingj! Deng, bae bauqgingj! Fanjcingq gizneix miz luzsieng genhgung, Cangh Cujyiz haeb faenz haeb heuj, itdingh aeu caz ok ndaek gaijdiuq haenx dawz de daeuj dub yungz bae.

Cangh Cujyiz ciq vunz aeu soujgih dwk dienhvah bauqgingj. Yaep he, baicuzsoj Cinz gingjgvanh daeuj lo, cazyawj sibinz luzsieng genhgung, ndaw sibinz raen laeq lwgnyez iq ndaej saek 10 bi baedauq ndeu caeg dawz aen soujgih bae, cij hojsik gingqdaeuz liz ndaej gyae lai, ngaeuz vunz miz di myox, yawj mbouj daih cingcuj, hoj nyinh ndaej ok dwg byawz.

Cinz gingjgvanh dawz sibinz cezduz okdaeuj, sikhaek dawz bae diucaz lo. Cangh Cujyiz ndwn naengh mbouj onj, ndawhoz gag laeglemx baujyouh Cinz gingjgvanh dawz ndaej laeq lwgnyez dwgcaengz haenx, caemhcaiq yiemzhaenq ceihfad boux bohmeh mbouj rox son lwg haenx, hawj gyoengqde hit gvaq sam daih bae.

Caj baenz byonghngoenz, cungj- suenq caj ndaej Cinz gingjgvanh dauqdaeuj lo. De lwnh naeuz: De dawz duzsiengq bae hawj vunzlai nyinh, miz vunz naeuz laeq lwgnyez neix lumj dwg Daeghaem Mbanjfaexminz. De youh bae ra cunhveij Mbanjfaexminz, cunhveij Luz cujyin daiq de bae ranz Daeghaem cazyawj. Ranz Daeghaem gig hojndoq, daxboh dai caeux, daxmeh bae nungj bae nangj mbouj leix lwg, ce Daeghaem song beix- nuengx nyaeq riengz goenggeq buzgeq youq ranz, baengh cwngfuj hawj dihbauj gvaq ndwenngoenz. De caeuq Luz cujyin lox haujlai nanz, gangj bae baenz ruz vah, Daeghaem cungj haeb heuj gaenjdik mbouj nyinh, dai cungj naeuz mbouj ndaej aeu soujgih. Saedcaih mbouj miz saekdi banhfap lo. “Duznag ak gaeb bya, goepnaz ak gaeb daek, mbouj raen vunz guh caeg, gingjcaz baeg doek ndwi.”

Cangh Cujyiz lumj coeng ndip deng feiz log, naiqnueknuek naengh roengzdaeuj, simngaix lailai. De fanfoek yawj aen sibinz genhgung haujlai baez, doeklaeng gietdingh gag bae ranz Daeghaem Mbanjfaexminz yawj mbat ndeu.

Cangh Cujyiz gag naengh dienhci bae daengz ranz Daeghaem. Ranz Daeghaem youq bakmbanj haeujbae mbouj geijlai gyae, aen ranz sam fungh ranzvax gaeuqgatgat, vax gwnz ranz yawjraen miz haujlai conghroh. Yamq haeuj bakdou, raen goenglaux ndeu ndang byombyang noh heumig naenghbaxbueb byoq feiz, naihlaux hwetgaeuz geqgoem ndeu maeuq youq gokcauq ngaemgyaeuj faeg byaekmou, neix aiq couhdwg daxgoeng daxbuz Daeghaem ba. Raen daengz gij cingzgingj neix, Cangh Cujyiz raemxda gag yaek conh okdaeuj.

“Simj ha,” Cangh Cujyiz dongx cam naeuz, “Gwn ngaiz mbouj- caengz?”

Naihlaux gingz gyaeuj raen Cangh Cujyiz haeuj ranz daeuj, ngeizvaeg dwk cam:“Mwngz daeuj ra byawz?”

“Gou daj gwnzhaw daeuj, daeuj yawjyawj ranz sou.” Cangh Cujyiz hanbak naeuz.

“O, mwngz gag naengh vei.” Naihlaux gangj le youh nambyoeg- byoeg naeuz：“Hai, song laeq lan neix cabheiq lai lo, hoj son yaek dai, mbouj dingqgangj saekdi, cuengq hanzgyaj dauqma heuh bang guh saekdi hongranz cungj mbouj guh, ngoenz caenh siengj ngon aeu ngaenz bae yungh, mbouj hawj couh hozgaek boemz doenghyiengh.”

“Songde ciengzseiz caeuq mwngz bouxlaux aeu ngaenz?” Cangh Cujyiz naengh roengz aen daengqgeg ndeu bae, cam naeuz.

“W, haetneix youh ngamq aeu geijcib maenz bae haw faengz. Gou naeuz mbouj miz, duz iq haenx dai cungj mbouj haengj, boemz ndaej aen famoj gou cungj mbeuj liux lo. Haxbaenh baicuzsoj caeuq cunhveij Luz cujyin lij daeuj cazcam lwg neix dwg mbouj dwg caeg soujgih dem, caeklaiq mbouj dwg de caeg, mboujnex caen mbouj rox daengzcog yaek baenz maz vunz lo.” Gangj daengz neix naihlaux gag bi gyaeuj gyangz gaemz heiq raezrangrang.

