Bakmbanj miz aen mboq ndeu, aen mboq neix laeg ciengh ndeu gvangq song ciengh, ciengzseiz miz mou miz gaeq doek roengz mboq dai bae. Miz ngoenz ndeu, ndaejnyi miz vunz heuh naeuz miz lwgnyez doek roengz ndaw mboq bae, Yahmoq boux daih’it buet daengz henz mboq, gaemz heiq ndeu couh diuq roengz ndaw mboq bae gouq vunz. De gouq lwgnyez haenx hwnjdaeuj seiz, vunzmbanj hix daeuj daengz lo, henz mboq hemqswdswd, daxboh laeq lwgnyez haenx hix ganj daengz lo, fwngz vix coh Yahmoq ndaq naeuz:“Byawz heuh mwngz daeuj gouq lwg gou, dangh- naeuz lwg gou ngoenzlaeng fat maz bingh, gou couh ra mwngz.” Gij buhvaq Yahmoq ndaeksoebsoeb, coenz vah he hix mbouj gangj couh byaij maranz lo, gwnz roen baihlaeng de ce roengz diuz sairaemx raez- rangrang ndeu.

Daengz gou miz rengz bae guh hong le, couh caeuq Yahmoq guhdoih guhhong, daxmeh gou naeuz:“Vunz naeuz Yahmoq dwg Canghlongh, mwngz gaej saenq gij vahbyangz de. Raeuz caeuq ranz de doxgaenh, ngoenzngoenz doxraen, caez baez caez dauq, mbouj raen de longh fap longh fouz hawj byawz gvaq.”

Gou hix mbouj saenq gij vah vunzmbanj, gou maij caeuq Yahmoq guhdoih bae guhhong, de caeuq bouxwnq mbouj doxdoengz, mwh guhhong seiz, de rox son gou baenzlawz guh. Lumjbaenz lumx haeuxyangz, de naeuz mbouj ndaej baez ndeu couh moek namh daengz laj goek gohaeuxyangz bae, yienghneix gij nya laj goek gohaeuxyangz mbouj dai, gvaqlaeng youh maj hwnjdaeuj caeuq gohaeuxyangz doxciengj gwn bwnh, yienghneix de couh mbouj maj lo. Aeu loek go’nya seiqhenz bae gonq, gvak seuq le caiq moek namh. Caeuq de itheij guhhong, gou hag ndaej mbouj noix doxgaiq.

Gou bae hagdangz doegsaw le, couh gig noix ndaej caeuq Yahmoq guhdoih guhhong lo. Baez gou cuengqhag dauqma bungz de, de gyae’gyae couh heuh:“Daeg’iq, cuengqhag la? Haeuj ranz gou gwn souh vei.” De couh yienghneix daeg- iq raez daeg’iq dinj dwk heuh gou, daj iq daengz hung de mbouj heuh coh gou gvaq.

Gou bae baihrog doeg gauhcungh bihaenx, gwnz gyaeuj Yahmoq hix loh ok haujlai byoem hau lo. Miz ngoenz ndeu, gou roengz lae yaek bae hagdangz seiz, Yahmoq heuh gou caj de yaep ndeu. Gou byaij roengz mbaeklae lij caengz daengz laj, Yahmoq daj ndaw ranz de okdaeuj, dawz gaemz doxgaiq ndeu ndenq hawj gou naeuz:“Gou miz geij gaiq nohmou, mwngz dawz bae hagdangz gwn ba.” Seizde, haeux gwn lij buenq imq buenq iek, miz nohmou gwn engq nanz lo, mbouj rox de bae gyawz miz nohmou gwn, hix mbouj rox de baenzlawz lij miz noh soengq hawj gou dem. Gou caen mbouj siengj aeu, gazngatngat mbouj rox baenzlawz guh, baenq gyaeuj dauq laeng yawj daxmeh, naemj yawj de hawj mbouj hawj gou aeu, daxmeh naeuz:“Aeu ba, aeu ba, simj hawj mwngz couh aeu, daengzcog gaej lumz simj couh baenz.” Doeg song bi gauhcungh, gou baez daih’it miz noh daiq bae hag- dangz, sim’angq dwk mbouj miz maz beij ndaej hwnj.

