Siengj mbouj daengz, Dahlienz gig sangj couh dap naeuz:“Haengj ha! Gou couh mbouj saenq lo, saedceij ciengxlwenx cungj dwg yienghneix gungzhoj roengzbae?” Dahlienz mbouj siengj saek yaep, hix mbouj leixlangh doengh cungj gungzhoj roxnaeuz fouqmiz saekdi.

Mbanjranz miz cojcoeng Boux- cuengh, ranz engq miz bohmeh youq, baenzbaenz cungj dwg aeu baema ya, Daegmingz caeuq Dahlienz song vunz naengh banci daj Haijnanzdauj ma daengz yienhsingz le, youh siengj mbaet di cienz he, couh song vunz byaij roen baema mbanjranz.

Mehmbwn mbouj hai da ya, bienbien doek fwnmoenq mbouj dingz. Daegmingz caeuq Dahlienz rag doiq haiznaez vad daengz bakmbanj seiz, cij yawjraen bakmbanj dauqcawq cungj dwg haexvaiz haexmou uqatat, baenz raq baenz raq heiq haeu cung daengz dangqnaj vunz cungj yaek rueg bae.

Daegmingz mbouj ndei eiqseiq cam Dahlienz naeuz:“Mwngz souh ndaej doengh cungj heiqhaeu neix lwi?” Dahlienz cijdwg gig geizheih dwk muenghyawj seiqlengq, mbouj hoizdap gij vah Daegmingz.

Ciuq baeznaengz yienghsiengq, baihnaj douranz roxnaeuz daxhongh haengjdingh hix dwg haexgaeq haexbit baijlele, youh uq youh haeu raixcaix, seizhaenx, caeklaiq bohmeh ciep ndaej gij saenq Daegmingz le, senq baet cingh baihnaj douranz caeuq daxhongh lo. Caiq gangj, bohmeh caeuq caencik Daegmingz cungj ok bakdou ranz daeuj angqcoux Dahlienz, hawj Daegmingz caeuq Dahlienz roxnyinh sim raeujrubrub, maz sinhoj caeuq naetnaiq cungj gag buetdeuz liux lu. Yawjraen ndawranz lij baij miz aen densi ndaemhau caeuq aen danci buenq gaeuq buenq moq ndeu, ndawsim Daegmingz cuengqsim ndaej lai lo.

Neix dwg Daegmingz sien sij saenq ma daengq ndei, hawj bohmeh guh ndei caepcawq hane, yawj hwnj- daeuj, bohmeh caen dwg caenhrengz banh ndeisaeh lo. Hoeng, caeuq ndaw ranz Dahlienz doxbeij, neix cingqcaen dwg cengca ndaej daiq gyae lo. Daegmingz caen yousim Dahlienz souh mbouj ndaej gij fouq gungz cengca gig haenq neix, gangj mbouj dingh song vunz aiq deng cuengqfwngz faensanq ne.

“Ndawranz mbouj lumj mwngz gangj yienghhaenx gungzhoj baenz youqgaenj ya.” Dahlienz mbouj leix- langh Daegmingz baenzlawz siengj, lij doq yawj doq doiq Daegmingz naeuz.

Dingqnyi Dahlienz yienghneix naeuz le, ndawsim Daegmingz youh siliengz youh diemzsubsub, siliengz dwg bonjfaenh guhgyaj yaeuh Dah- lienz; diemzsubsub dwg Dahlienz caen simndei, mbouj yiemz ndaw ranz bonjfaenh youh gungz youh gaeuq youh uq, bonjfaenh ciuhvunz neix caen miz fukheiq lo.

Gij saeh ceiq youqgaenj maranz couhdwg hawj bohmeh doengzeiq Daegmingz caeuq Dahlienz baenzgya, bohmeh caeuq caencik yawjraen Dahlienz youh roxsoq youh sienhsoh, doeklaeng gyoengqvunz cungj gig muenxeiq. Ndawsim Daegmingz lumj hai va nei, ngoenzngoenz angqvauvau bak riu cungj haep mbouj ndaej bae.

Daegmingz caeuq Dahlienz ma daengz Haijnanzdauj le, couh cingqsik yiengq bohmeh Dahlienz gangjmingz gij eiqsei song vunz yaek baenzgya.

