“De, roengzrengz cauh aen cung- sim cauhnieb densangh banggungz canjnieb, daiqdoengh ranzgungzhoj couhnieb cauhnieb, haenqrengz dawz densangh canjnieb cauh baenz diemj demmaj moq ginghci gizdieg Loz- cwngz, bang doi cinjcing banggungz. De, haenqrengz hengzguh densangh canjnieb banggungz hanghmoeg, daiqdoengh ranzgungzhoj saedyienh canjnieb laisou, gwnz roen vut gungz gunggeng Lozcwngz boux daiqdaeuz baenz miz ceiq depgyawj vunzlai! De, couhdwg ngoenzneix boux daihcaet bouxvunz ak nungzyez Cungguek——Aen Gunghswh Cwzyin Mizhanh Denswj Sanghvu Senhnungz Cungh- ouh Gvangjsih dungjswcangj Loz Cuimeij.”Ndwen 8 ngoenz 19, youq gwnz daiz lingx ciengj aen bozlanjvei nungzyez saekloeg daihneix gozci Cungguek·Sinhcin(gaiq daihseiq) 2018, bouxcujciz gwnz daiz gaisau, bouxyawj laj daiz bekfwngz nyauz- nyauz, Loz Cuimeij yamq hung byaij hwnj daiz lingx ciengj.

Loz Cuimeij bi 1980 seng, dwg vunz Mbanjdaloz Cunh Canghloz Cin Dunghmwnz Lozcwngz Mulaujcuz Swciyen. Aenvih ndaw ranz hojndoq, seiz lij iq de ciengzseiz bang ndaw ranz rap byaek bae haw gai, boujdiep ndaw ranz yungh. De gauhcungh caengz bizyez, aenvih ndaw ranz hojndoq deng dauqranz mbouj ndaej doegsaw lo, baenzlawz guh? Baengh gij ginglig daj iq gai byaek, de hainduj buenq byaek bae gai, caeux hwnq hwnz dauq, hainduj ciuhvunz bonj- faenh mbouj doxdoengz ndeu.

Hoeng, seng’eiq buenq byaek gai yied daeuj yied hoj guh, Loz Cuimeij vih neix liz mbanjranz bae Cezgyangh daengj dieg fatdad henz haij bae guh hong, baenz cien fanh boux dajgoeng youq baihrog ra cienz ndawde boux ndeu.

“Hawsingz yienznaeuz miz seiz- gei, hoeng dauq ranz cauhnieb ndaej saedyienh aen loqsiengj seiz lwgnyez.” Loz Cuimeij naeuz, bi 2008, de daj Cezgyangh dauq ranz cauhnieb, caeuq bouxwnq doxgap hai bouq gaicawx, hainduj le diemj haidin moq cauhnieb de. Vih bau bouq gaicawx gai doxgaiq reihnaz ndei, bi 2015, de youh banh le Aen Hozcozse Vunz- guhnaz Ndaem Ciengx Saekheu Swnghdai Siengzdai Lozcwngz, vih seyenz haeuj se gunghawj cehfaen、vafeiz、ywgajnon, caemhcaiq son dinfwngz, doxgaiq guh okdaeuj gai bae bouq gaicawx, byaij hwnj le gij ginghci hwngfat vunqsik “hozcozse+nungzhoh”, daiqdoengh vunzlai byaij diuzroen caezcaemh baenz miz.

Vihmaz gaxgonq senj guh nungz- yez? Loz Cuimeij lwnh bouxraiz, de dauq daengz mbanjranz yawjraen haujlai vunz lij vih gwn mbouj imq youheiq, gyoengqde mbouj miz nungz- yez daihneix, mbouj miz vangjdox- lienz+coicaenh lajmbanj it ngeih sam canjnieb doxyungz ndeindei hwngfat, gyoengqde hojndoq yienzaen goekgaen couhdwg swhyenz giepnoix caeuq gvanhnen doeklaeng. Gyoengqde ciengzseiz aenvih gyaudoeng mbouj fuengbienh, saenqsik mbouj doeng, ngaiz haujlai doxgaiq reihnaz naeuh youq gyaeuj naz gyang reih gai okbae mbouj ndaej. Gyoengqde saetmuengh、fwzfwd、mbouj miz banhfap, neix hawj Loz Cuimeij gig sim’in, vihneix couh miz aen siengjfap cauhbanh densangh lajmbanj lo.

