Guengjsae miz seiq cungj heiq deihfueng hung, Heiqyunghgi dwg cungj ndeu. Cungj heiq neix youq Gvangjsih Nanzningz Si、Cungzcoj Si、Baksaek Si、Laizbinh Si、Gveigangj Si、Fangzcwngzgangj Si ndawde haujlai yienh（gih） caeuq Yinznanz Swngj Funingz Si、Hozgouj Yen daengj dieg riuzcienz, caemhcaiq hwngfat daengz Yeznanz、Genjbujcai daengj Dunghmungz Guekgya.

Heiqyunghgi miz cozbinj lai cungj lai yiengh. Ciuq gyoepsuenq mbouj caez, Heiqyunghgi gungh miz doengh cozbinj cojcienz 700 lai aen, ndawde ndaej bauj ndei 418 aen.

Heiqyunghgi ndawde doenghgij cozbinj cojcienz hungdaeuz miz《Youq Byavujdaizsanh Raen Daegbeix》《Youq Dahsihhoz Raen Baz》《Sam Bouxcinsw》《Gi Lonzyingh Ciucaen》《Bavangz Bae Mbwn》《Yangzbazcej Buen Bing》《Buhbwnroeg》《Vangzluzlangz》《Geiq Vanjhoengz》《Cinzdangzgvanh》 daengj.

Gij vah gwnz daizheiq Heiqyunghgi yungh haenx dwg Vahsih- nanzgvanhva, caemhcaiq lij miz haujlai vahgvenq ndawbiengz、sawloih、vahsug daengj gvendaengz Begvah、Vahmaxgai、Vahsengj caeuq Vahcuengh.

Doenghgij najveh Heiqyunghgi bonj miz 100 lai aen, haujlai dwg aen najveh ndeu boiq“bouxvunz”ndaw heiq ndeu. Bingzciengz yungh saek ndaem、hoengz、hau、heu、henj haj cungj, mizseiz hix yungh saek lamz、mong、gim daengj. Cungj saek lawz yienh’ok gijmaz ne? It dwg gangjmingz saeknaeng, ngeih dwg yienh’ok daegdiemj “bouxvunz”ndaw heiq, caemhcaiq aeu neix daeuj ciuqok gij sibgvenq cojcienz gyoengqvunz ranghdieg baihnamz haj goengq bya (Byayecwngz、Byaduhbangz、Byamungzcuj、Byagizdenz、Byadayiz) caeuq daegdiemj vwnzva deihfueng.

Ndaw Heiqyunghgi miz haujlai cungj ningdoengh aenndang、yienghsiengq caiqlij ning fwngz、yamq din daengj, neix goekgaen dwg yiengh foux ndawbiengz、dinfwngz dwkgienz caeuq yienghsiengq meijsuz ndaej gyoengqvunz Bouxcuengh、Bouxgun ranghdieg Baihsaenamz Guengjsae cungj gyaezmaij haenx; mizmbangj fuengmienh daejyienh le doenghgij funggek minzcuz langhhai hungrengz Bouxcuengh.

Vihliux hawj Heiqyunghgi ndaej swnjcienz caeuq hwngfat engq ndei, daj 1987 nienz haidaeuz, Nanzningz Si mizgven bumwnz guh le haujlai hong ciengjgouq. 2006 nienz, Heiqyunghgi ndaej liedhaeuj daih’it buek Gvangjsih Bouxcuengh Swcigih feihvuzciz vwnzva yizcanj mingzloeg.

2008 nienz 6 nyied 7 hauh, Heiqyunghgi ginggvaq Gozvuyen baecinj, ndaej liedhaeuj daihngeih buek guekgya gaep feihvuzciz vwnzva yizcanj mingzloeg.