“Mbouj ndaej! Neix mbouj dwg vamoq cap haeuj goeng haexvaiz bae ha, va caiq rang hix bienq haeu liux bae.” Daxmeh Dahlienz nyinhnaeuz, Haijnanz seiqcawq miz vunzfouq, vihmaz mbouj haq, gvaq saedceij fouqmiz mbouj ndaej ha, bienbien siengj bae dieggyae dieggungz youq ranznaez, dangciengz couh mbouj doengzeiq.

Daegmingz caeuq Dahlienz mboujdan dwg sai mizcaiz mbwk baenzsau, youh cingz ngamj eiq hab, caen dwg mbouj miz maz ndei deudik dem lo. Gangj cien gangj fanh, bohmeh Dahlienz couhdwg yiemz ndaw ranz Daegmingz daiq gungzhoj lai, lau dahlwg haq gvaqbae le souh haemz gwn hoj, saedceij gvaq ndaej mbouj ndei. Doiq cungj siengjfap bohmeh Dahlienz, Daegmingz senq couh liuhsiengj ndaej daengz lo.

Hoeng, ndawsim Dahlienz mbouj deng doenghngauz saekdi, de cigsoh youh byotbyat doiq daxmeh de naeuz: “Meh, mbouj miz naez haex haeu, haeux rang daj gyawz daeuj, Daeg- mingz ranz caiq gungzhoj, gou cungj gaen dingh de lo.”

Daxboh Dahlienz nyaenx mbouj ndaej haibak cam Daegmingz naeuz:“Mwngz miz maz bonjsaeh aeu dahlwg gou guh yah?”

“Gungz hix siengj bienq couh gamj youq gwnz rin ndaem va.” Daxboh Dahlienz cam ndaej haeuj ndok, Daegmingz hix han ndaej haeuj ngviz youh miz seieiq.

Gyoengqvunz ciengzseiz naeuz: Sau hung mbouj hab louz, lwg hung mbouj youz meh, bohmeh baenzbaenz cungj euq mbouj gvaq lwglan. “Gawq- yienz dwg ndaw fwn daeuj, ndaw raemx bae, couh aeueiq gij genjleh lwgsau ba.” Daxboh Dahlienz yawj- raen Daegmingz mboujdan ukgyaeuj cinglingz, dungxmaeg hix mbouj loek, couh hai bakgim han naeuz, daxmeh Dahlienz cijndaej gvan ciengq baz riengz youzcaih gyoengqde suenq lu.

Baenzgya le, Daegmingz caeuq Dahlienz saedceij gvaq ndaej youh vuenyungz youh cwxcaih, doengx- ngoenz song vunz fwngz yien fwngz bae hwnjban, doengxhaemh song vunz doq cejgoj doq guh hongranz, sim diemz lumj bouxsien gvaq ndwen- ngoenz nei. Bi daihngeih, Dahlienz seng daeglwg ndeu le, couh swnh gvaq cieng, Daegmingz caeuq Dah- lienz daiq daeglwg baema ranzmbanj raen bohmeh. Hoeng, ngamq daengz mbanjranz ndaej song ngoenz, daeglwg couh deng dwgliengz fatndat lo, siengj cawx di yw he hawj daeglwg gwn, byaij doh daengx aen haw cungj ra mbouj miz, daengx ranz vunz simgip ndaej cienqlolo.

“Boh, aen danci cuengq youq gyawz la, gou gwih bae ndaw singz cawx yw hawj lwg.” Daegmingz simgip dwk cam daxboh naeuz.

“Lwg ha, ranz raeuz gyawz miz danci ho, bi’gvaq mwngz maranz, aen densi caeuq danci cungj dwg ciq bouxwnq ma baijyiengh hane, daxboh mwngz gyawz miz cienz cawx ya.” Daxboh siliengz dwk gejnaeuz.

Daegmingz roxnyinh ndawranz caen gungzhoj dangqmaz lo, lau mehyah dingqnyi le hojsouh, cijndei vaiq fung bak daxboh naeuz:“Gaej caiq gangj roengzbae dem lo.”

Dahlienz cingqngamj umj daeg- lwg byaij gvaqdaeuj, dingqnyi bohlwg gangj vah le, doeksaetyat, ndawranz caen beij bonjfaenh siengj haenx gungzhoj ndaej lai lo. Raemxda nyaenx mbouj ndaej sikhaek conh okdaeuj, lij caengz ndaej uet bae, couh deng Daegmingz yawjraen lo.

（caengz sat）