Bi 2019, Siengcouh Yen yungh dangjcwng gihgvanh gihgou gaijgwz seizneix guh seizgei, yungh roengz saw gvidingh、doengjit anbaiz、dingjmaenh biucinj daengj banhfap, youq daengx yienh gvancez doeksaed 《Aen Diuzlaeh Hong Saw Vah Minzcuz Vunznoix Gvangjsih Bouxcuengh Swcigih》(baihlaj genjdanh heuh 《Diuzlaeh》). Yenveij、yen cwngfuj roengz saw gvidingh daengx yienh gak gaep dangjcwng gihgvanh、swyez danhvei dinghvih gaijgwz le, aenyaenq、baiz danhvei daengj cungj yungh Cuengh Gun song cungj saw. Seizneix, Sieng- couh Yen dangjcwng gihgou gaijgwz miz bouhloh guh, hong fanhoiz Saw- cuengh、dinghguh aenyaenq、baiz gak danhvei hix caemh guh, aenyaenq、baiz 94 aen danhvei(bouhmonz) gaenq fanhoiz baenz Sawcuengh liux, ndawde gihgou mbiengj dangjveij(hamz venj- baiz、ginzdonz、gak veijyenzvei caeuq ranzbanhgoeng de) 49 aen, mbiengj cwngfuj(hamz venjbaiz、gak cungsim、ranzbanhgoeng) 45 aen. Hag caeuq yungh《Diuzlaeh》 gaenq baenz diemj- rongh hong cwngvu Siengcouh Yen bi moq hainduj neix.

Siengcouh Yen Minzcunghgiz daiqdaeuz cujciz boux sugrox Saw- cuengh ndaw yienh haiguh fugsaeh fanhoiz, sonyinx fanhoiz、guh aenyaenq caeuq baiz gak danhvei, faenbied mingzdingh gij cikconq caeuq iugouz baiz vang rox raeh, mbouj hawj miz gij yienhsiengq mbouj gveihfan roxnaeuz gag luenh guh daengj. Aenyaenq caeuq baiz daengx danhvei mbiengj dangjveij cungj yungh Cuengh Gun song cungj saw, neix youq lizsij aen yienh neix dwg baez nduj, najdoiq gij cingzgvang hong fanhoiz lai caemhcaiq swz moq lai, yenbenhveij caeuq minzcunghgiz hwnj dou fugsaeh, dawzseiz guhsat hong fanhoiz. Doih fanhoiz cawjdoengh cam lauxhangz Swcigih Minzyijveij, bauj- maenh aenyaenq baiz fanhoiz ndaej deng、guh ndaej deng.

(Couh Yajyi)