Baenzdauq baebo Myauzcuz, dwg Yungzsuij Myauzcuz Swciyen gak yanghcin mbanjgyok youq moix bi liggaeuq ndwencieng cosam daengz cibcaet mboengq neix banh gij hozdung ngoenzciet ndeu. Duenh neix moix ngoenz cungj guh baez baebo ndeu, laebdaeb mboujduenh, de dwg ngoenzciet cojcienz ndawbiengz gvaq ndaej hoenghhwd, aeu Myauzcuz guhdaeuz gak cuz lwgminz vih geiqniemh goengcoj、siu cai gouz fuk、vunzlai doxcomz guh- angq ndeu.

Ciuq bouxsughangz gaujcingq, Myauzcuz Yungzsuij miz aen fungsug ndeu: Ndwencieng coit mbouj ndaej boq venz mbouj ndaej ok dou, co- ngeih ndaej boq venz mbouj ndaej ok mbanj, daj cosam daengz liggaeuq cibcaet dwg mboengq seiz vunzlai guh’angq, duenh neix gak mbanj mboujlwnh bouxlaux bouxiq bouxsai mehmbwk cungj daengx ranz okdoengh bae liux, seiqlengq baebo. Daengz liggaeuq cibbet, couh daengz seiz guh hongnaz lo, gak mbanj cungj fung aenvenz hwnjdaeuj, cigdaengz seizsouhaeux sat le cij ndaej haifung. Gij fungsug neix ndaej hawj baebo Myauzcuz Yungzsuij dingzlai comz youq ndwencieng cosam daengz cibcaet mboengq neix, ndawde laeb- daeb banh mboujduenh, baebo ndaej doxlienz lumjbaenz diuzlienh ndeu, vunz dangdieg gaengawq ngoenz banh baebo gonqlaeng bae baizmingz, daj“bo daihsam”baiz daengz“bo cibcaet”bae.

Mbanj Myauzcuz Yungzsuij baez banh baebo, seiqhenz geijcib goeng- leix gyoengq bouxcoz cungj daenj hwnj buhvaq gyaeundei ngoenzciet, boq venz sasa, angq comz youq gwnz ndoi； mwh haenx gwnz bo vunz cien vunz fanh、mbawgeiz biufiegfieg；cawz le diemjyieng cuengqbauq, lij guh foux lungz、saj saeceij、maxdoxdik、roegdoxdoj、gwihmax beij vaiq daengj hozdung. Ndawde aeu maxdoxdik ceiq haenqrem ceiq yungyiemj lo, ndigah hix ceiq ndaej vunzlai maijgyaez. Cibgeij duz maxdaeg ciuq gonqlaeng doxdik, bouxcawj duzmax ndaej daih’it haenx, mboujdanh ndaej ciengj, hix ndaej vunzlai dang guh bouxak.

Ngoenz baebo hix dwg ngoenz hab ra caen cam youx, doiq bouxcoz guhyoux daeuj gangj, ngoenz baebo youh ndaej caeuq bouxyoux raennaj gangjgoj gyausim lo. Youq gwnz bo lwgmbauq dahsau baenz gyoengq baenz bang comz youq giz ndeu, doiq fwen Myauzcuz, lwnh ok maqmuengh saedceij ndei caeuq ra ndaej ndiep- cingz gyaeundei.

Youq duenh guh hozdung baebo diuq gij foux caijdangz haenx, dwg cungj foux daibyauj Myauzcuz ndeu, geijcib boux dahsau daenj buhvaq gyaeundei, humx baenz aen gvaengz ndeu diuqfoux, heiqfaenh vaiqvued, ciengzmienh yiedlied.

Aenvenz dwg yozgi Ranzmyauz ceiq maijgyaez lo, moix baez baebo cungj miz aenvenz cijbaenz, doengh fwen venz miz fwen coux hek、fwen soengq hek、fwen cam loh、fwen angqyangz daengj, lai cungj lai yiengh, sing goksasa saenqdoengh mbwndeih.

Hoeng, aenvih souh yendaiva yingjyangj, fuengsik gyoengqvunz gvaq saedceij bienq yiengh lo, caiqlij vunz lajmbanj haujlai cungj haeuj singz bae dajgoeng, baenzdauq hoz- dung baebo Myauzcuz hix cugciemh bienq noix lo.

Guekgya raeuz gig yawjnaek baujhoh doenghgij feihvuzciz vwnzva dijbauj, 2006 nienz 5 nyied 20 hauh, baenzdauq hozdung baebo Myauzcuz ndaej Gozvuyen baecinj liedhaeuj buek daih’it guekgya gaep feihvuzciz vwnzva yizcanj mingzloeg.