Begloh yienznaeuz gaenq gvaq- bae, hoeng youq ndaw reih gocaz vunz Cinminz Cunh Hungzsuij Yangh Yungzsuij Myauzcuz Swciyen, gyoengq beixnuengx Myauzcuz lij nyaengq nyaeb mbawcaz, ndaw gyoengq vunz nyaengqfoed neix miz boux sai byom iq ndeu riuj dwk aendaeh nyaengq soucawx mbawcaz, nyaengq haicienz, de couhdwg Daeg- seiq Ranzveiz.

Cinminz Cunh Hungzsuij Yangh deng swcigih lied baenz aen mbanj gig hojndoq ndeu, daengx mbanj miz 1000 lai ranz, 4200 lai vunz, 99% dwg Myauzcuz, dwg “mbanj Myauzcuz miz cien ranz vunz” caencingq ndeu. Daegseiq Ranzveiz couhdwg mbanj Myauzcuz miz cien ranz vunz neix ndawde boux ndeu, aenvih de beixnuengx lai, daengx ranz vunz ndwenngoenz hoj dangqmaz.

Byaibi bi 2015, aen doih guhhong capyouq ndaw mbanj ginggvaq cingcinj faenbied bingzguj, Cinminz Cunh miz 347 ranz deng bingz baenz hojndoq, vunz hojndoq miz 1445 boux, Daegseiq Ranzveiz daengx ranz ndaej 62 faen, lij dwg hojndoq.

Vihliux gaijbienq ndwenngoenz hojndoq, Daegseiq Ranzveiz ok rog bae dajgoeng, aenvih mbouj miz saek yiengh dinfwngz ak, gij hong de mbouj onjdingh, dajgoeng souhaeuj mbouj ndaej geijlai, gij cingzgvang ndwenngoenz hojndoq ciuqyiengh gaijbienq caengz ndaej, hoeng lwgda de cix yawj ndaej gyae lo, rom ndaej haemq lai gingniemh guhhong、cauhnieb. Youq diegrog dajgoeng, Daegseiq Ranzveiz goj gvansim mbanjranz hwngfat, youq mwh roxdaengz hwnq baenz aengiuz caeuq roensuijniz doeng haeuj ndaw mbanj le, de couh miz gij siengjfap dauqma mbanjranz cauhnieb lo.

Bi 2011, Daegseiq Ranzveiz dauqma ranz hainduj cauhnieb, ciengx mou、ciengx vaiz、ciengx gaeq、ciengx bit, de baez yiengh baez yiengh sawq guh, hoeng aenvih mbouj miz gij gingniemh、dinfwngz dajciengx caeuq mbouj roxyiuj hawciengz, gij doengh- duz de ciengx haenx cungj gai mbouj baenz cienz, sawq cauhnieb cungj baih liux.

“Aenvih mbouj miz gisuz, daj- ciengx mboujdan mbouj canh cienz, dauq deng laemq cienzgoek dem, gij cienz bae diegrog dajgoeng rom ndaej haenx cungj deng sai liux lo.”

Youq mwh Daegseiq Ranzveiz doeknaiq, mbawcaz ndaw mbanj hainduj haeujdaengz seiz baenz lai nyaebsou. Yienznaeuz mbawcaz nyaebsou ndaej lo, hoeng cix mbouj miz saek aen hozcozse roxnaeuz cangjgyagoeng ma son daengx mbanj gyagoeng mbawcaz, mbawcaz baenz lai cix “sou mbouj ndaej lai”. Daegseiq Ranzveiz da raen baenzneix, ndaw sim you dangqmaz, yienghneix de couh miz gij siengjfap laebguh hozcozse lo. Hoeng bonjfaenh mbouj sugrox gij dinfwngz gyagoeng mbawcaz, engq mbouj miz gij gingniemh guenjleix mbawcaz. De geiqmaenh gij hit gaxgonq cauhnieb saetbaih, roengz dingh gietsim, ndeindei bae hag, couh cawx gij saw gvendaengz mbawcaz haenx ma gag yawj lo, lij gaenx bae camgya gij ban son dinfwngz ndaem caz、gyagoeng、ceh caz ndaw si、yienh banh haenx dem.