Yahmoq ciengz gwnz daenj fonx laj hix daenj fonx, mbouj raen de daenj gvaq saek geu buh moq, de aeu ciengx gouj boux lwg, cijaeu ndaej- hoengq, de couh caeuq Goenggvangh guhdoih haeuj ndoeng bae cang gaep aeu duzdoengh daeuj gaj gwn, ciengz daengz vunzmbanj ninz ndaek le, songde cij dauqma, lienzhwnz gaj duzdoengh gaeb dauq cawj gwn. Songde yaek gwn seiz, cungj dwg daj aen congh gyaeujcongz daxmeh gou ndenq vanj raemxdang miz noh duzdoengh he gvaqdaeuj hawj dou gwn. Gyonj daeuj gangj, cijaeu ranz de miz gijgwn, ranz gou cungj ndaej cimz.

Seizde, haeux dwg goenggya, byaek dwg goenggya, maz doxgaiq cungj mbouj ndaej gag ndaem, mbouj ndaej gag gwn. Yahmoq dwg Cangh- longh, vunz mbouj gamj guenj de, hix gik dam de. Laj ranz de miz aen suen hoengq ndeu, de youq ndaw suen ndaem byaek ndaem duh ndaem lwggva, mbouj miz byawz naeuz saek coenz, gij doxgaiq neix gaeuq ranz de gwn, lij ndaej faen hawj ranz gou dem. Ranz de haeux noix couh noix, miz aen suen byaek neix, gyoengqlwg cungjsuenq donqdonq miz doxgaiq gwn, beij lwgnyez ranz bouxwnq ndei lai lo.

Faen reihnaz daengz hoh bihaenx, vunzmbanj ranzranz angq lumj gvaqcieng nei. Gyoengq vunz- mbanj faen reih ndaw mbanj baenz sam daengj, reih um dwg daengj daih- it, reih byom dwg daengj daihngeih, ceiq laeng dwg reih ndaem doenghgo cungj nanz maj. Faen reih seiz, daengj daih’it moux he, dingj ndaej daengj daihngeih song moux, daengj daihsam sam moux.

Yahmoq mbouj rox gangj vah, de hix mbouj ndaej gangj vah, vunzmbanj faen hawj de gij reih yienghlawz de couh aeu yienghde. Doeklaeng, de faen ndaej 13 moux reih daengj daihsam, mbouj ndaej saekdi reih um.

Ndaw reih rinreq lai, namh nding namh sanq, ndaem go maz cungj mbouj baenz, daengz seiz dajsou, vunzmbanj ranzranz haeux rim cang, gaeuq gwn lij ndaej dawz bae gai aeu ngaenz, ranz Yahmoq haeux mbouj gaeuq gwn gvaq bi. Vunzmbanj gangj vah gae de naeuz:“Cibgeij moux reih lij mbouj gaeuq gwn, mwngz mbouj dwg Canghlongh ha, baenzlawz mbouj dwk fap dwk fouz hawj gohaeux mwngz baenz lumj bouxwnq nei.”

Yahmoq mbouj oksing, caih vunz gangj vang gangj raeh, de caeuq Goenggvangh ngoenzngoenz gwed gvak daiq cax, hwnj ndoi bae haifwz, de gag naemj: Gou ngoenzngoenz lai ndaem di doenghgo, mbouj saenq haeux mbouj gaeuq gwn.

Gag guh gag gwn, bouxboux miz rengz guhhong, vunzmbanj hix bae haifwz, mbouj miz saek boux youq ndwi, gyoengq vunzmbanj cungj bae ra giz dieg um haifwz. Yahmoq mbouj bae caeuq vunz doxciengj, de gag dangz goengq ndoi byom he bae loek nya caux reih, goengq ndoi neix namh byom, vunzmbanj hix yawj mbouj hwnj da. Bibi haifwz mbouj dingz, geij bi roengzdaeuj, Yahmoq haifwz ndaej geijcib moux reih, gij reih neix yienznaeuz hix dwg rinreq namh nding, de go maz cungj ndaem, go mbouj baenz go baenz, hoeng ranz de haeux gwn cungjsuenq mbouj you lo.

Bi ndeu, baihgwnz miz boux- daeuz roengzdaeuj, naeuz mbanj dou haujlai reihnaz cungj miz Lijgvang, vunz yaek daeuj sou gij reihnaz miz Lijgvang, it moux hawj fanh maenz ngaenz.

Fanh maenz! Youq seizhaenx, daengx mbanj daengx bi souhaeuj gyonj hwnjdaeuj lij caengz ndaej fanh maenz. Ndaej aen siusik neix, daengx mbanj vunz angq ndaej buenq ndwen ninz mbouj ndaek.