Loz Cuimeij naeuz, riengzdwk guekgya mboujduenh diuzcingj gij hwngfat cwngcwz bangcoengh nungz- yez, engq hawj de miz gij siengj- muengh banh aen gunghswh densangh. Bi 2016 ndwen 9, ndaej daengz dangdieg dangjveij、cwngfuj haeujcoengh, de youq Lozcwngz cucwz laebbaenz Aen Gunghswh Cwzyin Mizhanh Denswj Sanghvu Senhnungz Cungh’ouh Gvangjsih, roengzcienz 7000 lai fanh maenz, hwnjguh le 3000 bingzfanghmij aen suen densangh banggungz canjnieb caeuq dieg cauhnieb, 30 aen dieg cauhnieb banggungz gohgi, youq daengx yienh 67 aen cunh gungzhoj laeb le 67 aen camh fugsaeh densangh, caemhcaiq hwnjguh aen cungsim romcang vuzliuz lajmbanj、aen bingzdaiz guenjleix saenqsik vuzliuz lajmbanj caeuq aen hidungj daehyinh vuzliuz lajmbanj. Youq neix doengzseiz, baengh gij seizgei Sinhcin Si Fuzdenz Gih haiguh banggungz boiqhab, gaenx- maenx caeuq Sinhcin mizgven giyez haiguh doxgap, gonqlaeng caeuq Sinhcin Si Fuzdenz Gih ginhyungz cauhmoq lenzmungz、aen bingzdaiz caezyiengj swhyenz vanhguz Sinhcin daengj giyez ciemdingh hezyi doxgap, gaenxmaenx doicaenh saedhengz lajmbanj saenqhwng caeuq densangh canjnieb banggungz canloz.

Ciuq cam rox, aen gunghswh cungh’ouh yungh gij vunqsik “den- sangh+dinghdan nungzyez+gihdi+ranzgungzhoj”, doenggvaq hengzguh densangh canjnieb banggungz hangh- moeg, son dinfwngz guh doxgaiq reihnaz biucinjvaq、hwngfat dijhi gveihmozva、siugai fugsaeh binjbaizva hawj ranzgungzhoj. Bi 2017 daengz seizneix, aen gunghswh neix vih ranzgungzhoj siugai doxgaiq reihnaz daengz 5000 lai fanh maenz, cigsoh daiqdoengh 5000 lai ranz ranz- gungzhoj 10000 lai vunz saedyienh canjnieb laisou, rengzrwd doidoengh hong vut gungz gunggeng Lozcwngz.

“Guh nungzyez, couhdwg baengh gaenx guh nungzyez caeuq dingj- maenh laebdaeb roengzrengz.” Loz Cuimeij baenzneix naeuz.

Seizcin doek naed ceh ndeu, seizcou sou baenz fanh naed. Loz Cuimeij baengh gij singq mbouj fug saw caeuq gij cingsaenz mboujduenh baenaj, buekguh ok le gij saehnieb ndei bonjfaenh, ndaej daengz gak gaep dangjveij cwngfuj haenh, ndaej bingz baenz boux biubing mehmbwk cauhnieb mbanjbya Mulauj, ndaej senj baenz veiyenz Aen Hezvei Giyezgyah Mehmbwk Hozciz Si, bi 2016 ndaej senj guh boux veijyenz cwnghez Lozcwngz Mulaujcuz Swciyen, Gvangjsih Fulenz cizveij. Aen Gunghswh Cwzyin Mizhanh Denswj Sanghvu Senhnungz Cungh- ouh Gvangjsih baenz “nyanh lingx- daeuz” Lozcwngz densangh hangz- nieb, bi 2018 ndaej “ciengj giyez senhcin” caeuq ciengj giyez bangfuz senhcin “bak aen giyez bang bak aen mbanj” vut gungz gunggeng Lozcwngz.

“Ndaej bingz baenz bouxvunz ak nungzyez Cungguek, mboujdan dwg gujli gou, hix dwg coi gou.” Loz Cuimeij naeuz, de yaek haenqrengz fatyiengz gij cingsaenz vunzguhnaz “giendingh daengzdingj、sim miz lajmbwn、mbouj miz seisim”, haenqrengz dawz densangh canjnieb dajcauh baenz diemj demmaj moq ginghci gizdieg Lozcwngz, coh roen banggungz minzcuz itloh byaij roengzbae, cauhguh gij binjbaiz doxgaiq reihnaz daegsaek deihfueng, doidoengh doxgaiq reihnaz daegsaek haeuj singz, vih bang doi cinjcing banggungz fatok cozyung engq hung.

(Mungz Cwnghswh raiz Dah- dingz hoiz)