Hag ndaej gij dinfwngz gyagoeng caeuq ndaem caz le, Daegseiq Ranzveiz couh caeuq geij vunz ndaw mbanj doxgap laebbaenz hozcozse lo, couh yienghneix buekguh le geij bi, hoeng aenvih caeuq bouxgapguh siengjfap mbouj doxdoengz, hozcozse souhaeuj mbouj lai, caemh mbouj miz banhfap hawj gij souhaeuj ranz ndaem caz gyalai caeuq hawj gyoengqde haengjheiq bae guenjleix gocaz.

“Gou dwg siengj guh gij huq caetliengh sangndei, yienghneix sou- haeuj couh lai gvaq, doiq hozcozse hix ndei, ranz ndaem caz goj ndaej cienz lai, hoeng aenvih aeu douzhaeuj haujlai cienz bae cawx sezbei, hozcozse mbouj miz geijlai cienz, geij vunz caeuq gou doxgap guh hoz- cozse haenx mbouj haengj.” Daegseiq Ranzveiz naeuz.

Daegseiq Ranzveiz gietdingh laebguh aen hozcozse bonjfaenh——Aen Hozcozse Ciennieb Ndaem Caz Cunhsiu. Laebbaenz hozcozse le Daegseiq Ranzveiz raen: Gaxgonq aenvih ndaem caz souhaeuj mbouj lai, vunz ndaw mbanj mbouj haengj guenjleix gocaz, haujlai vunzmbanj engqlij vutvak gocaz hawj de bienq nyaengq dem, mboujcix ok rog bae dajgoeng, mboujcix youq ndaw reih gocaz ndaem gosamoeg, daengx mbanj ndaem caz daj seiz hwng ndaem 1500 lai moux, gemjnoix daengz ngamq ndaej nyaebsou 800 lai moux.

Daegseiq Ranzveiz gietdingh bonjfaenh gag bae guenjleix gij reih gocaz deng vutvak neix, gij cienz seiz nyaeb mbawcaz gai ndaej haenx dingz ndeu baen hawj vunzmbanj; dangh- naeuz gij vunz ndaw mbanj ok rog bae dajgoeng haenx dauqma guenjleix, yienghhaenx couh youz vunzmbanj gag guenjleix, Daegseiq Ranzveiz couh guh vunz soucawx. Ginggvaq baenz ranz baenz ranz bae gangjfug, gij mbawcaz daengx mbanj nyaebsou ndaej hoizfuk daengz 1200 lai moux.

Reih gocaz menhmenh hoizfuk lo, hoeng aenvih douzhaeuj lai, lij dwg mbouj miz banhfap gyalai souhaeuj, cijmiz hwnqguh aen cangjgyagoeng bonjfaenh, guh gij mbawcaz gaenq gyagoeng ndei haenx cijndaej miz souhaeuj engq lai. Gangj guh couh guh, Daegseiq Ranzveiz hainduj daigvanj hwnq cangjgyagoeng, doengzseiz bae dangjveij、cwngfuj dangdieg bauq cienz bangfuz.

Bi 2015, ndaej daengz dangjveij、cwngfuj dangdieg bangfuz, Daegseiq Ranzveiz cawx ma gij sezbei gihgai gyagoeng mbawcaz, hainduj baenz gveihmoz gyagoeng mbawcaz. Bi 2016, youh ndaej daengz dangjveij、cwngfuj dangdieg bangfuz, douzhaeuj 20 lai fanh maenz ngaenz hwnqguh le aen cangjcaz moq.

“Bineix hozcozse guh ok mbawcazhawq 9 dun lai, daiq ndaw mbanj 100 lai ranz gyalai souhaeuj.” Daegseiq Ranzveiz youq ndaw aen cangjgyagoeng mbawcaz ranz de naj- rongh dwk naeuz.

Seizneix, Daegseiq Ranzveiz gaenq baenz miz lo, miz 15 ranz ranzhojndoq gyahaeuj aen cangj- gyagoeng mbawcaz de lo, de daiq 100 lai ranz vunzmbanj cigsoh gyalai souhaeuj 60 lai fanh maenz ngaenz, doengzseiz yingjyangj daiqdoengh doengh aen mbanj henzgyawj hwngfat 5000 moix mbawcaz.

(Liu Swjyenh raiz Dahdingz hoiz)