Ciuq gvidingh, gij reih haifwz haenx byawz cae couh duh bouxde, sou reih mwhde, cij sou gij reih miz Lijgvang, gaiq wnq mbouj sou, gij reih daengj daih’it daihngeih cungj mbouj miz Lijgvang, gij reih daengj daihsam cungj miz. Gij reih ranz Yahmoq faen ndaej caeuq gij reih de haifwz cungj miz Lijgvang, rau hwnjdaeuj caemh miz 70 geij moux, ranz Yahmoq yaepyet couh ndaej 70 geij fanh maenz ngaenz, ranz de baez yaep da couh bienq fouqmiz lo.

Ndaw mbanj mizmbangj deng sou 8 moux 10 moux, mizmbangj deng sou sam haj moux, mizmbang mbouj miz saek moux deng sou, daegbied dwg geij ndaek bouxdaeuz ndaw mbanj, gij reih gyoengqde cungj dwg daengj daih’it daihngeih, mbouj ndaej deng sou saekdi, gyoengqde gag moek gyaeuj hwnjdaeuj, mbouj ae lo.

Seizneix vunzmbanj cij fwt singj gvaqdaeuj, laxlawz gij reih rinreq namh nding namh sanq cungj dwg Lijgvang, gvaiq mbouj ndaej ndaem doenghgo cungj mbouj maj.

Ranz Yahmoq fatcaiz lo, gyoenq- lwg de bouxboux hwnj ranz moq, bouxboux gwn ndei daenj raeuj, saed- ceij gvaq ndaej diemz lumj dangzrwi nei.

Aen hagdangz ndaw mbanj yaek doemq lo, vunzmbanj gietdingh heuh vunzlai gien ngaenz guh moq. Yahmoq gien 5 fanh maenz, gyoengq lwglan de rox le, bouxboux doeksaet dwk bak aj oeng’oeng, hoeng mbouj miz saek boux fanjdui de.

Yahmoq bineix ndaej 93 bi, de haq daengz mbanj gou cukcuk ndaej 50 bi, de souh gvaq gungzhoj, hix cimz daengz ngoenz ndei, seizneix ranz de lwglan baenz gyoengq, bouxboux coengmingz youh hauqswnh.

Goengdauh heuh gyoengq lwglan gyohhoh caeuq vunzmbanj comz daengz gyaeuj faex Yahmoq, daih sing doeg mbaw faenz gou sij haenx hawj vunzlai dingq……

Goengdauh doeg daengz gyang, vunzmbanj gyahoh bouxboux doeksaet dwk bak aj mbouj rox haep bae, gyoengq lwglan cix gikdoengh dwk daej mbouj oksing. Caj Goengdauh doeg sat le, Goengliuj ndwn hwnjdaeuj daih sing naeuz:“Miz gienh saeh ndeu, gou aeu youq gizneix gangj okdaeuj cij ndaej, mbouj gangj sou cungj mbouj ndaej rox. Gangj naeuz Yahmoq dwg Canghlongh, dwg gou gangj gyaij hane, seizhaenx vunzmbanj baedou de, dub ndaej bak de ok lwed bae, gig hojlienz. Sou mbouj rox lo, seizhaenx baedou vunz, mbouj dwg gauj baez song baez couh suenq, mwhde, danghnaeuz itcig ra mbouj ndaej miz bouxwnq loeng saeh okdaeuj, Yahmoq couh gwq deng gauj roengzbae, sou gag naemjnaemj, ranz de baenzlai lwg, danghnaeuz de nyaenx mbouj ndaej gaggaj dai bae, gyoengq lwg de mbouj dai iek ha？Seizde gou fwd baenzde gangj, couhdwg yaek gouq de, gvaqlaeng gou hix daeuj caeuq Goenggvangh nyinhloek gvaq, Goenggvangh naeuz gou gangj ndaej deng, Yahmoq hix naeuz gou yienghneix guh dwg bang de, de mbouj ienq gou, gienh saeh neix daengz seizneix ngamq dou sam boux rox ndwi.”

Dingq daengz neix, ndaw lingz- dangz caemrwgrwg.

Soengq Yahmoq bae ndoi ngoenzhaenx, fwn dingz lo, mbwn ronghsagsag, ndit raeujrubrub.（sat）