Baezneix youh hwng guh hawfwen,

Haemhlwenz angq ndaej mbouj laep da;

Mboujlwnh gizgwnz caeuq gizlaj,

Sim’angq couh lumj dujva hai.

Cwngcwz hailangh ndaej daenj lengj,

Bengx raen mehmbwk bouxboux maez;

Bouxminz daengx bi cungj vuenheij,

Mwhneix beixnuengx lak lumj sien.

Caetit haucau geiqniemh dangj,

Beksingq fanndang youq ngoenzneix;

Aencingz duh dangj cungj aeu geiq,

Hai seizdaih moq vih beksingq.

Miz Siz Ginbingz gvaqdaeuj swnj,

Bouxminz miz gwn sim oijdingh;

Ciuq fap ceih guek biengz cij bingz,

Daengx guek beksingq gvaq ndaej ndei.

Seizneix lajmbanj bienq yiengh laux,

Mbanj iq mbanj laux miz laeuzfangz;

Guh ranz bingzdingj hangz dam hangz,

Ranzranz dajcang caen gyaeundei.

Gaijgwz hailangh ngamq fouqmiz,

Rom ngaenz bibyai dawz ranz cang;

Gwn imq youq ndei gvaq ndaej an,

Bongh coh siujgangh gyo’mbaiq dangj.

Gocoengz goj ndaej maj cien bi,

Gyo’mbaiq cujsiz Siz Ginbingz;

Lingjdauj daengx guek raeuz bouxminz,

Ndwenngoenz menhmenh cingq bienq ndei.

Cingcawz nduknaeuh guh daengz daej,

Caezgya doengz guh rengz cij hung;

Seizseiz rom rengz coh naj bungz;

Couh lumj raemxgiengh cung laj dat.