Yahmoq gvaqseiq ngoenzde, fwn roengzsoebsoeb, loh mbaeqmbatmbat, mbwn nitriri, rumzbaek boqfifi, gyoengq vunzmbanj bouxboux mbwq- langlang, bouxboux song fwngz sonh roengz ndaw daeh vaq bae cungj mbouj dawz yut okdaeuj.

Doenghbaez, ndaw mbanj miz vunz gvaqseiq, daengx mbanj vunz mbouj aeu heuh couh gag bae bang guh saeh. Yahmoq caeuq bouxwnq mbouj doxdoengz, geijcib bi daeuj, vunzmbanj cungj mbouj miz geijlai boux maij de, ndigah mbouj miz geijlai boux maij byaij gaenh de. Seizneix de gvaqseiq lo, mbouj miz geijlai boux bae bangfwngz.

Goengliuj dwg ndaw mbanj boux souhgyaeu he, seizneix de gaenq mumh hau、byoemgyaeuj hix hau caez, de gangj vah vunzmbanj mbouj miz geijlai boux mbouj dingq. Goengliuj naeuz:“Gij saeh neix bouxboux miz ngoenzde, ngoenzneix daengz ranz neix, ngoenzlaeng daengz ranz haenx. Bouxgeq naeuz ‘vunz roxnaj ngoenz gwn, mbouj roxnaj ngoenz dai’, miz byawz ndaej gyaeu fanh bi, mbouj ndaej baenzneix, daihgya lijdwg vaiqdi bae ranz de bang guh di saeh ba.”

Dingq Goengliuj yienghneix gangj, daihgya cungj roxnyinh mbouj bang gangj mbouj ndaej bae. Yaep ndeu, gyoengq vunzmbanj cungj daengz ranz Yahmoq bae lo. Miz boux caeuq gyoengq lwg de itheij, ram Yahmoq cuengq roengz ndaw faex bae, miz boux bae bang cawj haeux cawj byaek, miz boux bae bang caep lingzdangz. Bouxboux guh neix guh haenx, cungj nyaengq hwnjdaeuj.

Yahmoq heuhguh maz coh, vunz- mbanj mbouj miz byawz rox, de ngamq haq daeuj moq, youh geq dem, vunz- mbanj couh heuh de guh Yahmoq, itcig baenzneix heuh.

Dieg dou baenz gvenq, bouxvunz dai le, aeu cingj goengdauh daeuj guh mo, danghnaeuz boux dai geq couh guh song hwnz sam ngoenz, coz couh ngoenz he hwnz he couh ndaej oksang. Lij cingj vunz hawj bouxdai sij mbaw faenz ndeu, mbaw faenz neix aeu sij gij saeh ndei saeh rwix ciuhvunz bouxdai okdaeuj caez, yaek dawz bouxdai bae ndoi seiz heuh goengdauh doeg hawj sojmiz vunz dingq.

Gyoengqvunz gig yawjnaek mbaw faenz neix, mbaw faenz neix sij ndaej ndei mbouj ndei, sij ndaej cienh mbouj cienh, couh baengh boux sij neix lo. Doenghbaez miz boux cingj goengdauh daeuj bang sij, miz boux heuh ndaw ranz boux rox saw daeuj sij. Yaek sij faenz gaxgonq, bouxcawj heuh ndaw ranz boux haemq geq youh caeuq bouxdai gyaucingz haemq ndei he daeuj, lwnh bouxdai ciuhvunz baedauq hawj bouxsij dingq, caiq menh sij roengzdaeuj.

Ndaw mbanj suenq gou lai rox di saw, sij mbaw faenz Yahmoq gienh saeh neix couh hawj gou guh lo. Gyoengq lwg Yahmoq heuh Goengliuj daeuj, daengq de lwnh gij saeh Yahmoq hawj gou. Gou riu naeuz:“Gou mbouj dwg ci rumz haeuj saejgeq, ciuhvunz Yahmoq, ndaw mbanj raeuz itdingh mbouj miz byawz beij gou lij cingcuj.”

Vunzmbanj buenq saenq buenq ngeiz, gyoengq lwglan Yahmoq hix mbouj daih cuengqsim, Goengliuj naeuz:“Deng, daeglwg neix gangj ndaej deng, sou gaej you lo, de sij ndaej.”

