Aen ranz Ausam rengqsiz le, seizneix miz ranzrwix bangbouj, roxnaeuz buen bae yienhsingz youq aen siujgih Lauxyieng Gyayienz cwngfuj ok ngaenz guh soengq hawj bouxgungz. Sezyangz suhgi dawz mboujdingh cawjeiq, de ngeix bae siengj dauq, nyinhnaeuz lijdwg bae cam Ausam. Ausam naeuz:“Gou daengx ranz vunz bae yienhsingz youq, mbouj rox bae ra maz hong guh, baenzngoenz gwn rumzbaek roxnaeuz gwn hoengheiq ndaej imq ha? Dou youq neix lij miz reihnaz ndaem, mboujguenj souhaeuj lainoix, baenz- lawz dungx cungj mbouj iek ndaej.” Dingq daengz vah yienghneix, Sezyangz suhgi rox gij eiqsei Ausam lo, couh gietdingh cingjgouz ranzrwix bangbouj hawj Ausam gonq.

Sezyangz suhgi vih geij yiengh cingjgouz neix nyaengqfofo. Mwngz naeuz baenzlawz mbouj nyaengq ne? Hong bouhmonz, hong bangfuz, hong duethoj daengjdaengj, moix yiengh hong cungj mbouj suenq naek. Hoeng, sojmiz hong cungj gya hwnjdaeuj, Sezyangz suhgi ngoenznaengz lumj aen’gyangq nei baenq bae baenq dauq, mbouj ndaej dingz roengzdaeuj geijlai nanz, youh aeu guhhong, caen dwg dwgrengz、naiqbaeg dangqmaz, mboujgvaq, de mbouj miz saek coenz vah ienq gvaq, cij it sim it eiq lumj duzvaiz cae naz nei ngaemgyaeuj guhhong.

Sezyangh suhgi lwnh hawj Ausam, ciuq gvidingh, gij ngaenz ranzrwix bangbouj aeu cek ranzrwix bae hwnj ranzmoq cij ndaej daengz fwngz. Ausam baez dingq couh simgip lo, naeuz:“Mbouj ndaej cek nw! Ranz gou yienznaeuz rwix, danghnaeuz cek bae le, dou youq gizlawz?”

Ausam gangj hix deng bw, caiq gangj cek ranzrwix le de hix mbouj miz cienz hwnj ranzmoq, gyoengqde rox bae gyawz youq ne? Ai! Mbouj miz cienz maz saeh cungj guh mbouj baenz.

Sezyangz suhgi laekhaemz buet gwnz buet laj ra vunz bangcoh. Ra gvaq haujlai aen hangznieb, buet daengz gavaq feq caez, dauqdaej dwg goengfou mbouj vei boux miz sim, lijgvang hangznieb nyienh bangcoh 3 fanh maenz, dangznieb bangcoh 2 fanh maenz, hangzcauhceij bangcoh 2 fanh maenz, baenzneix caemh miz 7 fanh maenz ngaenz.

Miz ngaenz lo, Sezyangz suhgi ndaej soeng gaemz heiq iq ndeu lo, ciepdwk de youh bae ra gencuz gunghswh. Haeuj ok geij baez, gangj haemz naeuz hoj. Mbouj dwg vih ndang gaeq dwg vih bouxwnq baenzneix okrengz, boux lauxbanj gencuz gunghswh deng gij ndatcingz Sezyangz suhgi gamjdoengh lo, de dapwngq ok vunz bang Ausam hwnj ranzmoq mbouj aeu saek faen ngaenz. Aen sim Sezyangz suhgi dauqdaej ndaej onj lo.

Mbouj geij ngoenz, boux lauxbanj gencuz gunghswh couh baij vunzhong caeuq gihgai daeuj daengz ranz Ausam. Gihgai yiengjlunglung， ranz- nden yiemz gij sing neix coeg rwz. Hoeng, Ausam naeuz gij sing neix ndeidingq raixcaix, de gyaez dingq dangqmaz. Dingq gij sing neix, Ausam lumj yawjraen ranzmoq couh youq baihnaj nei.

Cawx cien cawx suijniz cawx ganghcaiz daengjdaengj, cungj dwg Sezyangz suhgi caenndang bae guh. 4 ndwen neix daeuj, Sezyangz suhgi haeujok ranz Ausam maeddeih lumj ranz gaeq nei. Ausam dawz de dang vunzcaen, saeh iq saeh hung cungj ra de dawzdingh.

