Ndwen 2 ngoenz 17 dwg liggaeuq ndwen- cieng cibsam, dwg ciet hoihbo cienzdoengj Sanhgyangh Dungcuz Swciyen Laujbauj Yangh Laujbah Cunh gaenq miz 200 lai bi haenx, ngoenzhaenx, vunzlai minzcuz vunznoix Dung、Myauz、Yauz daengj ndang daenj buhvaq moqsag daj gyae gyawj comz daeuj Laujbah Cunh, yungh boq venz caijdangz、roegdoxdoj、dohyeh daengj minzsuz hozdung gig miz daegsaek minzcuz vunznoix haenx angqhoh ciengmoq, muengh bi moq fwn yinz rumz swnh、haeuxgwn fungsou, maqmuengh gwn van youq ndei.

Ngoenzhaenx hozdung yienhciengz, vunz lai vunz daih, nauhyied dangqmaz. Baengh aen seizgei neix, Liujcouh Si Swhfazgiz、Sanh- gyangh Dungcuz Swciyen Swhfazgiz lienzhab cujciz doih senhconz fapceih bae daengz hoihbo, dawz gij yenzsu fapceih caeuq vwnzva minzcuz dox giethab, haiguh “fapceih vwnzva leih minzcuz hengz” hozdung, dawz faplwd soengq daengz henzndang vunzlai minzcuz vunznoix bae.

Ciuq cam rox, “dangzgoq fapceih hoihbo” dwg Liujcouh Si doiok fapceih senhconz gyauyuz binjbaiz moq, Liujcouh Si giethab gij daegdiemj gizdieg minzcuz vunznoix cietheiq minzcuz lai、vunzlai minzcuz gietcomz、yienhciengz heiqfaenh nauhyied, cinjcing gaemdawz seizgei senhconz fapceih, cauhmoq guhbaenz le gij vunqsik senhconz fapceih hab vunzlai, rengzrwd daezsang bujfaz senhconz caeuq faplwd fugsaeh yaugoj.

(Fu Yungjsinh/傅永新 Suz Sinh/粟 鑫)