Dingq daxmeh gou lwnh, Yahmoq lij iq seiz couh gaen daxboh de dauqcawq deuz bing deuz caeg, de 18 bi seiz gaen daxboh de deuz daengz mbanj daxmeh gou daeuj. Yahmoq vunz diegrog, ndang hung sang, noh hau maeq, naj gyaeundei, daeglwg dicuj ndeu lij caengz miz yah, vunzmbanj couh guhmoiz hawj Yahmoq haq hawj daeglwg dicuj, couh yienghneix, Yahmoq bohlwg couh youq ranz dicuj gwn youq roengzdaeuj. Yahmoq seng miz lwgsai lwgmbwk song boux, song lwg de gig coeng- mingz. Gaijfang le, vunzmbanj ngoenzngoenz baedaeuq daeggvan Yahmoq, daeggvan de souh mbouj ndaej vunz ndaq vunz moeb, cag gyaet hoz dai lo.

Goenghgvangh mbanj gou miz sam boux lwg, bouxsai song dah mbwk, mehyah de baenzbingh dai bae lo. Boux he naemj aeu geu vaq, boux he ngah aeu geu buh, couh yienghneix Yahmoq daiq song boux lwg de haq hawj Goenghgvangh, doeklaeng de caeuq Goenghgvangh youh seng miz song sai song mbwk 4 lwg, ranz neix couh miz 9 lwg, caemh 11 boux vunz doxgwn.

Ranz Goenghgvangh caeuq ranz gou doxnem, song ranz doxdoq faq ciengz ndeu, faq ciengz cungqgyang hai miz aen congh hung lumj aen bak duix he nei. Aen cangz daxmeh gou couh an youq bien bakcongh haenx, ranz Goenghgvangh gangj maz vah, ranz gou cungj dingq ndaej nyi, ranz de caeuq ranz gou yaek doxciq maz doxgaiq, couh daj aen congh neix soengq vah gvaqdaeuj, danghnaeuz gij doxgaiq iq, couh daj aen congh neix ndenq bae ndenq dauq.

Yahmoq haq daengz mbanj gou bide, gou ngamq doekseng, boh gou youq baihrog dang di daeuz he, ciengzseiz okbae haihoih, gou okseng seiz de hix mbouj youq ranz, gou dwg haetromh doekfag. Dingqnyi miz sing lwgnding daej, Yahmoq couh daj aen congh haenx ndenq vanj souh haeux- yangz ndat he gvaqdaeuj, doiq daxmeh gou naeuz:“Seizneix hoj lai, mbouj miz bya miz noh gwn, ndaej gwn vanj souh ndat he couhdwg donq ceiq ndei lo, mwngz vaiq swnh ndat gwn, boujbouj ndangdaej.”

Daxmeh gou doiq Yahmoq naeuz:“Ranz mwngz vunz lai, souh mbouj gaeuq gwn, mbouj yungh hawj gou lo.”

Yahmoq naeuz:“Cib boux gya- hoh, mbouj yawz boux roq ranz, raeuz ranz ndeu gaej gangj vah song ranz. Mwngz vaiqdi gwn, seng lwg deng iek, ngoenzlaeng lau miz bingh.”

Seizde dwg seiz hoj, vunzmbanj guhhong aeu goengfaen cij ndaej gwn haeux, ranz Yahmoq vunz lai, haeux gwn miz donq gwnz ra donq laj, gyoengq lwg de ngoenzngoenz daej dungx iek. Moix ngoenz guhhong sat le, Goenghgvangh caeuq Yahmoq cungj dwg swnh mbwn caengz laep hwnj bya bae ra byaekndoeng maranz cawj hawj gyoengqlwg gwn guh donq.