Ndwenlab ngeihsam, Ausam haeuj ranzmoq, youq lajmbanj, haeuj ranzmoq dwg gienh saeh hung ndeu, vunz lajmbanj gig yawjnaek, yawj seizndei buen lozyieng haeuj ranz; rap haeuxraemx haeuj ranz; aeu nohmou cug、gaeq cug、haeuxnaengj nding、gyaeq nding daeuj baiq cojcoeng caeq baed, ranz Ausam hix mbouj noix saek yiengh mbouj guh. Seizdoeng mbwn lij nit, aen sim Ausam raeujrubrub lumj ndaej ndit dak, lumj ndaej byoq feiz……

Ausam aenvih yawj mbouj raen ndigah din fwngz mbouj fuengbienh, de guh mbouj baenz hong haeuj ranzmoq, cijndei youq laj roqranz loih duk, gij duk neix de yaek dawz daeuj san raepgaeq raepmou. Ausam couh miz yiengh dinfwngz neix ndwi lo, mwhgonq da caengz mengz, seiz ndaejhoengq Ausam couh san raep dawz bae haw gai, ndaej di cienz ndeu daeuj cawx gyu cawx youz. Da meng le, Ausam lij bumhbax san ndaej raep, mboujgvaq dinfwngz beij mwhgonq numq lai lo, souhaeuj hix couh noix lo.

“Ausam……”

Ausam baez dingq sing heuh couh rox dwg Sezyangz suhgi daeuj lo, de “w” dap coenz ndeu, daengx fwngz roengzdaeuj, naj riunyumnyum dwk.

Sezyangz suhgi gyae’gyae couh hemq Ausam, naeuz:“Ausam, gou ngoenzneix daiq miz hek daeuj bw.”

Ausam baez dingq, doq cam:“Byawz ne?”

“Mwngz mbouj dwg caeuq gou nam naeuz siengj raen geij boux vunzgviq ma? Seizneix gou daiq gyoengqde daeuj lo.” Sezyangz suhgi angqvau dwk naeuz.

O! Vunzgviq daengz lo. Ausam sikhaek gveng fag liemz gyang fwngz roengz gwnz dieg henz ndang, gaen dwk lienzmuengz ndwn hwnjdaeuj, yaek byaij bae ciepcoux vunzgviq, de yamqdin gip lai, byaij mbouj maenh, youh deng gij duk laj din gveuj din. Ausam laemx lo, caekhaex datnaengh youq gwnznamh, caemh yiengj “bwng” sing ndeu. Dingq gij sing couh rox, caekhaex de itdingh gig in. Sezyangz suhgi raen le buet gvaqdaeuj yaek rex Ausam mbouj hawj de laemx, hoeng, de liz Ausam gyae lai, ganj mbouj gib. Cij ndei yo de hwnj, doq yo doq naeuz:“Siujsim di ma, gaej gikdoengh baenzlai!”

Ausam cukcak ndwn hwnj le, bi gyaeuj song mbat, doiq Sezyangz suhgi naeuz:“Suhgi mwngz baenzneix coz lwi?”

Sezyangz suhgi naeuz:“Gyo- mbaiq mwngz haenh gou. Daeuj, daeuj gou naeuz mwngz nyi, boux neix dwg guh lijgvang Cau lauxcungj.”

Ausam vazmuengz yiet song fwngz bae gaem fwngz Cau lauxcungj, doq gaemfwngz doq naeuz:“Gyo- mbaiq! Gyo’mbaiq Caucungj!”

“Boux neix dwg Dangznieb Vangz lauxcung, boux neix dwg……” Sezyangz suhgi boux he boux he gaisau gyoengqde hawj Ausam.

Ausam caeuq gyoengqde baez boux baez boux gaem fwngz, doq gaem fwngz doq naeuz:“Gyo’mbaiq! Gyo’mbaiq mwngz bangcoh gou! Gyo’mbaiq……” Seizneix Ausam lumjnaeuz cij rox gangj “gyo’mbaiq” song cih saw neix ndwi nei, caemhcaiq lij gikdoengh dwk gangj vah yaek mbouj baenz coenz bae.

“Lij miz gienh saehndei ndeu.” Sezyangz suhgi doq gangj doq mbon ok bonj bouh iq ndeu daeuj ndenq haeuj ndaw fwngz Ausam, naeuz:“Gij ngaenz ranzrwix bangbouj mwngz daengz fwngz lo, neix dwg cunzcez mwngz.”

Ausam ciep aeu cunzcez, fwngz saenzdedded, baez mbehai, doeksaet dwk naeuz:“Song fanh ngeih!” Ausam vazmuengz gaem fwngz suhgi ndaet- ndaet bae, naeuz:“Gyo’mbaiq suhgi! Mwngz dwg bouxvunz gangj daengz guh daengz, gaxgonq gou lij mbouj saenq mwngz dem……” Seizneix Ausam song da gamz raemx, sing gangj vah miz di saenz.

Seizneix Sezyangz suhgi lumj fatyienh maz, dinghdingh dwk yawj fouqda Ausam, yaep ndeu, de cij naeuz:“Ausam, da mwngz……mwngz?”

Ausam cam:“Da gou baenzlawz yiengh lo?” De geizheih dwk yawj suhgi, lau da de miz maz rwix swhgeij mbouj rox. “Yi? Gou……gou yawj- raen sou lo! Gou caen yawj ndaej raen sou dahraix! Da gou……da gou……gou……” Ausam maegsaeg dwk yawj boux dem boux……

Daihgya mwngz yawj gou, gou yawj mwngz, caez riu hwnjdaeuj lo…… Vahsug gangj saeh ndei guhdoih daeuj daengz ranz, caen mbouj dwg lox vunz ndwi.

（sat）