Seizneix, laeq lwg sai he caeuq laeq lwgmbwk he sawqmwh daeuj daengz dangqnaj, naihlaux guhmuengz lwnh Cangh Cujyiz naeuz:“Ne, neix couhdwg song boux lan gou, dahcej heuhguh Dahdieb, daegnuengx heuh- guh Daeghaem.”

Cangh Cujyiz baez cimyawj laeq lwgsai neix, bouxvunz iqet byombet, yiengh miz di nyaet, ndaej saek 10 bi baedauq, caen miz di lumj boux lwgnyez caeg soujgih ndaw sibinz haenx. “Daeghaem?”

“W.” Daeghaem nem Dahdieb raen Cangh Cujyiz miz di najsug hoeng cix ngeix mbouj hwnj youq gyawz raen gvaq. Cangh Cujyiz heuh Daeghaem song beixnuengx naengh roengzdaeuj, cam neix cam haenx gangj baenz byonghngoenz, daj gij gwndaenj ndawranz gangj daengz gij hagsib ndaw hagdangz, lij ndenq bak maenz ngaenz hawj Daeghaem nem Dahdieb, naeuz hawj songde cawx saekdi bitmaeg caeuq bouh cozyez roxnaeuz cawx di saejdaeuz gwn. Daeghaem roxnyinh Cangh Cujyiz dwg bouxvunz ndei ndeu, daj boh de gvaqseiq meh de deuz le, Daeghaem caengz raen saek boux nyaenx gvansim de gvaq, de ndaeng baez soemj raemxda couh yaek conh okdaeuj lo.

Cangh Cujyiz lumhlumh aen gyaeuj Daeghaem, yaek siengj dwen gangj gij saeh caeg soujgih haenx, hoeng vah danh daengz conghhoz cix gaij bak gangj naeuz:“Nyi naeuz mwngz mbouj haengj dingq vah daxgoeng daxbuz, yienghneix mbouj baenz bw.”

Daeghaem caeuq Dahdieb cungj ngaemgyaeuj mbouj guhsing.

Gvaq yaep he le Cangh Cujyiz cam naeuz:“Daeghaem ha, dahnax yaek hawj mwngz bang gou guh gienh saeh ndeu, ndaej lwi?”

Daeghaem ngeiz lo, “Gou laeq nyez iq ndeu ndaej bang mwngz guh maz?”

“Mwngz bang gou ra boux lwgnyez ndeu, vunz naeuz boux de dwg vunz Mbanjfaexminz.”

“W, ndaej, mwngz yaek ra byawz?” Daeghaem da baez rongh, han ndaej seuqsak, de roxnyinh goj ndaej bang dahnax neix.

Cangh Cujyiz daj ndaw daeh mbon aen soujgih gaeuq ndeu okdaeuj, hai haeujbae le yaengx hawj Daeghaem yawj. “Ne, boux neix, mwngz roxnaj de lwi?”

Daeghaem baez yawj aen doz myoxmyadmyad ndaw soujgih gaeuq Cangh Cujyiz, doeksaet yat bae, saeknaj gag bienq liux, de ngaem- gyaeuj roengzdaeuj mbouj guhsing lo.

“Haetneix youq gwnz haw, boux lwgnyez neix gaemdawz aen soujgih gou bae. Gyoengqvunz cungj nyinh ok naeuz dwg mwngz……”

Daeghaem gyaeuj yied ngaem yied daemq, naj hoengz rwz dit, cungj mbouj gamj ngiengxnaj yawj Cangh Cujyiz.

“Gou saet aen soujgih ndeu bonjlaiz mbouj youqgaenj, hoeng gij swhliu yo youq ndawde gig youqgaenj ha! Ra mbouj ndaej soujgih dauq, gou sonjsaet couh hung lo. Danghnaeuz caen dwg mwngz dawz bae, mwngz couh hawj dauq hawj gou, couh dangq bang gou guh gienh saeh ndeu ba.”

Daeghaem lij dwg caem dwk mbouj guhsing.

“Bouxvunz byawz mbouj guh saeh loek gvaq, guh loek le gamj guh gamj dang, gaij gvaq couh baenz……”

“……”

“Mwngz seizneix caen gig siengj gag miz aen soujgih ndeu, dwg lwi? Yienghneix gou soengq aen soujgih neix hawj mwngz, mwngz couh boiz dauq aen soujgih youqgaenj haenx hawj gou, baenz lwi?”

Seizneix, Daeghaem raemxda ndik lo, de sing saeq naeuz:“Dahnax, gou loek lo……”

Mboengq he gvaqbae, ngoenz- ndaep daengz lo, Cangh Cujyiz cawx aen laexbau caeuq geij gaen nohmou soengq bae hawj Daeghaem, daengq de yaek ndeindei hagsib, dingq vah daxgoeng daxbuz, guh boux lwgnyez gvai ndeu. Doeklaeng lij louzce aen hauh dienhvah de hawj Daeghaem, naeuz baezlaeng miz maz gunnanz ndaej dwk dienhvah hawj de.