Mbouj gag dwg ranz Yahmoq mbouj miz haeux roengz rek, ndaw mbanj hix dwg bouxboux iek dungx bae guhhong. Miz bi he bet nyied, ndaw reih lwgmaenz baenz aen lo, aiq dwg naemj daengz vunzmbanj cungj iek dungx bae guhhong, gyoengqdaeuz mbanj gietdingh daengz banringz couh faen boux vunz song aen lwgmaenz ndip hawj doenghboux bae guhhong guh haeuxringz. Yahmoq ngeix daengz gyoengqlwg, de gwn aen maenz daih’it le, mbouj naemj caiq gwn lo, aen lwgmaenz gyang fwngz lumh bae lumh ma cungj mbouj gamj coq haeuj bak bae, caj daengz gyoengqvunz cungj bae guhhong le, de laeglemx dawz lwgmaenz coq daengz ndaw dangzvaq bae, dajsuenq banhaemh dawz maranz faen hawj gyoengqlwg gwn.

Banhaemh sou hong lo, lauheiq miz vunz caeg lwgmaenz bae ranz, gyoengqdaeuz mbanj aeu baez boux baez boux fan buh fan vaq ra, ra daengz Yahmoq seiz, goengdaeuz mbanj daj ndaw dangzvaq Yahmoq mo ndaej aen lwgmaenz he okdaeuj, goengdaeuz mbanj daihsing maenj naeuz:“Sou yawj ha, Yahmoq caeg lwgmaenz lo, ngoenzneix caeg fagcim, ngoenzcog caeg aen gim, bouxvunz miz aen ukgyaeuj neix dou mbouj ndaej cuengq gvaq.”

Haemhde, Yahmoq ma daengz ranz lij caengz ndaej gwn caeuz, vunzmbanj couh dawz de daengz bakmbanj laj goreiz baedaeuq.

Seizde baedaeuq vunz mbouj dwg gangjgangj vah ndaqndaq geij coenz couh sat, caen dwg doengh din doengh fwngz. Mwngz gangj vah hix deng moeb, mbouj gangj hix deng moeb. Baedaeuq Yahmoq seiz, miz boux vix najbyak de, miz boux fak aen naj de, miz boux yungh gaemxgienz cuk de, miz boux yungh din dik de. Yahmoq bibi buengqbuengq ndwn mbouj onj, saemxsaemx saxsax youq mbouj baenz, caih vunz moeb, caih vunz dik, de mbouj ok saek sing.

Bide Goengliuj lij coz, vunz baedaeuq Yahmoq seiz de hix daeuj daengz henz, de raen Yahmoq deng baedaeuq ndaej gig hojlienz, couh daihsing naeuz:“Gaej guh lai lo, yah neix dwg Canghlongh, de rox fap rox fouz, hangz de daiq lai daiq haenq lau dou deng nanh bw.”

Vunzmbanj mbouj lau cungq mbouj lau mid, couh lau boux Cangh- longh, dingq daengz gij vah Goengliuj, bouxboux mbouj gamj gangj sang lo, goengdaeuz mbanj hix yaengx fwngz hwnjdaeuj coh vunzlai vadvad, eiqsei dwg hawj vunz dauqbae.

Riuznaeuz boux Canghlongh rox fap rox fouz, moix ngoenz haetromh hwnqdaeuj, byawz bungz raen daengz de, couh deng nanh lo. Lwgnyez bungz de, haeux mbouj gwn, buh mbouj daenj, youh daej youh nauh; bouxlaux bungz de, ndang naet ndang naiq, youq mbouj onj ninz mbouj ndaek. Aeu bae gouz boux Canghlongh daeuj gej cij ndaej, mboujnex boux deng fap deng fouz couh bingh ciengx gwnz ndang, yied ngoenz yied roz, doek- laeng dai bae.

Hix mbouj rox dwg caen dwg gyaj, daj baezde hwnj, gyoengq bohmeh couh doiq gyoengq lwgnyez naeuz:“Bungz raen Yahmoq aeu liz gyae di, de dwg Canghlongh.” Gyoengq bouxcoz couh daengq boux- geq naeuz:“Yahmoq dwg Canghlongh, gaej bae gaenh de.”

Vunzmbanj bouxboux raen daengz Yahmoq couh lumj lau dwk binghmazfung nei vaiqvaiq ndoj deuz, de byaij loh mbouj miz boux buenx, guhhong mbouj miz boux bang. Seizde guhdoih bae guhhong, Yahmoq cungj dwg boux dog gag youq giz ndeu guh.

（caengz sat）